Shaقلوب

شكراً يا ريس

2008-08-26T05:39:00.001-07:00

ما هو أنا لما أبقى شقلوب وراضي بحالي, ولامم نفسي بقالي فترة وساكت وعامل عبيط, ماشي تعدي, وأديني واحد من ضمن القطيع

نروح بكين, نرجع بخفي حنين, وميدالية برونزية, ماشي. مش الرياضة اللي هنفلح فيها يعني.

السودان تطرقعلنا أربعة صفر (الموضوع ده غايظني جداً, يمكن أكتر من بكين) وقلنا معلش, أهي الهدايا برضه كانت عامله مفعول, واللعيبة كانت سرحانه بتفكر هتروح فين بالعربيات الجديدة.

مجلس الشورى ولع, دي لوحدها كارثه, أما أنه يفضل مولع تسع ساعات دي بقى لسه مخترعولهاش اسم

كل اللي فات ده ومش عايزأعلق, علشان محدش يقول شمتان في البلد

لكن بجد اللي خنقني وخلاني مش عارف أنا شقلوب ولا معدول التصريحات ومن مين؟ من الريس شخصياً

بعد حربق مجلس الشورى, قريت الخبر الرئيسي في أول صفحة في الأخبار (مش فاكر تاني يوم الحريقة ولا اليوم اللي بعده, جالي زهايمر من اللي بيحصلي) أن الرئيس يأمر باصلاح الخسائر على نفقة الدولة

هنا بقى أنا مفهمتش حاجه

يعني ايه؟

هو لو مجلس الشورى متصلحش على نفقة الدولة, مين اللي هيدفع النفقة؟ أكيد اللي طلق لازم هو اللي يدفع النفقه

المهم, عصرت على نفسي ييجي كده غيطين لمون بنزهير وسكت

ألاقيلكم خبر النهارده في الأخبار, وبرضه صفحة أولى, الرئيس يأمر بتكوين لجنة لبحث أسباب تراجع نتائج مصر في بكين, ومعاقبة المسئولين

أنا هنا بقى جالي شياط في نفوخي ومش عارف بجد ينفع ايه يتقال وايه ميتقالش

يعني, فيه حكومة, برئيس وزراء بوزرائه اللي يسدوا عين الشمس

فيه مجلس قومي للرياضة, وليه رئيس وفيه كمية موظفين ولجان يسدوا العين التانية للشمس

كل دول ملهومش دعوة. والريس هو اللي لازم يقول

دى أنا لما بتعامل مع شركة كبيرة (مصرية كمان مش شركة انترناشونال), وعايز أتكلم مع رئيس مجلس الادارة, مبيقدرش ياخد قرار الا لما يرجع للموظف المختص

ولو اضطر ياخد قرار من صلاحيات الموظف ده, معنى كده ان الموظف ده أخذله كام يوم خصم على أقل تقدير

معنى كده ان بلدنا محصلتش حتى شركة

طيب أنا هقترح اقتراح

احنا نشيل مجلس الوزراء, بمجلس الشعب, بمجلس الشورى, والريس يعينله هيئة استشارية من كام واحد, وهو اللي ياخد القرار على طول, والقرار اللي محتاج متابعة, تتعمله لجنة تتابعه

وأهي اللجان تبقى تبع العمالة المؤقته, ونبقى بكده وفرنا في ميزانية الدوله

ومعلش يا ريس تعبينك معانا, بس نعمل ايه؟ واضح ان مفيش في البلد دي حد عنده القدرة انه ياخد قرار غير حضرتك

وشكراً ياريس

قال جواز قال

2008-08-20T06:06:00.001-07:00

عاملين ايه يا حلوين؟ وايه أخبار البلد على حسكم؟

ايه مالكم وشكم أصفر ليه؟ مش الحمدالله كل شيء تمام, والحياه حلوه ولونها نيلي (من النيل مش من النيله) وكل على سنجة عشره. والأمن مستتب والدليل مجلس الشورى اللي ولع

سيبكم من كل الكلام الفاضي ده, أنا جاي أقولكم حوار دار بيني وبين صديقه على النت, كنا بنتكلم وبعد السلامات والتحيات وأخبارك ايه والكلام ده كله. انتقل الحوار لأن أنا بقولها أنا نفسي في اللي اتجوزها انها تفهمني وأفهمها وأعرف أكلمها وأقنعها أو تقنعني وكده يعني لقيتها بتقولي:

