إمبارح خير اللهم ما أجعله خير, كنت قاعد وماسك جرنان الأخبار, وعمال أقرى فيه لقيت خبر بيتكلم على إن وزير الثقافة بيعلن عن حملة التبرع لبناء المتحف المصري الكبير.
إشي خيال يا ناس على رأي محمد صبحي, يعني الناس مش لاقية تاكل تقوم تتبرع علشان المتحف الكبير. ده نص المصريين مراحوش الصغير, و ثلاث أرباع اللي بيروحوا هدفهم الأساسي الفرجة على المزز المستوردة. بس الوزير قال ان الموضوع مهم ونهضة ثقافية كبيرة هتخلي مصر الألفا (نمرة واحد يعني) في موضوع المتاحف ده.
وبما إني وطني مخلص فأنا فكرت في شوية اعلانات علشان الحملة القومية لجمع التبرعات من أجل بناء المتحف الكبير
أول إعلان
طفلة صغيرة شكلها كده رقيقة وأمورة وياريت تكون هدومها مبهدلة شويتين تطلع علينا في التليفزيون مع خلفية أغنية إيدي فإيدك (ماهو معندهمش غيرها) وتقول
"أنا بنت مصرية, مش لاقية آكل ولا لاقية مية أستحمى ولا حتى أشرب. بس نفسي مصر تبني المتحف الكبير. إتبرع ولو بجنيه"
التاني
في برنامج البيت بيتهم, يطلع المفتي مع تامر حبيب الملايين ويعملوا الحوار ده
تامر: جالنا أكتر من جواب وإيميل وفاكس بيسألوا عن حكم التبرع لبناء المتحف المصري الكبير
المفتي: طبعاً ده واجب قومي وكلنا لازم نتبرع, والمتحف المصري ده البلد محتاجاه, وبيت المال بيستحق أموال الزكاة
أصل المفتي بتاعنا دؤرم وما بيحبش حد يمسك عليه حاجة
التالت
بنت زي القمر, لابسه من غير هدوم (لامؤاخذه) حاطه على وشها اتنين طن مكياج علشان محدش يعرفها تطلع مع مذيع/مذيعة في برنامج, واقفين في الشارع وبعدين يدور الحوار ده
المذيع: هتتبرعي لبناء المتحف؟
البنت: طبعاً أنا وكل صحباتي بكرة الساعة 1 الضهر هنعمل دونيشن في البنك الأهلي فرع قصر النيل
(البنك الأهلي في اليوم ده, وفرع قصر النيل بالذات هيعمل نسبة تبرعات مهولة)
الرابع
نفس الموقف بس بدل البنت يبقى تامر حسني مع مذيع أو مذيعة برضه بس يقول على بنك تاني في يوم تاني
(البنك ده هيحقق أكبر نسبة تبرعات في تاريخ البشرية, لأن طبعاً ولاد كتير هيستغلوا الفرصة علشان يتبرعوا, ماتخلوش أفكاركم تروح لبعيد)
الخامس
طبعاً لازم يبقى فيه مارثون خيري, ولازم يبقى في يوم اليتيم وأنا فكرت في الكلام اللي هيطلع الممثلين والممثلات والراقصين والراقصات علشان يقولوه في التليفزيون
"إحنا رايحين كلنا الماراثون الخيري الكبير. علشان إيه؟ لأ مش علشان ضحايا قلعة الكبش, ولا علشان أطفال الشوارع, ولاكمان علشان نجمع فلوس نعمل بيها مواسير مياة. الموضوع أكبر من كدة بكتير, ده علشان المتحف المصري الكبير" ويطلع في الآخر إبراهيم نصر يقول "ده الكبير كبير"
لو كل ده بأى منفعش ممكن يجيبوا شوية ناس يلبسوهم شيوخ ويطلعوهم الأتوبيسات علشان يلفوا على الناس ويقولوا "تبرعوا لبناء المتحف)
المتحف المصري الكبير........... ده الكبير كبير
11 comments:
اتبرع ولو بجنيه
هنبنى المتحف الكبير
عيب عليك ده هيوفر5000
فرصه عمل
وخيجيب مليون او تنين مليون زائر سنويا يعنى زى المصانع بلظبط
وهيخلص على2011
د قالوه امبارح
اصلهم مبيحبوش يقعدو فاضين خلصو مستشفى السرطان واتفتحت
فقالو نشوف حاجه تانيه نلم منها
واهو كله بثوابه
بوست جااااامد
وسلاااااااااام
fnam_geology
شكراً ليك على زيارتك الكريمة
وعلى تعليقك الجميل
أنا مش معترض بشكل أساسي على فكرة ان احنى نتبرع, بس علشان إيه وإمتى؟
يعني المتحف مش هيموت لو اتأخر 4 سنين
بس الناس هتموت من العطش
نحل المشاكل الأساسية وبعدين نتكلم.
