كل سنة وأنا وانتم ومصر كلها بخير, ليه؟ النهاردة عيد الثورة. ثورتنا البيضاء يعني مش التركواز ولا الصفراء ولا الحمراء. ثورتنا اللي كانت زي النهاردة بالظبط من 55 سنة.
بس كل سنة بتيجي في دماغي حبة أسئلة. قلت ليه يا واد متفكرش فيها بصوت عالي يمكن تلاقي حد يرد عليك ويصححلك مفاهيمك الغلط. أصل انت طول عمرك براوي وميعجبكش العجب ولا الصيام في رجب.
أول سؤال طبعاً كلكم خمنتوه. هي كانت ثورة شعبية ولا كانت انقلاب عسكري؟ هتقولولي هي تفرق؟ أقول أنا أكيد تفرق أصل ثورتنا العظيمة البيضاء ماكانش في أعضائها أو منفذيها مدني واحد يكسر عين الحسود ويحط فيها عود, أمال ايه اللي حصل؟
كتاب الثورة لما تزنقهم بالسؤال ده يردوا عليك ويقولوا العبيط أهه آسف قصدي يقولوا انها كانت انقلاب عسكري بس اتحولت لثورة شعبية. ليه؟ علشان الشعب هيصلها وهللها وكبرلها وقال عاشت الثورة المصرية. بس أنا الكلام ده مش عاجبني علشان الشعب المصري بيهلل ويكبر على أي تغيير بمنطق شالوا ألضو جابوا شاهين. ده عن أول سؤال
السؤال الثاني مين اللي قام بالثورة. طبعاً الظباط الأحرار. أيوة يعني مين من البني أدمين هتقولولي الجيش. أنا قصدي مين البني أدمين اللي كانوا هيتنفخوا لو الثورة فشلت؟ الاجابة اللي أنا أعرفها بتقول محمد نجيب على رأس القائمة ومين تاني؟ الناس اللي احتلت المبنى اللي بقى مركز قيادة الثورة. ومين كمان؟ الناس اللي هيعترف عليهم الناس اللي أنا قلتهم قبل كده. طيب وجمال عبدالناصر والسادات وباقي أعضاء مجلس قيادة الثورة. محمد نجيب بيقول ان الناس دي مكانتش موجودة في الجيش ساعة أما قامت الثورة. يعني ايه؟ يعني الناس دي خططت ووزعت الأدوار وساعة الصفر كان عبدالناصر وحكيم واقفين قدام المبنى (مركز قيادة الثورة) لابسين مدني. والسادات كان في السينما واتخانق وعمل محضر في القسم كمان, ده اللي قاله نجيب.على فكرة السادات مأنكرش ده وفسرة انه مكانش عارف ميعاد الثورة بالضبط لظروف كتير مافيش داعي تتقال هنا.
طيب السؤال التالت هي الثورة بيضاء ليه؟ هو الملك مقاومش ليه؟ رغم انه كان عنده حرس يقال ان تسليحه وتدريبه أحسن من الجيش والشرطة كانت معاه برضه. أمال ايه اللي حصل؟ على فكرة الناس كلها في مصر كان عندها أمل ان الملك فاروق يقدر يعمل حاجة للبلد دي أول أما مسك الحكم. صحيح الشعور ده قل مع الوقت لكن كان فيه ناس لسه عندها أمل. المهم ان نجيب برضه بيقول ان فاروق لما شافه وهو بيمشي قاله ان هما سبقوه وانه كان ناوي يعمل حاجة بس هما سبقوه وعملوا الأنقلاب ده اللي قاله نجيب في مذكراته كنت رئيساً لمصر. ورأيي الشخصي بيقول ان لو فيه حد ليه فضل ان الثورة طلعت بيضاء مش منقرشة بالأحمر يبقى للملك فاروق مش لحد تاني.
طيب آخر سؤال هي الثورة كانت مفيدة للبلد ولا كانت مضرة؟ يعني هل فعلاً الثورة نهضت بمصر ونفعتها ولا لأ؟
وللحديث بقية بعد سماع آرائكم ان شاء الله
6 comments:
طبعا ثورة شعبية
انت نسيت فيلم رد قلبي اللى بييجي مرتين في السنة ولا ايه
فاكر حسين رياض لما كان قاعد في البلكونة مع اولاده اللى مفروض انهم ضباط
غريبة قوي انهم ماكانوش ماشيين في الثورة مع ان ابنه حسين كان باشا من بتوع الداخلية ومفروض يكون في الشارع مع عربيات الأمن المركزي
ماعلينا
المهم يعني ان حسين رياض في الفيلم كان فقد النطق بعد الباشا الوحش ماطرده لانه اتجرأ وطلب انجي لعلي والثورة المباركة طبعا رجعت له النطق
وجاي تنكر بكل بساطة انها كانت ثورة شعبية
هو مش حسين رياض من الشعب برضه
الغريبة ان جابا في الفيلم لقطة الناس بتهتف فيها في الشوارع في نفس وقت اندلاع الثورة
مش عارفة ازاي
بس يظهر المؤلف ماعرفش يؤلفها كويس معتمدا على حماس المشاهد وانه غالبا مش ح ياخد باله
كمل الموضوع ياعم منتظرينك
Bella
أنا مرديتش أجيب سيرة الفيلم ده لأني بصراحة كده بحب يوسف السباعي.
معرفش أكمل ولا لأ لأني بصراحة الكلام اللي جاي هخبط في ناصر والسادات ومجلس قيادة الثورة. طبعاً مش هشتم بس هخبط في الحلل وهكسر القلل واللذي منه.
منوراني دايماً
بص ياشقلوب اللى انا يمكن فهمته من الثورة ديه ان الثورة أفادن مصر كتير بس برضه كان فيها ضرر من ناحية تانية
يعنى الفايدة انها خلصتنا من الحكم الملكى ومن نظام الاقطاع والنهب والكلام ده
بس المصيبة ان احنا وقعنا بعد كده فى حاجات تانية برضه بتستهدف النهب والسرقة وانا مابخصش حد من الرؤساء السابقين
هو الكلام عام
لان كل واحد له مساوائه وله مميزاته
يعنى الثورة كانت سلاح ذو حدين
اما بقي ان الثورة كانت مدنية ولا انقلاب عسكرى فمش عارفة هى كانت ايه بالظبط او المفروض انها ايه
كل سنة وانت طيب واحنا كمان طيبيين
عاشقة الوطن
أنا منكرش ان الثورة كان ليها مميزاتها
وحاجات كويسة أهمها بالنسبالي تأميم القناة.
لكن الثورة شالت الحكم الملكي وجابلتنا الحكم العسكري, وعيشت مصر لفترة طويلة تحت حكم الرجل الأوحد.
فيه حاجات تانية الثورة كان ممكن تعملها كويس بس عملتها بشكل مبالغ فيه زي التأميم.
لسه فيه كلام هيتقال ان شاء الله
بس طول منتي وبيلا بتقرولي
لا ياسيدي كمل وخبط في الحلل وكسر القلل ولك من عندي دستتين قلل قناوي معتبرين يتلجوا المية ولا اجدع من تلاجة كريازي ببابين
كسر ولا يهمك وخبط ماترحمش
منتظرة الباقي
انا شايفه
ان اى نظام بيبقى فى ناس مستفيده منه وناس بتتظلم بس الفكره ان وقتها اللى استفاد كانت فئه كبيره وكانت اعدادهم كبيره يعنى اغلبيه وبالتالى اى حد بيتكلم صوته كان بيضيع وسطهم ده لو قدر يتكلم اصلا
Post a Comment