هي: ده لو انت شاطر تقدر تتكلم انت هتسمع بس

من اول ما هتدخل

العيال عملوا

ابنك مبيذاكرش

دول بيضربوا بعض

واختك عملت فيا

ومش عارف مين جابت كذا

وانا عايزه اغير كذا

وبعد ده كله

هتقولك

انت على طول مشغول بالشغل

ومفيش حاجه بتعملها وسايبنى بالعيال

وانت شايف نفسك

ما هو طبعا اصلى الجاريه اللى اشتريتها

مفيش حمد ولا شكرانيه

انتو كده يارجاله تاخدونا لحم وترمونا عضم وهى اصلا تكون جايالك 50 كيلو وتلاقيها بقت 90وتقولك اخدتنى لحم ورمتنى عضم

لو قولتلها انا يعنى عشان مبقولش كلام حلو زى زمان يبقى خلاص مشغول بالشغل

هتقولك امال يعنى هيكون ليه

هتقولها طيب ياستى متخافيش انا زى زمان وكل حاجه بس انتى اللى مش فاضيه

هتقولك اه الحجه بقيت انا اللى مش فاضيه طب خلاص هبقى افضى

ولو فضيت وجيت كلمتها هتقولك عامل انهى عامله سوده وبتقول المقدمات دى عشان تغطى عليها قول انطق

أنا: هقولها والله يا ستي مفيش حاجه

هي: ولا هتصدقك

وهتمسك موبايلك تفتشه

وايميلك لو ليها فى التطور

وهتبدا تفتحه وتكتب باسمك عشان توقعك وهتنتبهلك

عارف المشكله فين؟

أنا: فين؟

هي: هقولك

ان الست اوقات بتحتاج تسمع كلام حلو عشان تكمل الحياه الممله اللى هى فيها

الراجل وقتها بيكون مش فاضى ومشغول فى الطاحونه عشان يجيب فلوس

أنا: عادي بتحصل

هي: ما هو لما ده بيحصل الست خلاص بتحس انها بتعمل كل ده كانها مكنه

مش لانها بتحب تعمله عشان الانسان اللى معاها

لا

لانه واجب وبتعمله, ومعندهاش اجازه منه

ولا تقدر تقول فى يوم انا مش هعمل ده انا زهقت

أنا: طيب, هو الراجل عليه تقصير مش هنكره

بس هي برضه مش المفروض فاهمه ده

هي: فهماه

بس ليه البخل فى المشاعر؟

هى مبتخدش مرتب من شغلها ده

ولا زى الراجل

لو ملهوش مزاج فى يوم هياخد اجازه

هى لا

لازم يبقى فى الحافز

أنا: زي ما قلتلك أنا مش بنكر تقصير الراجل

وبعدين انتي بتقولي أهو, لو جه يكلمها هتفتحله محضر

يعني لو جه يصلح غلطه, هيتنفخ

هي: لانه مش معودها على كده اصلا

وفجأه جه يعملها هتحس انه زى ابنها اللى لما يجيب درجه وحشه

وعشان يخفف عنها يعملها مقدمات

ما هو ده نوع التفكير اللى هى بتتعامل معاه

لان خلاص جوزها يدوب بتحطله الاكل وينام

ده تعامله معاها

أنا: المفروض ان يبقى في تعاملات تانيه بس مش دي قضيتنا

لكن اللي بقوله

تخيلي لو فيه حد سمع كلامك دلوقتي, وعايز يصلح غلطه وبيتدي يحفز مراته, يعمل ايه؟

هي: اولا

لما يلاقيها بتعمل حاجه يساعدها

دى بدايه

وهو بيساعدها تبقى فرصه يتكلموا سوا

مش يساعدها يعنى يرفعلها رجله عشان تكنس تحتها

وتبقى هى دى المساعده

أنا: أنا فاهم قصدك

بس تخيلي معايا السيناريو ده

خلصوا الأكل

وبعدين هي بتشيل الأطباق, قام يشيل معاها

هتقوله: بتعمل ايه يا راجل مش بعاده

هيقولها: حسيت انتي بتتعبي أد ايه فقلت أساعدك يا روحي

ساعتها طبعاً نص فيران الكورة الأرضيه هتلعب في عبه

وممكن ينافسوا عدد اللعيبه في دورة بكين

غالباً هتنظرله شزراً نظره مليانه شك وتسكت

هي: لا هقولك

ما هو مش كله مره واحده

ممكن لما يقوم يشيل, وتقوله مش بعاده

يقولها عادى, انا كده كده اجازه النهارده

فقولت اعمل معاكى حاجه بلاش من اولها ياروحى والحاجات الجامده دى

بقالها كتير مسمعتهاش

أنا: الطبيعي اليومين دول ان مفيش أجازات عند حد

فيقول ايه؟

الراجل يا عيني مسحول في الشغل طول النهار

وهييجي على نفسه ويقوم يساعدها, علشان لما يقولها يا حبيبتي

بعد اسبوع. متشكش فيه

يعمل ايه؟

حلي المشكله دي؟

هي: دى ولا مسئله التكامل "أصلها خريجة تربيه رياضيات معلش"