مش كده ولا إيه
نورت المدونة
يخرب عقلك
هههههههههه
بوست هايل جدا
احنا خلاص دخلنا عصر التبرع القومي لاي حاجة
نتبرع للاكل
ونتبرع للشرب
ونتبرع للعلاج
ودلوقتي نتبرع حتى يستمتع الاجانب بآثارنا
ههههههههههه
انت تقريبا عملت كل افكار الاعلانات اللى بيلقحوا جتتهم علينا بيهم علشان يلموا تبرعات
بافكر ادخل معاك في الحملة القومية دي بشوية اعلانات واهو برضه ينوبنا في المشروع القومي جانب
ههههه
خد عندك يجيبوا شوية عيال غلابة وشكلهم يحنن قلب الحجر وماشيين في ايديهم ورق بردي ايشي ملفوف وايشي متكيس ( في كيس يعني ) والكاميرا تجيبهم في لقطة توتالة وهم واقفين صف زنهار ورافعين راسهم لفوق
وتركز الكاميرا بعد كده على اللى في النص
عيل شكله شضلي يزغر بنص عين ويقول اتبرع لعمل المتحف الكبير
وتعالوا زورونا
-------
عجبتني قوي قوي بتاع البيت بيتهم والمفتي بيفتي بضرورة التبرع
هههههههههه
ح افكر وارجع تاني
Bella
منورة الدنيا
حلوة الفكرة بتاعتك جداً
بستني ليكي في الأخراج والتصوير والحاجات دي؟
شكلك كده
على فكرة الصورة اللي فوق أنا اللي عاملها. إيه رأيك فيها؟
لو عايزاني أعمل تحديث أحط فيه الأعلانات بتاعتك أوكي
عايزة تكملي الحملة عندك شغال
بس قوليلي الأول
تصور بقى انك نسيت اهم شخصية في حملة الاعلانات
يسرا
تدخل يسرا الكادر وهي تتمشى على ارضية من سيراميك الفراعنة او سيراميكا كليوباترا اي حاجة فرعونية يعني وهي حافية القدمين وتتمشي بدلالها المعروف وتغمز بعينها وتقول
اتفضل شرفنا
وماتنساش تجيب معاك تبرع للمتحف الكبيييييييير
وتنزل في الخلفية الموسيقى التصويرية لفيلم دانتيلا
انت اللى عامل الصورة دي
حلوة قوي قوي
يبقى ح نعوزك بقى ياعم لما نعمل بلوج مشترك
ح اقول لك على الفكرة في الميل
بس انا ماليش لافي الاخراج ولا التمثيل
لي في الفرجة بس
وبتفرسني الاعلانات صراحة وخصوصا اعلانات الضرايب
دي بقى لها موال لوحده
ههههههههه
ههههههههههههههههه
ايه اللى بيحصل ده
انت بتتكلم جد
ده الواحد بيصعب عليه حال الفقرا اللى ماليين البلد ومش عارفين هنعمل لهم ايه والواحد صعبان عليه حال اللى بيموتوا من غير ولا أكل ولا خدمات حتى
الحكومة عاوزة تتعلم ازاى تتعامل مع المواطنين أصل شكلهم كده لسه بيتعلموا ألف باء الحكم وخدمة المواطنين
بس حلوة اوى الاعلانات اللى انت اقترحتها ديه
انت تنفع فى مجال الاعلان ياشقوب
ايه الفن ده كله يابنى
تحياتى للمتحف الكبير
عاشقة الوطن
أيوة بتكلم بجد والخبر ده كان منشور في الأخبار
معرفش الحكومة عايزة ايه بس أهم حاجة نيعملوش دمغة جديدة ويسموها معونة متحف
انا مش عارف هو لسه فى حد معاه فلوس يتبرع ماظنش الناس مش لاقية تاكل
اسلام رفاعي
لاوحياتك الناس مش لاقية ولا حتى تشرب
يا عم الحج البلد بس فيها فلوس عشان يبنوا نوادي للجيش وفنادق للجيش
وفلوش عشان يعملوا شارع وظبطوا رصيفوه وبعد كام اسبوع يكسروا اللي عملوه عشان يبدءوا من الاول
Post a Comment