مش عارف ليه كل أما أقول يا واد يا شقلوب ملاكش دعوة باللي بيحصل في البلد واللي نفسه في حاجة خليه يعملها ألاقي طلعلي خبر فور دمي وحرق أعصابي وخلا لساني الطويل اللي عايز قطعه يتحرك
هبتدي كلامي بسؤال صغير, طبعاً كلنا عدينا على كورنيش النيل بالليل وبنشوف البرج بتاع البنك الأهلي منور وملعلع ومعظمنا علق وقال ان تكلفة اضاءه البرج ده ممكن تحل مشاكل ناس كتييييييييير
طيب وأما ييجي خبر في الجرنان ان البنك الأهلي تعاقد مع المقاولون العرب علشان يطورله البرج هو والبرج الجديد دي مش حاجة تنقط
يعني بدل ما يطوروا خدماتهم وأسلوب شغلهم واللي بدون نزاع تعتبر من أسوأ الخدمات يطوروا المبنى, ولو بيطوروه من جيوبهم يبقى ماشي ومش هفتح بقي لكن دول بيطوروه من جيوبنا احنا
كله كوم والخبر منشور في الأخبار والجمهورية (دول اللي قريتهم فيه) وبيقول انه هيبقى انجاز حضاري. وواضح ان الكلمة دي هي كلمة السر الجديدة بدل كتكوت. وطبعاً كلنا مش ناسيين الانجازات الحضارية الكبيرة اللي اتعملت في بلدنا زي توشكا وجراج رمسيس
يا ريت حد يبلغ الناس اللي عماله تعملنا انجازات حضارية ويقولهم ان الشعب غني عن الانجازات دي ونفسه يبقى فيه انجازات غذائيه وصحيه
معلش البوست ده دمه تقيل عن كل البوستات بتاعتي (قال يعني أصلاً أنا دمي خفيف) بس أنا هطق
8 comments:
بالظبط الناس دي عايزة قطع رقبتها، لأن كل واحد بيمسك بنك نتيجة انة نفذ المطلوب منة مش علشان الكفائة، والنتيجة: بلللوم، شغلتة علي المدفع، قصدي في البنك بلللوم. انارة المباني وتطوير الكفتة مش تطوير الخدمات.
يعنى حضرتك دمك اتحرق ...تحرق دمنا احنا كمان ؟؟
ايموشن وش بيشد فى شعره
:D
صراحة مش لاقيه كلام اقوله
الصمت فى بعض الاحيان يكون ابلغ من الكلام
وش بيخبط راسه فى الحيط
وجهة نظري
منور البلوج
بللللوم, المشكلة انهم مبيتصرفوش على الأساس ده
دول بيتصرفوا على انهم علماء الاقتصاد الأوائل في العالم
يلا ربنا يهدي
رضوى
ايموشن وش مبسوط D:
معلش منتوالازم تستحملوني أمال صحاب ازاي يعني
ولا هي الصحوبية دي ببلاش
كلامك كله واصل ومفهوم يا كميل حتى لو مقولتيهوش
منوره البلوج دايماً
السلام عليكم
معلش ياشقلوب يابنى هو ده حال الدنيا وحال البلد
مش عارفة الانجازات الكتير ديه مبتطلعش فى كل حاجة ليه بتطلع على حاجات معينة وبس
وكمان الحاجات اللى بتطلع عليها يارتها بتفيد باقي الناس
بتفيد طبقة معينة من الناس
البلد عاوزة تتظبط يابنى
وربنا يقدرنا
وربنا يصبرنا
سلاااام ياشقلوب
اهي هانت اهي معلش
ما فات الا 27 سنه ومبقاش الا القليل
محبتي يا شقلوب يا جيمل
عاشقة الوطن
سا ستي نوديها مركز صيانة محترم يظبطهالنا وياخد اللي هو عاوزه
وأنا مستعد أدفع من جنيه لعشرين جنيه
ربنا معانا
عبد الرحمن فارس
وأنا قول البلوج نور ليه مره واحده
الله أعلم
بيقولك بيسألوا أحد الملوك الشعب هيعمل ايه من بعدك
قالهم ليه؟ هو الشعب هيروح فين
ربنا كريم
Post a Comment