عاملين ايه يا حلوين؟ وايه أخبار البلد على حسكم؟ ايه مالكم وشكم أصفر ليه؟ مش الحمدالله كل شيء تمام, والحياه حلوه ولونها نيلي (من النيل مش من النيله) وكل على سنجة عشره. والأمن مستتب والدليل مجلس الشورى اللي ولع سيبكم من كل الكلام الفاضي ده, أنا جاي أقولكم حوار دار بيني وبين صديقه على النت, كنا بنتكلم وبعد السلامات والتحيات وأخبارك ايه والكلام ده كله. انتقل الحوار لأن أنا بقولها أنا نفسي في اللي اتجوزها انها تفهمني وأفهمها وأعرف أكلمها وأقنعها أو تقنعني وكده يعني لقيتها بتقولي: هي: ده لو انت شاطر تقدر تتكلم انت هتسمع بس من اول ما هتدخل العيال عملوا ابنك مبيذاكرش دول بيضربوا بعض واختك عملت فيا ومش عارف مين جابت كذا وانا عايزه اغير كذا وبعد ده كله هتقولك انت على طول مشغول بالشغل ومفيش حاجه بتعملها وسايبنى بالعيال وانت شايف نفسك ما هو طبعا اصلى الجاريه اللى اشتريتها مفيش حمد ولا شكرانيه انتو كده يارجاله تاخدونا لحم وترمونا عضم وهى اصلا تكون جايالك 50 كيلو وتلاقيها بقت 90وتقولك اخدتنى لحم ورمتنى عضم لو قولتلها انا يعنى عشان مبقولش كلام حلو زى زمان يبقى خلاص مشغول بالشغل هتقولك امال يعنى هيكون ليه هتقولها طيب ياستى متخافيش انا زى زمان وكل حاجه بس انتى اللى مش فاضيه هتقولك اه الحجه بقيت انا اللى مش فاضيه طب خلاص هبقى افضى ولو فضيت وجيت كلمتها هتقولك عامل انهى عامله سوده وبتقول المقدمات دى عشان تغطى عليها قول انطق أنا: هقولها والله يا ستي مفيش حاجه هي: ولا هتصدقك وهتمسك موبايلك تفتشه وايميلك لو ليها فى التطور وهتبدا تفتحه وتكتب باسمك عشان توقعك وهتنتبهلك عارف المشكله فين؟ أنا: فين؟ هي: هقولك ان الست اوقات بتحتاج تسمع كلام حلو عشان تكمل الحياه الممله اللى هى فيها الراجل وقتها بيكون مش فاضى ومشغول فى الطاحونه عشان يجيب فلوس أنا: عادي بتحصل هي: ما هو لما ده بيحصل الست خلاص بتحس انها بتعمل كل ده كانها مكنه مش لانها بتحب تعمله عشان الانسان اللى معاها لا لانه واجب وبتعمله, ومعندهاش اجازه منه ولا تقدر تقول فى يوم انا مش هعمل ده انا زهقت أنا: طيب, هو الراجل عليه تقصير مش هنكره بس هي برضه مش المفروض فاهمه ده هي: فهماه بس ليه البخل فى المشاعر؟ هى مبتخدش مرتب من شغلها ده ولا زى الراجل لو ملهوش مزاج فى يوم هياخد اجازه هى لا لازم يبقى فى الحافز أنا: زي ما قلتلك أنا مش بنكر تقصير الراجل وبعدين انتي بتقولي أهو, لو جه يكلمها هتفتحله محضر يعني لو جه يصلح غلطه, هيتنفخ هي: لانه مش معودها على كده اصلا وفجأه جه يعملها هتحس انه زى ابنها اللى لما يجيب درجه وحشه وعشان يخفف عنها يعملها مقدمات ما هو ده نوع التفكير اللى هى بتتعامل معاه لان خلاص جوزها يدوب بتحطله الاكل وينام ده تعامله معاها أنا: المفروض ان يبقى في تعاملات تانيه بس مش دي قضيتنا لكن اللي بقوله تخيلي لو فيه حد سمع كلامك دلوقتي, وعايز يصلح غلطه وبيتدي يحفز مراته, يعمل ايه؟ هي: اولا لما يلاقيها بتعمل حاجه يساعدها دى بدايه وهو بيساعدها تبقى فرصه يتكلموا سوا مش يساعدها يعنى يرفعلها رجله عشان تكنس تحتها وتبقى هى دى المساعده أنا: أنا فاهم قصدك بس تخيلي معايا السيناريو ده خلصوا الأكل وبعدين هي بتشيل الأطباق, قام يشيل معاها هتقوله: بتعمل ايه يا راجل مش بعاده هيقولها: حسيت انتي بتتعبي أد ايه فقلت أساعدك يا روحي ساعتها طبعاً نص فيران الكورة الأرضيه هتلعب في عبه وممكن ينافسوا عدد اللعيبه في دورة بكين غالباً هتنظرله شزراً نظره مليانه شك وتسكت هي: لا هقولك ما هو مش كله مره واحده ممكن لما يقوم يشيل, وتقوله مش بعاده يقولها عادى, انا كده كده اجازه النهارده فقولت اعمل معاكى حاجه بلاش من اولها ياروحى والحاجات الجامده دى بقالها كتير مسمعتهاش أنا: الطبيعي اليومين دول ان مفيش أجازات عند حد فيقول ايه؟ الراجل يا عيني مسحول في الشغل طول النهار وهييجي على نفسه ويقوم يساعدها, علشان لما يقولها يا حبيبتي بعد اسبوع. متشكش فيه يعمل ايه؟ حلي المشكله دي؟ هي: دى ولا مسئله التكامل "أصلها خريجة تربيه رياضيات معلش" هقولك يشيل معاها ويقولها اصلى كنت عايزه اكمل الموضوع اللى بتقوليه لانها اكيد مسكتتش ولا لحظه, والست تحب اوى اللى يسمعها وتحس انه مركز فى اللى بتقوله مش قاعد يتفرج على الماتش أنا: هي فكره حلوه بس انتي مش شايفه ان فيها تحامل على الراجل يعني مش كمان يقوم يساعد لأ ويكمل الموضوع اللي هو قطعاً عنده استعداد يقطع دراعه ويخليها تسكت لمده ثانيه هي: لو مديرك فى الشغل وبيتكلم وبيقولك انه امبارح شاف كائن فضائى وسلم عليه هتسمعه ولا هتقوم وتسيبه مستكتر على مراتك انك تسمعها أنا: أنا شخصياً ممكن أتريق عليه وانتي عارفه, بس, في الطبيعي أو المنطقي المفروض أسمعه علشان أنا ورايا بيت وأسرة, لو مسمعتوش ممكن يضايقني وممكن ده يأثر على الفلوس اللي أنا محتاجها علشان أصرف عليهم يمكن أنا كده دلوقت علشان مفيش عندي التزام هي: بالضبط بردوا مراتك لو مسمعتهاش وريحتها بيتك هيبقى مش مظبوط واحده بتعمل الاكل, وخلاص لكن مفيش روح فى اى حاجه أنا: يا ستي, ما هو كله بالعقل حلو برضه يعني هي ليه متقدرش انه بيبقى جاي من الشغل مضطر يسمع مديره علشان ميرفدوش ومضطر يسمع زمايله علشان ميتخانقش معاهم هي: اقولك حاجه وهتصدقها أنا: قولي هي: عارف الست ليه تتكلم وبتعمل كل ده أنا: ليه؟ هي: بتبقى طول اليوم مطحونه فى البيت مع الاولاد وبتقعد تعد الساعات اللى هيجى فيها جوزها اللى بتحبه "طبعاً مفترض في كلامنا ان الجوازه عن حب أو على الأقل اقتناع, مش تخليص حق" عشان تقعد معاه, ويتكلموا لما تلاقيه جى, ومش عايز يسمعها بتحبط, بتحس انه بقى بعيد عنها وكل يوم بيزيد البعد ده لحد ما يبقى فعلا كل واحد فيهم فى وادى أنا:أنا متفق معاكي بس ليه ميكونش الكلام بالعقل يعني تصبر همسه يكون استريح من شغله, وأكل شرب الشاي حاجه كده لكن دي غالباً بتاخده وش من ساعة أما يدخل البيت لحد أما يتخمد هي: دى حاجه فى ايد الراجل انه يبقى معودها ان مثلا اه هنتكلم وهنعمل اللى انتى عايزاه امتى بقى بايده هو يعنى ميجيش ياكل, ويدخل ينام شويه ويقولها قومينى لما يجى الماتش يتفرج على الماتش والتعليق ويشوف كل قناه بتقول ايه وبعد ده كله يقوم ينام ولو اتكلمت يقولها عندى شغل بدرى. يعنى اعمل ايه؟ أنا: بس تفتكري الست ممكن تعمل ده يعني تصبر عليه لحد أما ياخد نفسه هي: اه هتصبر طالما عارفه انه هيقوم هيبقى ليها هى بس, مش لماتش الكوره ولا حد من صحابه اتصل بيه, وهيقضوا سهره سوا وهى يسيبها ملطوعه أنا: ما هو برضه الراجل بيحب يخرجله خروجه مع اصحابه مش تبقى مراته أو أمه أو أعوذ بالله حماته يعني, الراجل بيبقى متعود على أعدة الأصحاب أنا متفق معاكي بس اللي بقوله يبقى برضه عنده فرصه ولو يومين في الأسبوع يقعد مع أصحابه هي:هقولك حاجه انت برضوا هترضى تقعد بالعيال يوم او اتنين وهى تخرج مع صحباتها وكل واحد يخرج مع اصحابه ومش مهم جوزه ولا عياله "طبعاً أنا هنا وشي جاب ألوان وقعدت بتاع دقيقة مش عارف أقول ايه" أنا: مش كده بس فيه حلول ظريفه نسبياً من نوعية مثلاً هي تقابل صحباتها في البيت وهو ينزل يقابل صحابه أو تروح تقعد مع مامتها مثلاُ وهو مروح ياخدها هي: حلوه اوى, لا طبعا مش هينفع أنا: ليه بس؟ هي: كده انت خرجت واتفسحت مع اصحابك وشوفت اماكن جديده, ليه هى لا؟ طالما انت مخرجتهاش خلاص هى تخرج أنا: أولاً انت فهماني غلط أنا بتكلم وأنا عارف العقليه المصريه وبتكلم عن الراجل المصري اللي خروجته هتبقى يا ع القهوة يا فشقة واحد عازب في الشلة هي: وانا برفض ده لانك هتتكلم مع صحابك عن ايه هتقولهم مراتك عامله ومسويه أنا: أنا شخصياً مظنش اني هعمل كده بس ممكن أتكلم عن حماتي وانها مجنناني ممكن أشتم في مديري في الشغل كويس أو أتكلم عن الكورة "هي طبعاً كانت اعترضت على الجزء بتاع حماتي مجنناني بس عموماً هي معترضتش على الاتنين التانيين" هي: مفيش مشكله بس كل الوقت ده بيتك اولى بيه اولادك اقعد زاكرلهم خفف عنها شويه أنا: أنا مش معترض بس تخيلي, كل واحد قعد في بيتهم محدش هيعرف حد بعد الجواز مفيش أصحاب هي: المفروض كل واحد منهم يكون اتجوز ووقته لبيته أنا: منا بقولك, مفيش أصحاب هي: هيكون احسن, في أهل أنا: كده المجتمع تحول لشوية أسر ملهاش علاقة ببعض تقريباً الا شوية زكريات هي: صدقنى الاصحاب فى اوقات كتير بيخربوا بيوت وده حصل قصادى اكتر من مره أنا: بصي, ده بقى أنا ضده مينفعش ناخد الغلط ونعممه هي: بص الخلاصه فى الموضع انى واحده من البنات اللى بكره البخل ومش البخل اللى فى الفلوس اقصد البخل فى المشاعر وده فى الاخر بيخلى الستات تتفرج على حسين فهمى, وعلى مهند ده ومتسيبش ولا حلقه ده عمليه تعويضيه لكن لو جوزها بيديها اللى محتجاه مش هتبصله, ولا هتعبره اصلا "طبعاً انتوا مستغربين ايه دخل مهند في الموضوع, أصل أنا كنت بشتكيلها ان البنات اللي معايا في الشغل بيقعدوا يتكلموا عن مهند بتاع مسلسل نور طول النهار وان أنا بتضايق من الموضوع ده, ووالله مش حقد ولا غيره" أنا: أنا مش معترض بس اللي بقوله انها لازم تفهم ان الراجل برضه عنده احتياج أنه يكون ليه أصحاب بيشوفهم ويتكلم معاهم هي أهم, أكتر منهم بكتييير بس برضه هو بيحتاجهم فهماني؟ "يلا علشان اصحابي يعرفوا هما غاليين عليا أد ايه, يلا على الله يطمر فيهم (هو يعني ايه يطمر؟)" هي:اه بس انا شخصيا لو جوزى سابنى وراح لاصحابه هزعل منه جدا أنا: طيب ليه تزعلي, وانتي عارفه انه بيحتاج ده؟ ممكن تحاولي توصلي معاه لحل وسط حاجه تكوني بتحبي تعمليها, تعمليها في الوقت ده لو بتحبي تزوري مامتك أو حد من قرايبك حاجه كده هي: وهو ميجيش معايا يزورها ليه ولا هيسبنى اروح لوحدى وارجع لوحدى أنا: شفتي احنا بنتكلم في ايه, وانتي نقلتينا لايه أنا بتكلم, في ان الست زي ما بتحتاج الكلمه الحلوه وان الراجل يسمعها هو كمان بيحب يكون عنده مساحة حركه يقابل صحابه, يقعد ع القهوة معاهم "ده مجرد مثال مش عايزين رخامه أنا بقول من دلوقت" انتي كده بتحولي محاولتي اني أدرو معاكي ع الوضع اللي ميخنقش الست لأني بحاول أنقذ الراجل من وضع يخنقه هي: يبقى خلاص فعلا هو لو اداها اللى هى محتاجاه ولو قالها انزل هتقوله انزل مع انى من جوايا مش هقدر اخليه ينزل وممكن ااثر عليه ويقعد أنا: لو عرفتي تخليه يقعد وهو موافق على كده أوكيه بس متحسسوش انه أجرم في حقها هي: انا بحس ان تملى الموضوع ده محدش بيتكلم فيه منهم بصراحه مع بعض أنا: ده حقيقي ودي المشكله الحقيقة في الجواز ان مفيش صراحه هي: بالضبط ومحدش بيقول للتانى على اللى بيزعله منه ولو ده حصل بيفتكر التانى انه بيهاجمه أنا: لو كل واحد قال للتاني من الأول هو بيحب ايه ومبيحبش ايه والتاني برضه عمل كده وقعدوا مع بعض, وششافوا كل واحد فيهم ايه التنازلات اللي ممكن يقدمها للتاني نص مشاكل الجواز هتتحل, من وجهة نظري هي: ده كلها ما انا بقولك محدش بيحب يسمع انه غلطان ولو سمعها, بيدافع عن نفسه وطالما بقيت بتدافع معناها ان اللى قصادك عدوك وهو اصلا مش عدوك ولو اقنعته متبقاش كسبت أنا: أنا مش بتكلم في وضع غلطان ولا مش غلطان أنا بتكلم قبل الجواز, يقعدوا مع بعض الراجل: أنا بحب المحشي الست: أنا مبحبش أعمل المحشي, هدت حيل ع الفاضي ويقعدوا يتناقشوا لو اتفقوا, كان بها ممكن الاتفاق ده انه يتنازل عن أكل المحشي أو هي توافق تعمله وده مش في الأكل بس, ده في كل حاجه الصغيرة قبل الكبيرة وبصراحه اتفقوا يبقى كده تمام متفقوش يبقى خلاص., بيس يا جماعه كل واحد قاعد في بيت مامته هي: عارف المشكله هنا ان الواحده بتقول اه تقول لنفسها لو مشى هجيب غيره منين فترضى على مضض أنا: يبقى تشربه بقى هي: وكل حاجه اه وطيب واول ما تتجوز تمشى اللى فى دماغها وهو اللى هيشرب مش هى أنا:كنت لسه هقولها هو حقيقة هما الاتنين بيشربو بس ده غلط كبيييييييييييييييييييييييير هي: عشان كده دلوقتى بتسمع عن اللى بيطلقوا اكتر من اللى بيتجوزوا أنا: ما دام اللي انتي بتقوليه ده بيحصل فده نتيجه حتميه هي: تعرف انا طول عمرى بسمى فتره الخطوبه فتره القرع الاتنين بيقرعوا على بعض أنا: والله عندك حق اذا مكانش الناس تبقى صرحه في الجواز, هتبقى صرحه في ايه؟ هي: والمشكله ان بعد عشر سنين جواز تسمع انهم فى الخطوبه عمرهم ما اتفقوا طب اتنيلتوا اتجوزتوا ليه وانتو كنتوا مستحملين بعض ليه وقت الخطوبه ودلوقتى بعد ما جه عيال خلاص محدش بقى طايق حد كله كذب, وغش ومحدش بيقول الصراحه أنا: يلا ربنا يهدي هي: آمين لحد هنا والحوار اللي بيني وبينها في الموضوع ده خلص, عايز أعرف بقى, ايه الحل؟ يعني احنا مش مكفينا كل المشاكل المادية والعراقيل اللي بتواجهنا علشان نعرف نتنيل على عنينا ونتجوز, والكلام ده للولاد أو البنات على حد سواء, لأ وكمان بنقعد نلف وندور حوالين بعض ده طبعاً أطول بوست أنا كتبته, ويمكن أطول بوست في التاريخ وممكن أدخل بيه موسوعة كينيز للأرقام المهلبيه ومش محتاج طبعاً أقول ان أنا كل اللي عملته في البوست ده عباره عن تقويم للكلام اللي كان بيتقال لأن أكيد مكانش ده منظر الكلام على الماسينجر. وبرضه مش محتاج أقول ان رأيكم يهمني في الموضوع ده خصوصاً
ملحوظه: اللي استحمل يكمل قراءه الحوار للآخر من أول مره, يسيب اسمه في التعليقات, لأن ليه جايزه عندي لأنه صبور وعنده قدره عاليه على الاحتمال
قال جواز قال
Wednesday, August 20, 2008 by Sha2loob
Subscribe to:
Post Comments (Atom)
7 comments:
hi hassan 2ana zein 2ana kamelt el mawdo3 lel 2a5er.
we 2adek wasalt lel natega beta3ti bardo en el gawaz 3andana fe mogtama3na da mashro3 fashel fashel. mesh 2oltelak enak gayli gayli ;)
الله يعمر بيتك يا حماده
بص انت عارف رأيي في موضوع الفشل والنجاح ده ومش هعيده تاني علشان متخنقنيش
اشطه
مرسي على التعليق,
وليك عندي هديه أول الشهر
انا مش عارفة المفروض ارد عليك اقولك ايه يا شقلوب الموضوع وما فيه ان لو حاولوا يفرشوا ورق ف البداية قبل اي مشاعر اي موضوع ف الدنيا مش هيكمل لسبب بسيط ان مش فيه اي اتنين متركبين على بعض بالسنتيمتر يعني فيقولها انا بحب المحشي هتقوله مش بحب اعمله وما فيش مشاعر هيقولها فرصة سعيدة وهتقوله انا اسعد ودمتم لكن لو الموضوع فيه مشاعر فهيقدموا تنازلات عشان كل واحد فيهم عايز الموضوع يكمل لأنه اختار وحب ومش معنى ان حصل اتفاق على تنازل طرف عن مطلبه ان ده هيحصل ف الحياة العملية بعد الجواز يعني لو قالت انهاعندها استعداد انها تعمل محشي عشان هو بيحبه بعد كدة مش هتعمله كل ما كان عايز ياكله ولو عملته هتعتبرها جميلة وهتستنى انه يردها ف حاجة تانية من اتفاقاتهم اللي كان فيها تنازلات وكل واحد فيهم هيقضيها تراكمات انا شايفة ان كل واحد يتنازل مرة ومن غير اتفاق اريح كثير مرة عليك مرة عليا
سايساف
أكيد أنامقصدش ان ده الحل الناجع للمشكله والا مكنتش سألت عن حل
بس عموماً, أنا شايف ان الموضوع بيكون لأن الجواز في البلد دي يا بيبى قلب بس من غير عقل, يا عقل بس من غير قب وفي الآخر الموضوع بيتقلب على دماغهم ودماغ عيالهم لو ربنا أكرمهم
ومكنتش أقصد انهم هيعملوا اتفاقيه هتتنفذ بحذافيرها, بس على الأقل هيبقى عارف الطرف التاني بيحب ايه ومبيحبش ايه بشكل واضح وصريح. ولو هو صادق مع نفسه بجد, هيبقى عارف اذا كان عنده اقدره انه يتأقلم مع الوضع ده ولا لأ, هيقدر يكمل, مش هيقدر يبقى ميكملش
