كل مرة أختفي فترة, وبعدين أرجع أعتذر, فللتغيير ولمجرد التغيير مش هعتذر المرادي, ما كده كده هرجع وأختفي تاني هعمل ايه يعني في طبيعتي الشقلوبية.
المهم, أنا هكتب في ايه؟ هتكتب في ايه يا شقلوب, هتكتب في ايه يا واد يا شقشق؟ هتدوش دماغات الناس بايه؟ آه موضوع هجرة الشباب, كل العالم اتكلم فيه اشمعنى أنا يعني, ده أنا حتى من الشباب, يعني المفروش ان أنا حاسس بالمشكلة والكلام الحمصي ده.
المهمز, كل الناس اللي اتكلمت قالت ان الشباب بتهاجر علشان مفيش شغل, ولا فلوس (وهتيجي منين ومفيش شغل), مفيش جواز, الأسعار عماله تطلع في العالي والأكادة الحكومة الذكية ناوية تشيل الدعم, وبالتالي معظم الناس قررت تحط ديلها في سنانها ويا فكيك على أول بلد, شرعي مش شرعي متفرقش, معايا الكام ألف اللي هسافر بيهم ولا هستلفهم ولا حتى هبيع كل اللي حيلتي وأسافر مش فارقة. ما هو كده كده الواحد مش ناوي يرجع.
طيب الناس اللي بتسافر شرعي وعرفينها وكلنا بنقدرها أهي عرفت تلاقي فرصة للعمل في النور, ورايحة عارفة هي عايزة تعمل ايه, وعارفة هي مسافرة ليه. مشكلتنا كلنا الهجرة غير الشرعية ده الكلام اللي عمالين نسمعه بقالنا شهر, اللي عاوز يهاجر يهاجر شرعي, لأن الهجرة الغير شرعية وحشة وعيب وحرلم واللي يسافر مش شرعي ويموت مش هيورد على جنة ولا على نار لحد أما يشوفوا بلده ويودوه السفارة بتاعتها.
أنا بقى بما إني شقلوب وحصلتلي حادثة وأنا صغير غيرت تركيب نافوخي فمش عجباني فكرة الهجرة أصلاً, ممكن الواحد يسافر سنة, اتنين أو حتى عشرة ولا عشرين لكن انه يسافر وهو مش عايز يرجع دي بقه المصيبة الكبيرة.
ليه مصيبة؟ لأن الناس اللي هتكبر في بلاد برة (حلوة بلاد برة دي) وهتعمل حاجات تنهض في البلاد الي هما فيها مش هيرجعوا, ومعنى كده ان الدول المتحضرة هتفضل متحضرة واحنا هنرجع للخلف أكتر.
يعني ايه؟ يعني اذا ما كانش شباب النهاردة هو اللي هيصلح البلد, مين اللي هيصلحها؟
السؤال ده ينقلنا لنقطة تانية, لو الواحد مننا قدراته ومؤهلاته متخليهوش يحقق أحلامه, ليه ميحاولش يطور نفسه؟ بدل ما يقعد مستني تجيله الشغله اللي بيحلم بيها, يحدد هو عايز يشتغل في ايه, ويشوف هو محتاج يبقى ايه علشان يشتغلها ويحاول يطور نفسه. على الأقل لو عمل كده وفشل جوة نتيجة الفساد مثلاً, برة يلاقي لنفسه مكان محترم.
لكن اللي أنا حاسس بيه, من معارفي وأصحابي, ان كل واحد فيهم عايز يهاجر وخلاص, وكأن الهجرة أصبحت هدف في حد ذاتها, رغم انها المفروض وسيلة لتحقيق طموحاتي مش تبقي هي كل طموحاتي.
المهمز, واللي أنا عايز أقوله, البلد دي مش هتتصلح غير بينا, وعشان نقدر نصلحها مش لازم نستنى الفرصة, لان احنا اللي بنعمل الفرصة
لكن أقعد واستنى الفرصة يمكن تيجي؟ يمكن!!!!!!!
8 comments:
هيه اول تعليق عايز جايزه بقى :)
يمكن تيجى الفرصه .......يمكن !!!!!!!!!!
وسلاااااااااااااااام
السلام عليكم
ازيك ياشقلوب
اين انت ياشقلوب
يمكن
يمكن تكون مشغولوالدنيا وخداك من المدونة
ربنا معاك ويوفقك
كل سنة انت طيب وبخير دايما
السلام عليكم
ازيك ياشقلوب انت فين يابنى
مختفي عشان الامتحانات ولا ايه
ربنا يعينك ومعاك
يعنى مش معقول ياشقلوب كل شوية هاجى ادورعليك انت روحت فين يابنى
كل ديه غيبه
والله يا شقشق يا خويا انت عين العقل لو الناس بس تبطل تقول الحكومه وتتصلح هى الاول وبعدين البلد حالها هيتصلح كانت الدنيا اتعدلت الله ينور عليك ويكملك بعقلك يا ريت الحادثه اللى حصلت لك تحصل لكل الناس علشان نافخوهم يتظبط
واللى بيعمل هجرة غير شرعيه بيدفع قد ايه طيب ما تستثمرهم هنا
fnan_geology
معلش الرد متأخر شوية
بس مين عارف
يمكن
عاشقة الوطن
أنا فعلاً متشكر جداً
انت متتخيليش تعليقاتك دي فرقت معايا أد ايه
يا رب متزعليش مني
appy
ليه بس تدعي على الناس
طيب دي الحادثة دي خلتني شقلوب, كفايه شقلوب واحد في الدنيا
نورتي
Post a Comment