خلاص يا جماعة كل مشاكلنا اتحلت. معدش فيه عنوسه لا لشباب ولا لبنات. كل الشباب هيتجوزوا كل البنات وكله هيبقى تمام. ومدونة عايزة اتجوز هتتقفل علشان هتتجوز وكله هيحط لسانه جوه بقه
ليه كل ده؟ انتوا مش عارفين؟ بجد؟ فاتكم نص عمركم والباقي معرفش هتعملوا فيه ايه بس يدوبك تلحقوا تتجوزوا
عايزين تعرفوا الموضوع؟ وزير التضامن أعلن تخصيص 45 مليون جنيه لمساعدة الشباب على الزواج. واللي مش مصدق الخبر من على مصراوي
وعلشان محدش يتعب نفسه ويدور على مصراوي قام مركز خدمات شقلوب بتوفير لينك الخبر http://www.masrawy.com/News/Egypt/Politics/2008/march/25/youth.aspx
أنا بصراحة أول أما شفت العنوان أعدت أحسبها. احنا حوالي 80 مليون وأكتر وحوالي نص دول عايزين يتجوزوا ومش لاقيين الحكومه هتدعم نصهم (نص النص) يعني 20 مليون شاب وفتاة قول خليهم يتجوزوا منهم في بعضيهم يعني هيصفصفوا على عشرة مليون يعني نصيب الجوز أربعة جنيه ونص. مش بقول كل مشاكلنا اتحلت
قلت يا واد يا شقلوب شوف ايه الحكاية وأهي خدمة تقدمها لزوار المدونة بتاعتك. الاهما فين؟ المهم رحت على صفحة القروض بتاعة بنك ناصر وفتحت على قروض الزواج وبرضه يسعد مركز شقلوب للخدمات توفير اللينكhttp://www.nsb.gov.eg/NasserSocialBank/ar-EG/Social_Services/قرض+الزواج.htm
ومن الآخر نصيب الواحد مش هايزيد عن ألفين جنيه لو توافرت فيه كل الشروط. وبكده الدولة هتساهم في تزويج تسعون ألفاً من الشباب على الأقل. شفتوا الهنا اللي احنا فيه
ألفين جنيه؟ دول يجبوا ايه يا واد يا شقلوب؟ تصدقوا معرفش يجيبوا ايه. يعني الواحد يقدم طلب قرض ودمغات واثباتات انه مش لاقي ياكل (فاكرين بحث الحالة بتاع المدارس والجامعات) علشان في الآخر يدوله ألفين جنيه
آه عرفت الألفين جنيه يعملوا بيهم ايه. يدفعوا ايجار الشقة أول شهر والنور والميه والغاز والباقي يخرجوا بيه خروجة بمناسبة انهم في شهر العسل أو يجيبوا كيلو لحمة قبل ما ينسوها للأبد
سؤال أخير: هيا الحكومة دي بتحكم مصر ولا حتة تانيه؟
6 comments:
حتة تانية
وأنا أقول ايه النور اللي ملا البلوج فجأة
بثينة صاحبة أجمد طيارة ورق عندي
كده أموت وأنا ضميري مستريح
نورتي شقلوب
بجد هم يضحك وهم يبكى..اول مره ازورك بس مدونه والبوست حلو وجامد فعلا..بس غالبا الحكومه بتاعتنا بتفكرنى بمحمد صبحى لما كان عامل حاكم وهانى رمزى بيقوله الناس عمرها ماكانت مبسوطه قاله لا الناس طول عمرها مبسوطه بس انت الى مكنتش هنا هههههههه
حكومتنا بتحكم بلد وهميه فى الواق واق..الا هيا الواق واق فين دى؟ بس مهما كانت اكيد حالهم متدهورش لدرجة انهم مش لاقيين العيش..
ياريت تنورنى بالزياره
الشموع السوداء
شكلك تقصدي ان الحكومة هي اللي مكانتش هنا
الواق الواق دي كانت بلاد في ألف ليلة وليلة وكانت بلد اللي يروح ميرجعش, بس متقلقيش قريب هنوصلها كلنا, يمكن نلاقي هناك عيش
نورتي البلوج
ههههههههههههههههههههههه
هنتجوز اه
هههههههههههههه
معلش بس قلبت معايا بضحك هستيري
السلام عليكم
ايه ياعم شقلوب مش عاجبك الألفين جنيه و لا ايه
على فكرة احنا دايما بنرفض النعمة
وعلى فككرة برضه الحكومة ديه بتحكم حد تانى غير الشعب المصري
وده اكيد
تحياتى
Post a Comment