من كام يوم كنت قاعد أقرأ كتاب الفهامة لأحمد رجب. والفهامة هي سلسلة مقالات أسبوعية كان أحمد رجب بيكتبها في أخبار اليوم والكتاب كان عبارة عن تجميعة لشوية المقالات اللي اتكتبت سنة 94. اتفقنا, كده ممكن نبتدي المفيد
أحمد رجب من سنة 94 بيتكلم عن ايه؟ تخيلوا انه كان بيتكلم عن الضرايب والمية اللي مفوته على الصرف الصحي, والكوسة, والتصريحات اللي زي الرز ومحدش عارف هي بتتزرع فين ولا ليه مجرموش زراعتها بصفتها من المواد المخدرة, وبيتكلم عن التعليم اللي حاله بقى زي الزفت والدنيا اللي بتضرب تقلب وظباط الشرطة مكبرين ومابيهمهومش غير المعلوم قصدي المعلومات يعني.
من سنة 94 هي هي نفس المشاكل ومفيش حاجة منها راضية تتحل لأ وبالعكس بتزيد وتزيد وتتعقد زياده وبتكلكع أكتر. يعني من 13 سنة وأكيد من قبل كده والدنيا متحسنتش على مستوى التنظيم والادارة ورعاية محدودي الدخل اللي عن قريب هيتحولوا لمعدومي الدخل.
عدت كام وزارة, بصراحة معرفش عددهم بس ممكن نعد رؤساء الوزارات, عاطف صدقي, كمال الجنزوري, عاطف عبيد, أحمد نظيف مع حفظ الدكترة لكل واحد منهم.
يعني عندنا 13 سنة فيها أربع رؤساء وزارات والتغيير يتحسب بالسالب. ايه يعني اللي بيحصل؟ يعني كل الكلام اللي بيتقال واللي هيتقال هيعمل ايه في البلد ولا هيحسن ايه؟
اتخنقتوا مني؟ ونفسكوا تعرفوا أنا كاتب البوست ده ليه مش كده؟ علشان أنا حاسس ان كل الكلام اللي بيتقال عن الحكومة وتحسين أداءها والشتيمة اللي بنشتمهلها والكلام الحمصي ده مش هيغير حاجة, وهنفضل نكاكي ولا اللي بيدن في مالطة.
معرفش ليه بس حاسس ان احنا قبل أما نحاسب الحكومة لازم نحاسب نفسنا الأول وكل واحد يشوف هو يقدر يعمل ايه ويحاول يعمله بجد وصدق واخلاص.
مش معنا كده طبعاً ان بقول نبطل كلام ونبطل نحاسب الحكومة, بس ده يبقى جنب ده مش كله يبقى كلام في الهواء. وبرضه أنا مقصدش المظاهرات والاعتصامات والحاجات دي لأن نتايجها محدودة. أنا بتكلم في حاجات ممكن تتعمل منغير ما الحكومة تتعرضلها وفي نفس الوقت مفيدة للبلد.
أنا بفكر, وعايزكوا تفكروا معايا ايه اللي ممكن يتعمل؟
ايه؟ يا ترى فيه حد هيفكر معايا ولا هخبط دماغي في الحيط؟
عموماً الحيطة هي اللي هتتكسر علشان أنا دماغي ناشفة قوي.
ابقوا فكرولي في حاجة أخبط فيها دماغي منغير متتكسر (الحاجة مش دماغي)
سلام
18 comments:
حلو اوي البوست يا شقلوب
تحياتي
نحن نعاني انعدام شديد في الضمير ادى لانتشار الرشوة والمحسوبية والفساد على كافة المستويات
فلاامل ممكن انتظاره من شعب يبرر اخذ الرشوى بالحاجة المادية
الناس محتاجة تتغير وتعترف بعيوبها كخطوة اولى يعقبها تصحيح لهذه العيوب
والناس ايضا بحاجة لجرعات من الشجاعة لان من اوصلنا لهذه الحالة السلبية والتنطع الذي نعيش فيه وعدم المطالبة بالحق
سأعود لاحقاً
المشكلة يا شقلوب مش فى الوزارة نفسها
الوزراء مجرد واجهات بتنفذ خطط مرسومة على مدى سنين طويلة
هدفها أن الشعب يتلهى فى مشاكل حياته
و ميفكرش بقا فى سياسة ولا دخل قناة السويس بيروح فين ولا كل الكلام اللى يوجع الدماغ ده
طول ما الشعب بيفكر فى الميه و المجارى و تنسيق الثانويه العامة و ماتش الأهلى و الزمالك
يبقا البلد بخير
تحياتى:)
عروس البحر
شكراً على الزيارة
عايزين نشزفك على طووووووووووول
نورتي المدونة
بيلا
ايه ده كله؟ ايه ده كله؟
ايه اليأس ده كله؟
يعني أقعد جنب الحيطة وأعيط ولا نعمل ايه بالظبط؟
يا ستي نحاول. ليه لأ؟ ويوضع سره في أضعف خلقه.
