بعد أن لاحظت توتر الناس في بلدنا العظيم وعدم فهمهم لما استغلق عليهم من أحداث تجري داخل البلاد, وتساؤلاتهم الكثيرة عن سر ظهور القاعدة في مصر (بلد الأمن والأمان وأكل البطيخ والبتنجان) وفي هذا التوقيت والزمان. توجهت إلى معلمي الحكيم شقلوب الأكبر أطال الله عمره وأخبرته بما يجول بخاطري وخاطر باقي الرعية فأجابني بما استغلق على فهمي المحدود وذهني المكدود. وجعلني أفيق بعد أن أنار لي الطريق.
قال شقلوب الحكيم:
بعد اقرار قانون مكافحة الإرهاب العظيم بدلاً من قانون الطواريء لعنه الله, وقعت حكومتنا الذكية في مشكلة وأزمة نفسية. فقد بدأت الأشاعات والأقاويل تنتشربأن هذا القانون صمم خصيصاً من أجل الجماعة المحظورة كما يمكن استخدامه بتصرف مع المعارضة الغير محظورة. وبالطبع قام بنشر هذه الأفكار السوداء مجموعة من الشباب العملاء والخائنين الذين يطلقون على أنفسهم اسم المدونين.
وبعد بحث وتمحيص واستشارة المستشارين وقعت حكومتنا الذكية في حيص بيص ولم تدر كيف ترد على تلك الشائعات وخصوصاً بعد تواجد معظم قيادات الجماعة اياها في السجون بفضل مجهودات الأمن الداخلي الكبيرة وبدون قانون ارهاب ولا يحزنون. فلم يبق الا الحل الأخير وتوجه أفراد الحكومة الى الغرفة السرية, سر أسرا حكومتنا الذكية السوبر كمبيوتر العظيم ماركة متزوقيني يا ماما ووقفوا أمامه يبتهلون ويدعون بعد أن أحاطوه علماً بما خفي عليه من أخبار وما لم يعلم به من أسرار أخذ السوبر كمبيوتر يجري حساباته المعقده لما فيه صالح البلاد والعباد وسأل السؤال التالي:
برضه الحكومة مش هتمشي؟
وبالطبع ردوا عليه:
لأ الحكومة قاعدة
فرد الكمبيوتر:
يبقى القاعدة هتضرب البلد
وكان ما كان, وسكت الحكيم عن الكلام لحرصة الشديد من غدر الأيام
5 comments:
هههههههههههه
والله أسلوبك جميل اوى فى سرد أحداث القصة
وكله كوم وشقلوب الحكيم ده كوم
وكمان قانون الارهاب وقانون الطوارئ
والله كلام تمام اوى
وخلى بالك من السوبر كمبيوتر وهو بيحسب خليه يحسب كويس
تحياتى الشديدة
عاشقة الوطن
والله سعيد جداً بزيارتك وشكراً على الكلام الجميل ده. وكرريها كتير
ههههههه
حلوة قوي
هو طبعا قانون الارهاب لازم له زباين
مش معقول يعملوا قانون طويل عريض ومايشغلوش مفاصله
حتى القانون مفاصله تتيبس
علشان كده بيمرنوه كل يوم بالقبض على جماعة وهكذا
وكله على حس القاعدة
بس عجبتني قوي الجملة الاخيرة بتاعة الكمبيوتر السوبر
هي الحكومة قاعدة
ايوة قاعدة ومتبتة هههههههههههههههههههه
bella
أهلاً يافندم
فينك من الصبح. لابتردي على تعليقات الناس عندك ولا جيتي زرتيني لدرجة اني قلقت اني خسرت واحد من الزبونين اللي حيلتي. أصل انا ماليش زباين غيرك انتي وعاشقة الوطن. اللهم أدامكم عليا نعمة وحفظكما من الزوال.
الله حي والتالت جي يا مسهل.
مبسوط ان الحكيم شقلوب عجبك والراجل ده لسه عنده كلام كتيييييييييير بس مدكنه
فيني ايه بس ياعم
اذا كنت انا جيت رديت عليك انت الاول قبل ماارد على الناس عندي
ههههه
وبعدين ماتقلقش
بكرة مدونتك تتعرف وماتلاحقش على الزباين
اشترك في موقع افحت وبعض المواقع الاخرى اللى فيها تجمعات مدونين
وتعالى الجروب بتاعنا
ح ابعت لك دعوة من الجروب علشان تشارك فيه
اعمل حساب على الفيس بوك وتعالى جري
ههههههههههه
ح اروح اعمل لك الدعوة حالا
تحياتي
Post a Comment