الشرطة في خدمة الشعب, كلمة كنت بسمعها زمان وبشوفها في الأفلام العربي الأبيض والأسود. حاجة كده أكل عليها الدهر وشرب, من أيام ماكان الواحد وهو عيل صغير تسأله نفسك تطلع ايه يقولك ظابط.
الضابط لازم تبقاله هيبة ومكانة محترمة, ماشي. ممكن نسمح ان الهيبة دي يكون جزء منها نابع من الخوف من البطش, بس جزء صغير يعني. لكن الأمور توصل ان الواحد ينام يقوم يحلم بضابط شرطة وعصاية مقشه ده اللي مينفعش أبداً.
المشكلة ان مع عصاية المقشة هنحلم بجركن سبرتو وكابلات كهربة وناس بتتحرق وحاجات من دي.
مش مصدقيني
طيب أقرو الخبر ده من مصراوي
ده خبر بتاريخ 31/7
وفيه كمان خبر النهارده عنوانه
الموضوع ده اتنشر في أحد الصحف حسب كلام مصراوي يوم 26/7 والمتهم فيه هم رئيس شرطة سيوة ومعاوناة.
الخبر قديم شوية؟ ممكن
الغريب ان أنا امبارح وأنا مروح لقيت راجل كان معاه مراته وبيتخانق مع عسكري. خلي بالكم عسكري من اللي بيمشي خطوة واحدة في الشطرنج ده. المهم, الراجل بيتكلم بالعافية ورفيع وغلبان زي حالاتي والعسكري صحته مساعداه وعامل زي البغل. أنا قلت دي خناقة مصرية من بتاعة هوريك هوريك وخلاص وخصوصاً ان الراجل يظهر انه مريض لأنه بيتكلم بالعافية زي ما قلت. المهم ان العسكري لقيته بيقلع الآيش اللي هو الحزام يعني وعايز ينزل بيه على الراجل ولولا ستر ربنا وولاد الحلال كان الراجل الغلبان أخدله علقة مكن.
هو فيه ايه بقى؟ هي الشرطة نسيت انها أصلاً في الأصل من الشعب؟ ومن امتى الشرطة أصبحوا من ذوي الدم الأزرق؟ والعسكري ده, نسي أما كان بيرعى الغيط في البلد ولا ايه؟ دي مش اهانة والله لأن رعي الغيط أو حتى لم الجلة من ورا البهايم أشرف ألف مرة من اللي هو كان عايز يعمله.
وأما تتكلم مع حد من الصنف ده في لقاء صحفي أو تليفزيوني تحس انه بيقول انتوا زعلانين ليه دول ولاد........ مجرمين. وده وهم لسه بيتحقق معاهم والتهمة مثبتتش. وده طبعاً بيثير تساؤلات كتير حول أحوال المساجين داخل سجوننا المصرية.
نصيحة, أي حد ابنه يقوله أنا نفسي أطلع ظابط يعرضه على دكتور نفساني أحسن يطلع سايكوباتي أو سادي زي الكونت دراكولا الشهير ب ح.ع عرفتوه؟ للتسهيل الاسم التاني معرف بالألف واللام
الشرطة في خدمة الشعب...طالما الشعب بيبوس رجلين الشرطة, غير كده هتجيلك زيي كوابيس مليانة عصيان مقشات و جراكن سبرتو و لسه
15 comments:
هما دول اللي ماسكنها
عقبال ما يسيبوها
قليل من التفكير
الأول اسمحلي أسأل ليه قليل
متخليه كتير
ولا خايف تتحبس
شكراً على الزيارة وياريت متكونش الأخيرة
الشرطة في خدمة الشعب كان زمان في الافلام
وبعد فترة تم تغيير الشعار للشرطة والشعب في خدمة الوطن حتى تتنصل الشرطة من خدمة الشعب وحتى يصبح الشعب خدام
خدام لمين بقى دي فيها كلام
يعني خدام للوطن
والوطن هو الشرطة حاليا
وحيث ان واحد + واحد يساوي اتنين
يبقى الشعب خدام الشرطة
هههههههههههههه
وعليه فالمطلوب من الشعب يخدم بضمير ويبطل شغل الكروتة والحركات دي
فلو فكرت الشرطة تعلقه يتعلق
تجلده يتجلد
تحرقه يتحرق
هي حرة فيه
بالنسبة بقى للنصيحة بتاعتك معلش اسمح لي اختلف معاك
اي اب ح يفرح قوي لما ابنه يقول عايز ابقى ضابط
مش تشجيع منه لسادية ابنه
لا طبعا
ده لانه ح يبقى له ضهر يتسند عليه ويجيب له حقه من التانيين
علشان كده الاتجاه السادي منتشر في المجتمع علشان كل واحد بيحمي نفسه بطريقته وبالمرة مافيش مانع يظلم شوية مواطنين في السكة
قال سيكوباتي قال
سلم لي على حموم الانسان
بيلا
حموم الانسان بتسلم عليكي وبتقولك هي بعافية شويتين بسبب ان المية مقطوعة عندهم في البيت.
