عدنا. ومن أرض مصر المحروسة يعود شقلوب الصغير ليكمل حديثه عن الثورة. لو قرأتم التدوينات السابقة فبها ونعم, أما لو كانت الأخرى فأقرؤوها لأنني لن أعد ما قلت من قبل.
كفاية فصحى لحد كده. وقفت فين يا واد يا شقلوب؟ كنت واقف فين يا شقلب؟ في ميدان طلعت حرب؟ يييييه مش وقته الزهايمر ده
آه افتكرت. ناصر لما مسك البلد, طبعاً اللي شافوا اللي أنا كتبته قبل كده متوقعين ان أنا هشتم في ناصر. لكن مش ده اللي أنا عاوز أعمله , ومش هزايد على وطنيته وانتماءه , بس في رأيي المتواضع أنه يكفي القائد وزراً سوء اختيار رجاله
وبصرف النظر عن طريقة تولي ناصر الحكم فهو مسكه وخلاص. المهم ايه اللي حصل؟
طبعاً مباديء الثورة لازم تتنفذ ونكمل خطتنا للنهضة بمصر؟ ده اللي في ظني قاله ناصر واللي اتسبب في أكبر مهزلة في تاريخ أي بلد في العالم
هنأمم المصانع, كل المصانع تتأمم ويمسكها ضباط جيش لا يعرفوا حاجة عن اساليب ادارة المنشآت المدنية ولا طبعاً المصانع ولا يعرفوا المصانع دي بتصنع ايه أصلاً
هنبني مصانع, المصانع تتبني جنب النيل وفي أحسن الأماكن الزراعية.
هنلغي الأقطاع, ويتلغي الاقطاع بدون وجود طريقة واضحه تحافظ على نسب انتاج المزروعات. يعني ايه؟ يعني من الآخر كده. مصر محتاجه نص الأراضي تتزرع قمح
تتعمل ازاي دي؟ الله أعلم
مفيش أحزاب وكلام في السياسة تقوم المخابرات تخلي أي حد يتكلم في السياسة في بيته بقدرة قادر يبقى مش قادر يتكلم في المعتقل
هنعمل رقابة. ييجي الرقيب اللي من سلطته انه يشيل بمزاجة لدرجة انه شال صفحة كاملة من الأخبار قبل الطبع مباشرة ولم يجد مصطفى أمين الا أن يكتب فيها هذه الصفحة بيضاء لا بسبب الرقابة انما تم غسلها بصابون نابولسي شاهين
ده حتى تأميم القناة لولا ستر ربنا وان أمريكا وروسيا أدخلوا لمجرد فرض النفوذ كان زمان مصر تحت الاحتلال الثلاثي
هنساعد الدول العربية, تقوم جيوشنا كلها تتحرك يمين وشمال تساعد في الثورات التحررية في الدول العربية وطبعاً أهمهم حرب اليمن
هنحارب اسرائيل يقوم الجيش اللي لسه ما أخدش نفسه يطلع كله بعساكره بصف ضباطه, بدبابيره, بنسوره, بطياراته وعلى الجبهة علشان اسرائيل لما تضربنا تلاقي كل حاجة قدامها ومتحتاجش تدور كتير
بس كلمة حق لازم تتقال عبد الناصر كان رجل بمعنى الكلمة, وكان شجاعاً لدرجة التهور, يثق بمصر وقدرات شعبها وجيشها الى حد الغرور, ولم يكن يخشى أحد.
لكنه لم يكن سياسياً, خسر العالم كله وكسب الاتحاد السوفيتي. لأن السياسي لابد أن يكون ثعلب أو على الأقل أسد يمتلك مكر الثعلب ودهاءه , ولكن ناصر كان أسداً أحاطت به إما ذئاب أو كلاب وثعلب واحد.