هقولك يشيل معاها

ويقولها اصلى كنت عايزه اكمل الموضوع اللى بتقوليه

لانها اكيد مسكتتش ولا لحظه, والست تحب اوى اللى يسمعها

وتحس انه مركز فى اللى بتقوله

مش قاعد يتفرج على الماتش

أنا: هي فكره حلوه بس انتي مش شايفه ان فيها تحامل على الراجل

يعني مش كمان يقوم يساعد لأ ويكمل الموضوع اللي هو قطعاً عنده استعداد يقطع دراعه

ويخليها تسكت لمده ثانيه

هي: لو مديرك فى الشغل وبيتكلم وبيقولك انه امبارح شاف كائن فضائى وسلم عليه

هتسمعه ولا هتقوم وتسيبه مستكتر على مراتك انك تسمعها

أنا: أنا شخصياً ممكن أتريق عليه وانتي عارفه, بس, في الطبيعي أو المنطقي المفروض أسمعه

علشان أنا ورايا بيت وأسرة, لو مسمعتوش ممكن يضايقني وممكن ده يأثر على الفلوس اللي أنا محتاجها علشان أصرف عليهم

يمكن أنا كده دلوقت علشان مفيش عندي التزام

هي: بالضبط

بردوا مراتك

لو مسمعتهاش وريحتها

بيتك هيبقى مش مظبوط

واحده بتعمل الاكل, وخلاص

لكن مفيش روح فى اى حاجه

أنا: يا ستي, ما هو كله بالعقل حلو برضه

يعني هي ليه متقدرش انه بيبقى جاي من الشغل

مضطر يسمع مديره علشان ميرفدوش

ومضطر يسمع زمايله علشان ميتخانقش معاهم

هي: اقولك حاجه

وهتصدقها

أنا: قولي

هي: عارف الست ليه تتكلم وبتعمل كل ده

أنا: ليه؟

هي: بتبقى طول اليوم مطحونه فى البيت مع الاولاد

وبتقعد تعد الساعات اللى هيجى فيها جوزها

اللى بتحبه "طبعاً مفترض في كلامنا ان الجوازه عن حب أو على الأقل اقتناع, مش تخليص حق"

عشان تقعد معاه, ويتكلموا

لما تلاقيه جى, ومش عايز يسمعها

بتحبط, بتحس انه بقى بعيد عنها

وكل يوم بيزيد البعد ده

لحد ما يبقى فعلا كل واحد فيهم فى وادى

أنا:أنا متفق معاكي

بس ليه ميكونش الكلام بالعقل

يعني تصبر همسه

يكون استريح من شغله, وأكل

شرب الشاي

حاجه كده

لكن دي غالباً بتاخده وش

من ساعة أما يدخل البيت

لحد أما يتخمد

هي: دى حاجه فى ايد الراجل

انه يبقى معودها ان مثلا اه هنتكلم

وهنعمل اللى انتى عايزاه

امتى بقى بايده هو

يعنى ميجيش ياكل, ويدخل ينام شويه

ويقولها قومينى لما يجى الماتش

يتفرج على الماتش

والتعليق

ويشوف كل قناه بتقول ايه

وبعد ده كله

يقوم ينام

ولو اتكلمت

يقولها

عندى شغل بدرى. يعنى اعمل ايه؟

أنا: بس تفتكري الست ممكن تعمل ده

يعني تصبر عليه لحد أما ياخد نفسه

هي: اه هتصبر طالما عارفه انه هيقوم

هيبقى ليها هى بس, مش لماتش الكوره

ولا حد من صحابه اتصل بيه, وهيقضوا سهره سوا

وهى يسيبها ملطوعه

أنا: ما هو برضه الراجل بيحب يخرجله خروجه مع اصحابه

مش تبقى مراته

أو أمه

أو أعوذ بالله حماته

يعني, الراجل بيبقى متعود على أعدة الأصحاب

أنا متفق معاكي

بس اللي بقوله

يبقى برضه عنده فرصه ولو يومين في الأسبوع

يقعد مع أصحابه

هي:هقولك حاجه

انت برضوا هترضى تقعد بالعيال يوم او اتنين وهى تخرج مع صحباتها

وكل واحد يخرج مع اصحابه

ومش مهم جوزه ولا عياله

"طبعاً أنا هنا وشي جاب ألوان وقعدت بتاع دقيقة مش عارف أقول ايه"