الفكره, ان تبقى فيه صراااااااحه مع وجود الحب
صعبه دي؟
انا قريت البوست كله
فين الجايزة :D
>>>>>>
بص بقى
لو فى حب بين الاتنين
هي هتعمله المحشي اللى هو عاوزة وهتعمله وهى سعيده جدا
ده مثلا يعنى
لكن اجمالا
فعلا فعلا
لو فى حب وود وتافهم بين الطرفين
هتلاقي كل واحد بيقدم تنازلات وهو راضي كل الرضى
ممكن مثلا حكاية الخروج مع الصحاب
هو عاوز يخرج مع صحابه وهتروح هى لمامتها
يبقى مره مع اصحابه
ومره معاها عن مامتها
ومره هو وهى مع بعض فى اى مكان
لا مع الصحاب ولا عند حماته
الامور بالمسايسه بتمشي
وبالتفاهم والحب كله هيعدي
واهى شئ ان كل واحد يتقى الله فى الاخر
عارف
لو هو مثلا فكر وقال لو سبتها تروح لمامتها لوحدها هتزعل ...لا هروح معاها
وهى نفس الحكايه
لو جه معايا عند ماما مش هيبقى مبسوط زى ماهينبسط مع صحابه ..لا يبقى يروح لاصحابه طالما هيبقى مبسوط
هتلاقيه هو عاوز يرضيها
وهى عاوزة ترضيه
وفى الاخر يقعدوا هما الاتنين فى البيت :ker:
اللى قصدته من المثل ده
انه كل واحد هيحب راحة التاني
حتى لو على حسابه
وهتلاقى الطرفين كل واحد بيعمل ده
هيجو مثلا فى مره
هو راح معاها عند مامتها
هتلاقى المره التانيه هي بتقول بينها وبين نفسها لا ده هو مارضيش يزعلنى المره اللى فاتت ..خلاص هقعد انا فى البيت النهارده واسيبه ينزل لاصحابه
والعكس طبعا
هتلاقي هو بيقول نفس الجملتين بس بالعكس
فى الاخر المهم يكون فى بين الطرفين حب وود وتفاهم
حتى فى مسألة مذاكره الاطفال
ايه المشكله لما هو مره يذاركلهم بدالها؟؟
ايه المشكله لما يجوا خارجين مره يقولها لا هلبس انا الاطفال النهارده ؟؟
عارف اللفتات دي بتبقى جميله اوى من الزوج بالرغم انه حاجه بسيطه
لكن بتأثر فى الزوجه جدا وبتشيلهاله طول عمرها
معذرة على الاطاله
فى عندي كلام كتير فى الموضوع ده
بس كفايه عليك كده
دمت بود..
رضوى
ليه كفاية عليا كده, انتي بخيله ولا ايه؟
المشكله الحقيقيه ان ضغوط الحياه بتنسي الواحد حتى الحاجات اللي بيحبها
رأيي الشخصي تلخيصه
الجواز ممكن يعيش من غير حب, بس مش ممكن يعيش من غير صدق
نفسي أنابقى في الاتنين,حب....وصدق
اااه يا أخي
بص يا سيدي
المشكله دي مؤرقاني جداااا
خاصه الجزء الأخير اللي بتتكلم فيه عن التصارح والتناغم اللي ممكن يحصل لو الاتنين (واخدلي بالك من كلمة الاتنين دي) اتفقوا من الاول بدون اي ضغط علي شوية تنازلات وتظبيطات في حياتهم عشان مش يخسروا بعض
انا عن نفسي
جوزي عايز يروح لصحابه يروح
ياخد مساحته طبعا
بس مايبقاش ده الاساس
لا
بيته وولاده ومراته هما الاساس واصحابه ثانويات
مايبقاش مثلا ابنه عيان ويقولي اصلي مواعد صحابي ع القهوة
اتصرفي
ساعتها اولع فيه وفي ابني وفي نفسي
يساعدني؟
مممم
اتمنى بس مايساعدنيش قوي يعني
مالاقيهوش كل شوية في المطبخ
يعني يتبرع مرة ويعمل الفطار
ماشي
انما مش كل يوم
الكلام الحلو بقى
لو بطله
انا همل وهخلي عيشته بلاااااك
دي الحاجه الوحيده اللي بتخلي الست تستحمل الهم
هو احنا يعني عايزين ايه غير كلمة حنينة
البوست بتاعك حلو
تحياتي لصديقتك
Post a Comment