النصيحة اللي أنا بوجهها للغلابة اللي معاهمش فلوس يدخلوا ولادهم كلية الشرطة فبدل ما يطلع عنيهم يعرضوه على دكتور نفساني علشان ميبقاش مجرم ويلاقوه ماسك أخته الصغيرة ورابطها من شعرها في مروحة السقف ولا حاطط أخوه الصغير في فرن البوتاجاز
ولمعلوماتك واحد + واحد= اتنين كانت زمان من أيام الشرطة في خدمة الشعب برضه يعني ممكن تلوقتي يبقوا
واحد+واحد=20
لو الوحايد دي جيجات زيادة من عالنت
أو
واحد+واحد=واحد
لو الواحد الأولاني مدون والتاني تبع أمن الدولة تبقى النتيجة واحد من حبايبنا الحلوين يزورة بالليل ويخليه يساوي صفر
وواضح كده ان كل اللي احنا نعرفه كان زماااااااااان
منورة
ايه الاحلام ديه ياشقلوب
احلامك كلها بقيت سبرتوة وحرق
بس بصراحة اى حاجة بقيت متوقعة دلوقتى مفيش اى مشاكل
الشرطة بقي متوقع منها اى حاجة ومش هتفرق معاهم هي بتفرق معانا احنا
وربنا على كل ظالم ومفترى
معلش انا اتاخرت فى قرأة البوست ده وفى زيارة مدونتك ياشقلوب بس النت كان فاصل واقعد له 4 ايام فاصل
بس الحمدلله رجع بالسلامة وجيت هنا عشان اشوف جديدك
سلام ياشقلوب
عاشقة الوطن
العود أحمد
النت فصل؟ معلش كلنا لها
دي مش أحلام ولا كوابيس في واحد من كام يوم اتقتل في المنصورة.
ولسه
السلام عليكم
ازيك ياشقلوب
ايه اخبارك
انت غايب بقالك فترة
يارب تكون بخير
طمأنا عليك
انا سمعت المثل ده من زمان بطريقة تانية ..الشعب تحت جزمة الشرطة ,وفعلا سبحان الله اول مرة أشوف مثل بيتحقق في مصر0
الشعب في خدمة جزم الشرطة هذا ما يحدث لذا فما يجري طبيعي
اليوم سمعت عن الطفل الذي قتل في القسم أرأيت فجرا كهذا
لا حول ولا قوة الا بالله
مع تحياتي
السلام عليكم
عاشقة الوطن
معلش كنت مكتئب تلات أربع حبات كده بس بحاول أفوق تاني وتشقلب
وفيه فكرة كده عماله تخبط في دماغي وان شاء الله هعلن عنها قريب
سلام يا جميل
أحمد المصري
يا سيدي امثال كتير بتتحقق في مصر بس للأسف كلها منيله بستين نيلة
شكراً للزيارة
حائر
سمعت وقريت ومقدرتش أكتب علشان حسيت انه ممنوش فايدة. البوست ده كان في أول أغسطس وكنت بقول ولسة. بس بصراحة اللي بيحصل ده فاق أسوء كوابيسي
متقطعش الزيارات
شقلوب
أنا اللي عايز أقوله إن كل واحد في الداخلية دلوقتي فاكر نفسه خلاص مش من البلد دي أو أنه فوق الناس بالرتبة اللي معلقها أو حتى الشريطة الفاضية خلاص بقوا هما كل حاجة وإحنا يا شعب يا غلابة ولا حاجة
وأرجع وألف وأقول إن لو فيه عدالة بجد في البلد دي وفيه حكومة بتراعي ربنا عمر ما هيكون الوضع كده أبداً
وسيبك بقى أنت من أفلام الأبيض والأسود وأتفرج على أيظن وعيش
تحياتي ليك
نوشا
حاضر ياجميل هسيبني من الأفلام الأبيض والأسود وهتقرج على الأفلام الأسود في اسود علشان تنبسط
منور يا باشا
حلو البوست ده ..
ياريت تتفرج عالفيديوهاية دي ..عشان اجيبلك خرس ..بعد الشلل اللي عندك
:D
http://eldeebs.blogspot.com/2006/06/blog-post.html
Post a Comment