أنا: مش كده

بس فيه حلول ظريفه نسبياً

من نوعية مثلاً هي تقابل صحباتها في البيت وهو ينزل يقابل صحابه

أو تروح تقعد مع مامتها مثلاُ وهو مروح ياخدها

هي: حلوه اوى, لا طبعا

مش هينفع

أنا: ليه بس؟

هي: كده

انت خرجت واتفسحت مع اصحابك

وشوفت اماكن جديده, ليه هى لا؟

طالما انت مخرجتهاش

خلاص هى تخرج

أنا: أولاً انت فهماني غلط

أنا بتكلم وأنا عارف العقليه المصريه

وبتكلم عن الراجل المصري اللي خروجته هتبقى يا ع القهوة

يا فشقة واحد عازب في الشلة

هي: وانا برفض ده

لانك هتتكلم مع صحابك عن ايه

هتقولهم مراتك عامله ومسويه

أنا: أنا شخصياً مظنش اني هعمل كده

بس ممكن أتكلم عن حماتي وانها مجنناني

ممكن أشتم في مديري في الشغل كويس

أو أتكلم عن الكورة

"هي طبعاً كانت اعترضت على الجزء بتاع حماتي مجنناني بس عموماً هي معترضتش على الاتنين التانيين"

هي: مفيش مشكله

بس كل الوقت ده بيتك اولى بيه

اولادك اقعد زاكرلهم

خفف عنها شويه

أنا: أنا مش معترض

بس تخيلي, كل واحد قعد في بيتهم

محدش هيعرف حد بعد الجواز

مفيش أصحاب

هي: المفروض كل واحد منهم يكون اتجوز ووقته لبيته

أنا: منا بقولك, مفيش أصحاب

هي: هيكون احسن, في أهل

أنا: كده المجتمع تحول لشوية أسر

ملهاش علاقة ببعض تقريباً

الا شوية زكريات

هي: صدقنى الاصحاب فى اوقات كتير بيخربوا بيوت

وده حصل قصادى اكتر من مره

أنا: بصي, ده بقى أنا ضده

مينفعش ناخد الغلط ونعممه

هي: بص الخلاصه فى الموضع

انى واحده من البنات اللى بكره البخل

ومش البخل اللى فى الفلوس

اقصد البخل فى المشاعر

وده فى الاخر بيخلى الستات تتفرج على

حسين فهمى, وعلى مهند ده

ومتسيبش ولا حلقه

ده عمليه تعويضيه

لكن لو جوزها بيديها اللى محتجاه

مش هتبصله, ولا هتعبره

اصلا

"طبعاً انتوا مستغربين ايه دخل مهند في الموضوع, أصل أنا كنت بشتكيلها ان البنات اللي معايا في الشغل بيقعدوا يتكلموا عن مهند بتاع مسلسل نور طول النهار وان أنا بتضايق من الموضوع ده, ووالله مش حقد ولا غيره"

أنا: أنا مش معترض

بس اللي بقوله

انها لازم تفهم

ان الراجل برضه عنده احتياج أنه يكون ليه أصحاب

بيشوفهم ويتكلم معاهم

هي أهم, أكتر منهم بكتييير

بس برضه هو بيحتاجهم

فهماني؟

"يلا علشان اصحابي يعرفوا هما غاليين عليا أد ايه, يلا على الله يطمر فيهم (هو يعني ايه يطمر؟)"

هي:اه

بس انا شخصيا لو جوزى سابنى

وراح لاصحابه هزعل منه جدا

أنا: طيب ليه تزعلي, وانتي عارفه انه بيحتاج ده؟

ممكن تحاولي توصلي معاه لحل وسط

حاجه تكوني بتحبي تعمليها, تعمليها في الوقت ده

لو بتحبي تزوري مامتك

أو حد من قرايبك

حاجه كده

هي: وهو ميجيش معايا يزورها ليه

ولا هيسبنى اروح لوحدى

وارجع لوحدى

أنا: شفتي احنا بنتكلم في ايه, وانتي نقلتينا لايه

أنا بتكلم, في ان الست زي ما بتحتاج الكلمه الحلوه

وان الراجل يسمعها

هو كمان بيحب يكون عنده مساحة حركه

يقابل صحابه, يقعد ع القهوة معاهم "ده مجرد مثال مش عايزين رخامه أنا بقول من دلوقت"