منرواني دايماً. سلام
أليرون
يا سيدي الشعب من حقه يفكر في الميه والمجاري علشان منغيرهم مش هيعرف يعيش
وكمان من حقه انه يتفرج على كورة ويتابع ويتحمس
لكن كمان من حقه انه يقدر يعرف أكتر وينظر أعمق ويبص مابين السطور ايه اللي مكتوب
صدقني, احنا شعب كويس بس ناقصه وعي صحي, وعي من غير أهداف سياسية, وبهدوء من غير تعصب ولاتوجيه ناحية اتجاه معين
لازم كلنا نفكر احنا ممكن نعمل ايه
يمكن
نورت المدونة
عايز أشوفك كتيييييييييير
وأسمع رأيك أكتر بكتير
السلام عليكم
ازيك ياشقلوب
حمدلله على السلامة
فينك من زمان مكتبتش حاجة
المهم انت عاوز الحل يعنى
الحل ان احنا مش عارفين نجيب حل ولا احنا عارفين نصرف نفسنا
والله البلد صعبانة عليا
هى هتلاقيها من المياة الملوثة واللا المياة المقطوعة
ولا هتلاقيها من الصرف الصحى
ولا الأكل المسرطن
ولا من ايه
واللى مسئول عن ده كله هو اللى ماسكينا
انت عارف احنا ياشقلوب واقعين فى ايد حرامية ونصابين كبار اووووى
وربنا يطلعنا منها على خير
انا عارفة انى مقلتش لك على حل
انا عارفة انى عقدت الموضوع اكتر بس اعمل ايه
اصلي بحاول ادور على حل من زمان ومش لاقية
اعمل ايه بس
يالا ربنا يستر علينا ياشقلوب
معلش ياشقلوب استحملنى مش لاقية حل بجد
تحياتى ياشقلوب ياصغير
I passed to congratulate it with its work and to desire a good August to it in vacation.
عاشقة الوطن
طيب مالقيتيش حل دوريلي على حاجة أخبط فيها دماغي
انشاء الله يبقى فيه حل
منوره شقلوب الصغير على طووووووول
آمين يا رب
Mr. David Santos
Thank you for your visiting and happy vacation.
I hope you can tell me more about what's you liked and your opinions
thanks again for your visiting, I hope it won't be the last one.
عزيزي شقلوب الحكومات في مصر مجرد عرائس ماريونيت ولا يهم تغيير رئيس حكومه بأخر فكلهم ظل لرجل واحد
تحياتي
عزيزي عيون مصر
والمطلوب منا ان احنا نتفرج على اعبة خيال الظل دي ولا نحاول على قد ما نقدر ان احنا نعمل حاجة يمكن نقدر نغير
وبرضه من غير مندخل السجن ولا المعتقل برضه
ولو بعد عشرميت سنة جبت جريدة وقرأتها ستجد نفس المشاكل ونفس الهم ونفس الوجوه العكرة
أتعرف لماذا
لأنه نفس التفكير
ونفس المنطق الغبي
ونفس السلبية
ولا انصحك أن تخبط دماغك في الحيط لأن كل الحوائط مباعة حالياً خصخصة بقه بعيد عنك
مع تحياتي
السلام عليكم
دي أول زيارة ليا للمدونة بتاعتك وإن شاء الله مش آخر زيارة
والله البوست بتاعك زي الفل وبيقول كلام زي الفل ومش عارف أعبر بأيه غير أني أقول إننا كلنا كشعب رجال ونساء وشباب وشيوخ وحتى الأطفال لازم نكون كلنا إيد واحدة ونقول ولو لمرة واحدة لا لكل الظلم والفساد اللي إحنا عايشين فيه وعلى العموم لنا الله
على فكرة لما تلاقي حاجة تخبط فيها دماغك أبقى قولي علشان أجي أخبط دماغي معاك
تحياتي ليك
حائر
حرام عليك يا أخي حتى الحيطة مستخسرينها فيا. مفيش حد يقدر يديني دفعة أمل, طيب أي حد تاني غير أمل
عااااااااااا
نوشا
يا نعيش عيشة فل, يا نموت احنا الكل.
أولاً:أهلاً وسهلاً ومرحباً بك على صفحاتي المتواضعة.
ثانياً: أنا عايز أفكار, حد يقول نعمل ده ازاي. كلنا بنحلم بس الشاطر اللي يفكر ازاي يحقق حلمه
مش كده ولا ايه؟
شاب مصري
زيارة كميلة ومنورالي المدونة
بس حد يكتب ميله ورقم موبايله علني كده. مش خايف حد يعرفه ويقعد يشتغلك.
يلا مش مشكلة لو محدش اشتغلك قولي علشان أشتغلك أنا
Post a Comment