وعندما حدثت النكسه وطالب الشعب ببقاء ناصر لم يكن هذا ضرباً من الجنون, أو عدم رؤية سياسية من رجل الشارع. ولكن رجل الشاعر شعر أنه في موقف كهذا لا داعي لاستعمال مكر الثعالب بل الحاجة كل الحاجة كانت لقوة الأسد وبطشه.
وبدأ ناصر قبل رحيله في بناء الجيش وأعلن ما يطلق عليه بحرب الاستنزاف. ولكن اعلان الحرب تأخر كثيراُ بموت الأسد المحارب
وعندما مات ناصر بكاه كل شعب مصر. ربما اختلفنا معه أو عليه ولكن الأسد مهما كانت قسوته بأهله فهو دائماً يضفي عليهم الاحساس بالأمان
ولذلك فبرغم النكسة وبرغم ما فعلته أجهزة الأمن والرقابة بكت الناس الأمان والطمأنينه في صورة ناصر
5 comments:
ازيك ياشقلوب
معلش اتاخرت فى قرائة البوست اللى فات
بس مش معنى كده انه مش عاجبنى ولاحاجة
بالعكس بوستاتك كلها جميلة واسلوبك زى ماقولت روعة
تانى حاجة انامعاك
انا برضه مش مع ناصر ومش تبع الحزب الناصري
وعلى الرغم انى مختلفة كتير مع عبدالناصر وبختلف مع سياسته بس بحترمه جدا وبحترم رجولته اللى يمكن مش موجدة كتير اليومين دول
يمكن كان متواضع كمان
وكان حاسس بالمسئولية
بس برضه بختلف معاه فى حاجات كتيير
تحياتى على البوست الجميل ده
وعلى كل بوستاتك الروعة ياشقلوب الصغير
سلامنا لشقلوب الكبير
عاشقة الوطن
والله أنا حاسس ان أنا بكتب عشانك
مفيش حد راضي يعلق على البوستات دي غيرك.
المهم ان انا مبسوط لأنها عجباكي, وده يكفيني جداً
وشقلوب الكبير بيسلم عليكي وبيقوك انه راجع عن قريب بس هو في أجازته السنوية في جمصه
منورة الدنيا دايماً يا عاشقة الوطن
بص ياشقلوب
هو ممكن يكون فيه ناس بتدخل مدونتك وتقرأ اللى فيها بس مش بالضرورى تعلق
وممكن يكون فيه حاجة كمان
ان انت مش بتزور مدونات كتير عشان اصحاب المدونات التانية ترد لك الزيارة ديه
فبالتالى مفيش كتير بيدخلوا مدونتك
نصيحة من اختك
حاول تدخل مدونات كتير وتقرا مواضيع اكتر فى المدونات وتعلق عليها
صدقنى الناس مش هتعرف مدونتك غير لما انت تبدأ بالزيارة لهم الاول
ماشي ياشقلوب ياصغيير
وبعدين ازاى شقلوب الكبير يطلع اجازته السنوية ويسيبك انت لوحدك كده
يالا معلش تتعوض ان شاء الله
استمر فى كتاباتك
بجد اسلوبك روعة فى سرد المواضيع
تحياتى ياشقلوب
يظل ناصر مع اخطائه علامه فارقه في تاريخ مصر ولا ابالغ أن قلت في تاريخ العالم كله يكفي أن الرجل كان مثال للشرف والنزاهه وأن أسرته لم تعرف حتى طريق الأعلام وأدعوك لقرأة بوست كتابته بأسم ثورة يوليو 55 سنه أستبداد كتبت جزء كبير فيه عن اسد مصر جمال عبد الناصر
تحياتي لك ولمدونتك المتميزه
egypt_eyes
كان عبد الناصر رمزاً وشخصاً لهما تأثير السحر على الشعب المصري
وكان يستطيع أن يلهب حماس الشعب بمجرد اشارة من يده
ولكن للأسف فان أخطاء العظماء عظيمة مثلهم
شكراً على زيارتك ويارب متكونش الأخيرة
Post a Comment