انتي كده بتحولي محاولتي اني أدرو معاكي ع الوضع اللي ميخنقش الست

لأني بحاول أنقذ الراجل من وضع يخنقه

هي: يبقى خلاص

فعلا هو لو اداها اللى هى محتاجاه

ولو قالها انزل

هتقوله انزل

مع انى من جوايا مش هقدر

اخليه ينزل

وممكن ااثر عليه

ويقعد

أنا: لو عرفتي تخليه يقعد وهو موافق على كده أوكيه

بس متحسسوش انه أجرم في حقها

هي: انا بحس ان تملى الموضوع ده محدش بيتكلم فيه منهم بصراحه مع بعض

أنا: ده حقيقي

ودي المشكله الحقيقة في الجواز

ان مفيش صراحه

هي: بالضبط

ومحدش بيقول للتانى على اللى بيزعله منه

ولو ده حصل بيفتكر التانى انه بيهاجمه

أنا: لو كل واحد قال للتاني من الأول هو بيحب ايه ومبيحبش ايه

والتاني برضه عمل كده

وقعدوا مع بعض, وششافوا كل واحد فيهم ايه التنازلات اللي ممكن يقدمها للتاني

نص مشاكل الجواز هتتحل, من وجهة نظري

هي: ده كلها

ما انا بقولك محدش بيحب يسمع انه غلطان

ولو سمعها, بيدافع عن نفسه

وطالما بقيت بتدافع

معناها ان اللى قصادك عدوك

وهو اصلا مش عدوك ولو اقنعته متبقاش كسبت

أنا: أنا مش بتكلم في وضع غلطان ولا مش غلطان

أنا بتكلم قبل الجواز, يقعدوا مع بعض

الراجل: أنا بحب المحشي

الست: أنا مبحبش أعمل المحشي, هدت حيل ع الفاضي

ويقعدوا يتناقشوا

لو اتفقوا, كان بها

ممكن الاتفاق ده انه يتنازل عن أكل المحشي

أو هي توافق تعمله

وده مش في الأكل بس, ده في كل حاجه

الصغيرة قبل الكبيرة

وبصراحه

اتفقوا

يبقى كده تمام

متفقوش

يبقى خلاص., بيس يا جماعه

كل واحد قاعد في بيت مامته

هي: عارف المشكله هنا

ان الواحده بتقول اه

تقول لنفسها لو مشى هجيب غيره منين

فترضى على مضض

أنا: يبقى تشربه بقى

هي: وكل حاجه اه وطيب

واول ما تتجوز

تمشى اللى فى دماغها

وهو اللى هيشرب

مش هى

أنا:كنت لسه هقولها

هو حقيقة هما الاتنين بيشربو

بس ده غلط كبيييييييييييييييييييييييير

هي: عشان كده دلوقتى بتسمع عن اللى بيطلقوا اكتر من اللى بيتجوزوا

أنا: ما دام اللي انتي بتقوليه ده بيحصل

فده نتيجه حتميه

هي: تعرف انا طول عمرى بسمى فتره الخطوبه

فتره القرع

الاتنين بيقرعوا على بعض

أنا: والله عندك حق

اذا مكانش الناس تبقى صرحه في الجواز, هتبقى صرحه في ايه؟

هي: والمشكله ان بعد عشر سنين جواز

تسمع انهم فى الخطوبه عمرهم ما اتفقوا

طب اتنيلتوا اتجوزتوا ليه

وانتو كنتوا مستحملين بعض ليه وقت الخطوبه

ودلوقتى بعد ما جه عيال خلاص

محدش بقى طايق حد

كله كذب, وغش

ومحدش بيقول الصراحه

أنا: يلا

ربنا يهدي

هي: آمين

ملحوظه: اللي استحمل يكمل قراءه الحوار للآخر من أول مره, يسيب اسمه في التعليقات, لأن ليه جايزه عندي لأنه صبور وعنده قدره عاليه على الاحتمال

لحد هنا والحوار اللي بيني وبينها في الموضوع ده خلص, عايز أعرف بقى, ايه الحل؟

يعني احنا مش مكفينا كل المشاكل المادية والعراقيل اللي بتواجهنا علشان نعرف نتنيل على عنينا ونتجوز, والكلام ده للولاد أو البنات على حد سواء, لأ وكمان بنقعد نلف وندور حوالين بعض

ده طبعاً أطول بوست أنا كتبته, ويمكن أطول بوست في التاريخ وممكن أدخل بيه موسوعة كينيز للأرقام المهلبيه

ومش محتاج طبعاً أقول ان أنا كل اللي عملته في البوست ده عباره عن تقويم للكلام اللي كان بيتقال لأن أكيد مكانش ده منظر الكلام على الماسينجر.

