أهلاً بيكم, حد قرأ البوست اللي فات؟ أكمل أنا بقى
بعد الثورة أو الانقلاب ايه اللي حصل؟ الملك اتنازل عن العرش لابنه وبعدين ساب البلد ومشي. كده, بمنتهى البساطة لدرجة ان أنا بيتهيألي لو كان واحد وقف قصاد القصر بتاعه وقاله امشي وأنا أقعد مطرحك كان مشي.
طيب وبعدين, تم تعيين محمد نجيب وصياً على أحمد فؤاد الثاني الرضيع آخر ملوك الأسرة العلوية في مصر. وشويتين كمان وقعنا اتفاقية الجلاء ومصر بقت جمهورية ورئيسها محمد نجيب اللي أعلن مباديء الثورة وأعلن كمان تحديد الاقطاع بصفته رئيس مصر.
وفين جمال عبد الناصر؟ جمال عبد الناصر كان عضو في مجلس قيادة الثورة زيه زي محمد نجيب زي السادات زي جمال سالم وكان كمان ماسك رئيس الوزراء ووزير الداخلية
يعني كان مصر رئيسها محمد نجيب ورئيس الوزراء جمال عبد الناصر.
المهم ان الشعب المصري بيحب نجيب وناصر والشعب السوداني بيحب نجيب بس والدنيا ماشية بالاتحاد والنظام والعمل وده كان شعار المرحلة. أصل لو مش واخدين بالكم احنا في مصر مينفعش يبقى فيه حاجة تتعمل الا في مرحلة ومفيش مرحلة من غير شعار. وعلى رأي المثل الا مالوش شعار, يدورله على شعار
فجأة يحصل خلاف بين نجيب وناصر, أو بمعنى أصح بين نجيب وباقي أعضاء مجلس قيادة الثورة. ليه؟ هو ده مربط الفرس
اللي بيحبوا ناصر بيقولوا ان نجيب كان عايز يستأثر بالسلطة لوحدة ويبقى دكتاتور ومعرفش ليه أنا شايف ان ناصر لما مسك الحكم بعد كده كان ماسك البلد لوحده والباقيين كانوا مالهومش لازمة غير انهم يقرفوا في الشعب.
طيب الناس التانيين الوحشين اللي مش بيقولوا ناصر ناصر يا حرية, الناس دي بتقول ان نجيب قالهم ياولاد احنا عملنا اللي علينا ونسيب البلد للناس والأحزاب يحكموها. طبعاً ناصر قاله دي أحزاب فاسده وناس همج ولو سيبناهم يحكموا هيبوظوا البلد واللي احنا عملناه واطلع بره بيتي انت مش ابني, شقلوب هو اللي ابني وحاجات كده
طبعاً نتيجة الخلاف ان طلع خبر في الجرايد بعزل محمد نجيب. قوم الناس الهمج تقوم عمله هوجة وقلبان وتهتف بحياة نجيب ...وبيب بيب نجيب والشغل اللي احنا عرفينه. وفعلاً يرجع نجيب. لكن سبحان الله متفهمش ايه اللي حصل ... البلد باظت والبوليس مش شايف شغله والمصالح شغاله على كيفها... خلي بالكم محمد نجيب لسه رئيس الجمهورية وناصر لسه رئيس الوزراء ووزير الداخلية. الناس طبعاً حست ان نجيب راجل طيب وغلبان ومش عارف يمسك البلد. قام طلع علينا خبر بيقول ان نجيب اعتقلوه في فيلا في المرج واتمنع من المشاركة السياسية اللي كان من ضمنها انه يشوف عيلته أو يتكلم مع حد. ومحدش فتح بقه وقا ل نجيبك منين يا نجيب.
وبقى ناصر ناصر يا حرية هو رئيس جمهورية مصر العربية ورئيس الوزراء ورئيس مجلس قيادة الثورة.
هنكمل مع الزعيم جمال عبدالناصر بعد سماع آرائكم. ان شاء الله
2 comments:
شقلوب
هو فعلا نجيب كان مظلوم مع القيادات ديه وان جمال هو المسيطر
انامش تبع اى حزب ولا اى حاجة انا اللى بشوفه هو اللى انا بكون معاه
بس انت عارف اهم حاجة ايه
ان اسلوبك فى الكتابة جميل جداااا
وكمان بيخلينى عاوزة أقرأ لك
يعنى بجد طريقتك فى الكتابة وعرض مواضيعك جميلة جداااااااا
تحياتى الشديدة
عاشقة الوطن
أخيراً حد رد عليا
شكراً جداً على الكلام الجميل ده
بس اتأخرتي في الرد لدرحة اني بدأت أقلق عليكي وعلى انك تكوني زهقتي من كلامي على الثورة
على العموم أنا فاضل في زمتي تدوينتين عنها واحده عن ناصر وواحده عن السادات
وربنا يستر
وتعجبك
Post a Comment