بما اني بدأت أكتب تاني في شهر فبراير, فممكن قبل ما أدخل في مشاكل الدنيا. والحكومة واللي بتعمله فينا, أتكلم شوية عن الحب واللي بيعمله في خلق الله
والحقيقة ان مش ده السبب بصراحة, السبب الرئيسي ان في واحد صاحبي, قريب مني جداً اليومين دول عايش قصة حب. ويعيني عليه مبتبهدل آخر بهدله وعلى رأي المثل الحب بهدله
ايه الحكاية ؟ ده فضول مش حميد على الاطلاق. يعني ليه عايزين تعرفوا حكاية واحد صاحبي بيحب. أهو بيحب وخلاص, ولا يعني علشان أتكلم عن موقف لازم أحكي الحكاية كلها من طأطأ لسلام عليكم
المهم الموقف اللي عايز أحكيه. وعلشان مطولش عليكوا (قولوا طول) كنت قاعد أنا وهو على القهوة امبارح في وسط البلد. وساعتين عمال يشكيلي ظلم الحياة وانه مكتئب وحالته كرب ومفيش فلوس والشغل زفت وكلية الهندسه رخمه وفجأه...لأ مشافهاش
جاله تليفون منها, طبعاً هو عاملها نغمة مخصوص غير عامة الشعب. ألاقي الواد اللي كان خمس دقايق وهيعيط جنبي, وشه ابتسم وعينيه لمعت وبقى مسبرنشق على الآخر.
يعني أنا أقعد أواسيه ساعتين مجيبش معاه نتيجه وهي بمكالمه تليفون دقيقه ونص تشقلب كيانه. يعني ده مش ظلم, أنا بصراحه صعبت عليا نفسي
تسألوني, وصعبت عليك نفسك ليه يا أبو الشقاليب؟ متخافوش مش هقول انتم مالكم, لأنكم المرادي بتسألوا عن صاحبكم مش عن واحد صاحبي
أصلي بعيد عنكم وعن السامعين حسيت اني مجهودي بيضيع على الفاضي, يعني كان أسهلي بدل ميقعد جنبي ساعتين يعيطلي, أتصل بيها وأخليها تكلمه وأبقى استريحت وريحته
السؤال اللي عايزله اجابه, هوالبتاع ده اللي اسمه الحب بيعمل كده فعلاً في خلق الله. واشمعنى أنا من دون خلق الله اللي مجربتش البتاع ده
طبعاً آخر جملة عرفتكم سبب النفسنه اللي أنا فيها. والرغي اللي عمال أصدع دماغكم بيه من أول البوست. ياه وأنا اللي فاكركم أصحابي وهتستحملوني
خلاص هسكت, مستني رأيكم بس محدش يطول ايده أنا بقول من دلوقت
10 comments:
مسبرنشق
الكلمه دي استوقفتنى جدا
معلش هخرج بره الموضوع خالص
لكن فعلا الكلمه دي استوقفتنى جدا جدا
كلمه غريبه اوى
اول مره اسمعها
دى جت منين دي ؟؟
:D
بخصوص مايسمي باللامور
هو بيبهدل فعلا
وبيعمل عمايل مش حلوة خالص
(وش بيخبط راسه فى الحيط)
اما عن سؤال حضرتك ليه حضرتك ماجربتش البتاع ده
اعتقد الاجابه عند حضرتك
:ker:
كل شئ بأوان
مش تستعجب حضرتك
يوم اما تلاقيها
وتعثر عليها
هيحصل لحضرتك نفس اللى حصل لصاحب حضرتك
بهدله وسهر وضغط عالى
ولما تقابل مشكله
اول ماتسمع رنتها بس
هتنسى المشكله كانت ايه من اساسه
:D
يا ستي مسبرنشق دي سمعتها من عمرو أديب في القاهرة اليوم, عجبتني قررت أستخدمها
أما بقى اني هجرب البتاع ده ويحصلي اللي بيحصل لصاحبي... مظنش
الناس مقامات برضه
واضح ان تركيبت دماغي مبتقلبش الحاجات دي
اه يا ابنى بيعمل اكتر من كده عارف بتحس انك فى عز البرد دفيان يعنى الواحد لو مش بيحب لو ولع فى البيت وهو بردان مش هيحس بالدفا انما البتاع ده بيعمل اكتر من كده يا رب تتكعبل فيه ان شاء الله
لا لا
مصيرها تقبل
:D
السلام عليكم
شقلوب رجع ياناس الحمدلله بعد غياب طووووويل
حمدلله على السلامة ياستاذ شقلوب وممنوع الغياب الا بإذن من المحكمة
وبعدين هو يمكن البتاع الى انت بتقول عله الحب فعلا بيخلي الواحد بقي ينسي ويفرح اول ما يسمع او يشوف حبيبه
وبعدين مستعجل على ايه
بكرة ياخويا تدوقه وتعرفه وتعرف هو ايه الحب
وادعيلنا عشان ندوقه احنا كمان
اشمعنى الناس التانية واحنا لأ
كل سنة وانت فى حب وصاحبك كمان
والناس كلها
متبقاش تتأخر تانى وتغيب وتقول عدولى احسن فيه عقاب رادع
مااااااااااشي
سلاااام
appy
في عز البرد دفيان؟ انتي أكيد بتهزري
وكمان بتدعي عليا يلا الله يسامحك
منورة البلوج
رضوى
مظنش تقبل, على فكرة أنا عدى 23 سنة من عمري منغير متقبل
تفتكري لسه فيه أمل
منورة البوج بتاعي عقبال مترجعي للبلوج بتاعك
عاشقة الوطن
هيييييييييييييييييييه
صدقيني أنا مستني انك تعملي تعليق عندي علشان أكتب البوست اللي جاي
زمكنتش هكتب حاجة تاني لو معلقتيش
وياريت محدش يزعل بس انتي الوحيدة فعلاً اللي سألتي عليا في غيابي
وانتي لسه مدوقتيهوش؟ غريبه
بس بجد بجد منورة الدنيا كلها
وخسران كتير..طبعاً عارفه مين
ومش هغيب تاني كده, طول ما أنتي بتقوليلي ده كويس وده وحش
نورتي
بين لحظه والتانيه هتلاقيها بتقبل
:D
ماليش نفس ارجع للبلوج بتاعى
اتخنقت من التدوييييييييييييييييييين
بس مصيري هلف الف وارجعله تانى
(وش بيخبط راسه فى الحيط)
هههههههههه عسل اوى التعليقات دى
الحب دع دع والهجر كخ كخ
بص يا بنى من واقع انى ماليش تجارب في البتاع ده فمش عارفه اقلك ايه ربنا يهديك ولا ايه
هوه في حد يابنى بيدور على المشاكل برجليه ؟
خليك حر طليق كده
بلا هم
مالها الوحدة ماهى كويسه هوه مفيش حد عاجبه حاله ليه
انا عن نفسي عاجبنى حالي كده جدا
كفاية اقرف الشغل
فراشة حرة طليقه
Post a Comment