وبرضه مش محتاج أقول ان رأيكم يهمني في الموضوع ده خصوصاً

الحرز علمك يا مصر

2008-07-24T04:39:00.000-07:00

تحديث

وصلت أنباء من الاسكندرية تفيد بأنهقامت النيابة بحبس المتهمين 15 يوماًووضع أحمد ماهر كمتهم أولوتفيد بأنه سيتم عرض أحمد ماهر على النيابة المسائية ونحن في انتظار تأكيد قطعي للمعلومة

**********************************************************

بعيد عن قانون البث الاعلامي لأن ده لسه فيه كلام كتير, لكن اللي حصل في اسكندرية ده كتير, والله كتير قوي

أحب الأول أقول, أنا مش من شباب 6 ابريل ولا اشتركت في 6 ابريل رغم اني كنت عايز اشترك بس مقدرتش ومشتركتش, ورغم ان ليا من شباب 6 ابريل أصدقاء كتير لكن مكنتش معاهم, وليا مع أفكارهم اعتراضات واتفاقات زيهم زي أي فكر في مصر

والأكتر من كده, بصفتي حزب غد, فكان ليا موقف معلن اني مش معاهم بسبب ان فيه ناس فيهم بيشتموا حزب الغد والكلام الفاضي ده

لكن اللي حصلهم في اسكندرية لازم يخلينا ننحي كل اللي أنا قلته فوق ده على جنب ونبص للموضوع بزاوية مختلفه ونتضامن كلنا معاهم

ناس راحت اسكندرية, وعملوا مؤتمر وخلص, وخرجوا يتمشوا في شوارع اسكندرية بيغنوا

لو كانوا بيغنو لروبي ولا لهيفا ولا لسي تامر كان بقى مفيش مشكله, لاكنهم ولأنهم غاويين خراب البلد بيغنوا أغاني وطنية لأ وكمان أغاني الشيخ امام

مش كده وبس, لأنهم مجرمين, فهم كانوا رافعين علم مصر. ولأنهم متفننين في الاجرام كان معاهم طيارة ورق مرسوم عليها علم مصر

وللجرائم دي كلها فتم القبض عليهم, وخدوا أربع أيام حبس في النيابة

والحرز علم مصر, وطيارة عليها علم مصر

والتهمة: انهم بيغنوا لمصر

ولو الناس دي البلد مقامتش لحد أما يخرجوا, يبقى سلملي على مصر

مدون من غير رخصه

2008-07-15T00:30:00.000-07:00

يعني الواحد يغيبله أد قرن قرنين عن التدوين وييجي يرجع يلاقي حصل اللي حصل, ولا هما عرفوا ان شقلوب مبيكتبش فلاقوها فرصة وقالوا يستغلوها وأهو يضمنوا انه مش هيكتب تاني

بعد فاصل التواضع اللي فات ده أحب أعرفكم أنا كنت بتكلم عن ايه رغم ان انتوا أكيد عرفتم, طبعاُ بتكلم عن قانون البث الاعلامي أو قانون الفقي أو قانون سكسونيا 2008 المعدل

القانون ده يا ساده يا كرام بمنتهى البساطه هيفرض على كل واحد بيكتب على الانترنت أي حاجه, انه لازم ياخد رخصه من هيئة هتتعمل اسمها هيئة البث الاعلامي, وطبعاً علشان رخصة يبقى لازم رسوم وكوسة وقرع وبطيخ وتمضي على انك هتبقى مؤدب وبتسمع الكلام وطيب وأهبل وكده يعني. وتجيب ورقه من 2 موظفين دخلهم فوق ال50 جنيه تقول انك عمرك مشتمت ولا هتشتم ولا بتفكر تشتم الريس ولا الحكومه ولا هتقربلهم من قريب أو من بعيد

القانون ده عايزين يمرروه في مجلس الشعب, ولو اتمرر هتحول من مدون لمدون من غير رخصة, وهيتقبض عليا واتسجن سنتين ودي مقدور عليها, وغرامه خمسين ألف حنيه ودي بقى مش مقدور عليها خااااالص

على العموم, ولأني مش هسكت اتفقت مع عبدالرحمن فارس (لساني هو القلم) ومحمد عادل (مدونة ميت) علشان نعمل جروب على الفاس بوك وسميناه مدونين ضد قانون الفقي, عايزين كلنا ننضمله ونحاول نعمل حاجه يمكن نعرف نوقف القانون ده

ولينك الجروب

http://www.facebook.com/group.php?gid=26257370126

وبقول من دلوقت, أنا مدونتي مش مرخصة ومش هتترخص, ومش عايزها تترخص, مستنيكم

طواريء....طواريء

2008-05-27T00:48:00.001-07:00

هيه.. هيه, هي دي الأخبار اللي تفرح بصحيح, أخيرأ مفيش خوف ولا قلق. هنقدر ننام في بيوتنا واحنا مطمنين, ومع ذلك نتكلم براحتنا ونقول كل اللي نفسنا فيه.

