يعني الواحد يغيبله أد قرن قرنين عن التدوين وييجي يرجع يلاقي حصل اللي حصل, ولا هما عرفوا ان شقلوب مبيكتبش فلاقوها فرصة وقالوا يستغلوها وأهو يضمنوا انه مش هيكتب تاني
بعد فاصل التواضع اللي فات ده أحب أعرفكم أنا كنت بتكلم عن ايه رغم ان انتوا أكيد عرفتم, طبعاُ بتكلم عن قانون البث الاعلامي أو قانون الفقي أو قانون سكسونيا 2008 المعدل
القانون ده يا ساده يا كرام بمنتهى البساطه هيفرض على كل واحد بيكتب على الانترنت أي حاجه, انه لازم ياخد رخصه من هيئة هتتعمل اسمها هيئة البث الاعلامي, وطبعاً علشان رخصة يبقى لازم رسوم وكوسة وقرع وبطيخ وتمضي على انك هتبقى مؤدب وبتسمع الكلام وطيب وأهبل وكده يعني. وتجيب ورقه من 2 موظفين دخلهم فوق ال50 جنيه تقول انك عمرك مشتمت ولا هتشتم ولا بتفكر تشتم الريس ولا الحكومه ولا هتقربلهم من قريب أو من بعيد
القانون ده عايزين يمرروه في مجلس الشعب, ولو اتمرر هتحول من مدون لمدون من غير رخصة, وهيتقبض عليا واتسجن سنتين ودي مقدور عليها, وغرامه خمسين ألف حنيه ودي بقى مش مقدور عليها خااااالص
على العموم, ولأني مش هسكت اتفقت مع عبدالرحمن فارس (لساني هو القلم) ومحمد عادل (مدونة ميت) علشان نعمل جروب على الفاس بوك وسميناه مدونين ضد قانون الفقي, عايزين كلنا ننضمله ونحاول نعمل حاجه يمكن نعرف نوقف القانون ده
ولينك الجروب
وبقول من دلوقت, أنا مدونتي مش مرخصة ومش هتترخص, ومش عايزها تترخص, مستنيكم
4 comments:
ياه انا اول تعليق
ياااااااااااااااااااااااااااااااااااااااااااااااااااااه ايه ده انا حاسه بفرحه جامده اوى
ثانيا
انت ومدونتك وكل حاجه عسليييييييييييييييييييييييييييييييييييه بجد بحب كتاباتك
السلام عليكم
ازيك ياشقلوب
ده يصح يعنى
تبقي مدون من غير رخصة
لالالا فوت علينات يامواطن بكرة او بعده وهات ورقة عليها ختم الدولة وامضاء اتينن موظفين واسحب الاول الطلب من الشباك اللى فى اخر دور وابقي تعالى واحنا ان كنا نوافق على لارخصة ولا لأ
بعد فاصل الهزار نتكلم جد بقي
انت عارف انا اول ما عرفت القانون والحاجات الجديدة ديه
متعرفش الواحد حس انه خلاص اتحكم عليه بالاعدام على الرغم اننا اصلا نعتبر ميتين من زماااااااااان
بالتكميم اللى بيعملوه
وبالخنقة اللى بيصدروها لينا
عارف احسن حاجة نعملها ايه
اننا كلنا نحتج
هو اى نعم الاحتجاج والاعتراض ده غالبا مبيأثرش بس اهوه نعمل اللى علينا
وبعدين ميت مرة اقولك متجيش من غير الرخصة يابنى
حاجة غريبة جدااا
سلااااام
مدرسة الفشله بنات
أخجلتم تواضعنا, بس لو ملاحظة مفيش طوابير على التعليقات علشان تفرحي بأول تعليق أوي كده
بس برضه منورة البلوج
بس مقلتيش انتي معانا ولا مع الناس التانيين
عاشقة الوطن
معلش يا ستي بس أعمل ايه؟
انتي عارفة اني خارج عن القانون أصلاً
ومطلوب القبض عليا في ييجي سبع تمن دول
فأكيد مش على آخر الزمن همشي برخصة
المهم أنا معرفش انتي ليكي أكونت على الفاس بوك ولا لأ
هتلاقي ميلي في البروفايل ياريت تبعتيلي عليه علشان نتكلم
سلام
Post a Comment