طبعاً الخبر اللي كلنا عارفينه هو ان مجلس الشعب (والله نفسي أعرف أنهي شعب) وافق على مد قانون الطواريء لمدة سنتين كمان. محدش يتخض, ويقول قانون الطواريء وحش واخيه وكده. لأ متقلقوش, الحكومة وعدت انها مش هتستخدمه الا ضد الارهابيين وتجار المخدرات. يعني مقالوش المدونين الحمدلله (الا طبعاً لو اعتبرونا ارهابيين)

الحكومة وعدت, وهتوفي بوعدها زي ما احنا عارفين. صحيح هي وعدت ان الأسعار تنزل ومبتنزلش, والمرتبات هتكفي ومبتكفيش. صحيح هما من سنتين لما مدوا قانون الطواريء وعدونا انها آخر مرة. بس معلش, دي حاجات صغيرة متخليناش نشك في قدرتهم على تحقيق وعودهم.

مجلس الشعب طبعاً وافق بأغلبية الأصوات. وأنا بصراحة بطالب ان احنا نغير اسمه من مجلس الشعب الى المجلس الوطني نسبة الى الحزب طبعاً, مش الوطنية. ده مش غريب على مجلسنا الموقر, الغريب ان يطلع واحد معارض ويوافق, ويقول ان قانون الطواريء أرحم بكتير من قانون مكافحة الارهاب. وكأن تطبيق قانون جديد في البلد شيء بيحصل غصب عن عين مجلس الشعب.

المهم.... ان بعد الموافقه دي, ياريت يا جماعة نعلن يوم 26 مايو من كل سنة, يوم حداد عام, مش على حرية الانسان المصري ولا الكلام الفاضي ده كله. عايز أعمل اليوم ده حداد على ما تبقى من ماء وجه نواب الحزب الوطني, اللي تفرغوا لشرح مبررات الحكومة لطلب مد قانون الطواري.

الله يخرب بيتك يلي في بالي, عقدت الناس وجننتني

إوعى كرشك

2008-03-27T02:41:00.000-07:00

لنا الريادة دائماً, وعلى كل الحاقدين والموتورين أن يضعوا أيديهم على أفواههم وأن يبتلعوا ألسنتهم وليتركوا شعب مصر العظيم ينعم بانجازاته الخارقة

نقلاً عن مصراوي فقد أعلن المؤتمر الخامس والثلاثون للجمعية المصرية لأمراض القلب أن المصريين هم الأوائل علي العالم في الكرش.
وأكد-بحسب صحيفة المساء- أن أعلي نسبة إصابة بسمنة البطن "الكرش" في العالم توجد بمصر خاصة بين النساء!

وهذا الاعلان هو بمثابة رد على كل الحاقدين والموتورين الذين يدعون مرور مصر وشعبها بأزمة اقتصادية, وأنهم لا يستطيعون ايجاد رغيف العيش بسهولة كما أنهم لا يجدون ما يشترون به الزيت فضلاً عن السمن

فلو كان الشعب لا يجد ما يأكله اذاً من أين أتى بالكرش الذي أعلن عنه المؤتمر

ولكي لا أظلم أحد على حساب أحد توجهت الى معلمي شقلوب الحكيم أسأله عم ما تحير فيه عقلي الضعيف, وقلت له: يا أستاذي العزيز, لقد احتار عقلي وضللت طريقي فلا أدري من أصدق فالمعارضة تقول أن الشعب المصري لا يجد من يأكله أما مؤتمر الأطباء فقد قال أننا مصابون بالسمنه بل أننا أسمن شعب في العالم, فمن أصدق؟

فقال لي معلمي الحكيم: لا تعجب فأنت لازلت بهيم. فالكروش أنواع وأشكال ولها كثير من الأسباب. فالفقير له كرش صغير ناتج عن سوء العادات الغذائية, كما أن الماء والغذاء بما فيهم من وباء لقادرين على انشاء الكروش حتى للهاموش. أما الأغنياء فكروشهم دليل على حياتهم الرغداء ولا تسألني على المسؤولين فكروشهم أصبحت لا تنبت فقط في بطونهم بل في ذقونهم وأقفيتهم لأن على قدر كرش المسؤول نال من كل مأكول

وهكذا يا رفاقي الأعزاء فقد أوضح لنا شقلوب الحكيم أنه لا تعارض بين ما يقال وما قيل, وأعذروني عن قطع الحديث لألحق بطابور العيش

هيييه هنتجوز

2008-03-25T04:45:00.000-07:00

خلاص يا جماعة كل مشاكلنا اتحلت. معدش فيه عنوسه لا لشباب ولا لبنات. كل الشباب هيتجوزوا كل البنات وكله هيبقى تمام. ومدونة عايزة اتجوز هتتقفل علشان هتتجوز وكله هيحط لسانه جوه بقه

ليه كل ده؟ انتوا مش عارفين؟ بجد؟ فاتكم نص عمركم والباقي معرفش هتعملوا فيه ايه بس يدوبك تلحقوا تتجوزوا

عايزين تعرفوا الموضوع؟ وزير التضامن أعلن تخصيص 45 مليون جنيه لمساعدة الشباب على الزواج. واللي مش مصدق الخبر من على مصراوي

وعلشان محدش يتعب نفسه ويدور على مصراوي قام مركز خدمات شقلوب بتوفير لينك الخبر http://www.masrawy.com/News/Egypt/Politics/2008/march/25/youth.aspx

أنا بصراحة أول أما شفت العنوان أعدت أحسبها. احنا حوالي 80 مليون وأكتر وحوالي نص دول عايزين يتجوزوا ومش لاقيين الحكومه هتدعم نصهم (نص النص) يعني 20 مليون شاب وفتاة قول خليهم يتجوزوا منهم في بعضيهم يعني هيصفصفوا على عشرة مليون يعني نصيب الجوز أربعة جنيه ونص. مش بقول كل مشاكلنا اتحلت

قلت يا واد يا شقلوب شوف ايه الحكاية وأهي خدمة تقدمها لزوار المدونة بتاعتك. الاهما فين؟ المهم رحت على صفحة القروض بتاعة بنك ناصر وفتحت على قروض الزواج وبرضه يسعد مركز شقلوب للخدمات توفير اللينكhttp://www.nsb.gov.eg/NasserSocialBank/ar-EG/Social_Services/قرض+الزواج.htm

ومن الآخر نصيب الواحد مش هايزيد عن ألفين جنيه لو توافرت فيه كل الشروط. وبكده الدولة هتساهم في تزويج تسعون ألفاً من الشباب على الأقل. شفتوا الهنا اللي احنا فيه

ألفين جنيه؟ دول يجبوا ايه يا واد يا شقلوب؟ تصدقوا معرفش يجيبوا ايه. يعني الواحد يقدم طلب قرض ودمغات واثباتات انه مش لاقي ياكل (فاكرين بحث الحالة بتاع المدارس والجامعات) علشان في الآخر يدوله ألفين جنيه

آه عرفت الألفين جنيه يعملوا بيهم ايه. يدفعوا ايجار الشقة أول شهر والنور والميه والغاز والباقي يخرجوا بيه خروجة بمناسبة انهم في شهر العسل أو يجيبوا كيلو لحمة قبل ما ينسوها للأبد

سؤال أخير: هيا الحكومة دي بتحكم مصر ولا حتة تانيه؟

صباح الافتاء

2008-03-13T03:17:00.000-07:00

من أول يوم عملت فيه البلوج ده وأنا كنت مقرر انه مش هيتكلم عن شخص بعينه, وكنت بحاول أبعد عن ثلاث شخصيات على وجه الخصوص وهم شيخ الأزهر والمفتي والبابا

لكن فيه حاجات بصراحة ميتسكتش عليها زي مثلاً يعني الخبر ده

http://www.masrawy.com/News/Egypt/Politics/2008/march/12/aligomaa.aspx

يعني ايه ان الدفاع عن رسول الله مش واجب على المسلمين, أنا مش مفتي ولا دارس دين كويس ولا حتى متدين. بس برضه ازاي الدفاع عن الرسول مش واجب على المسلمين

أيوة أنا عارف وكلنا عارفين ان ربنا وعد رسوله انه هيكفيه من الناس ومن شر المستهزئين بس هل ده معناه ان احنا نسكت؟ هل معناه ان احنا منحاولش ننتقم لنبينا من اللي عايزين يهينوه ويهينوا الاسلام ككل

طيب, وبالعند في عم المفتي أنا عايز أعمل حمله ضد الدنمارك وهولندا, الحملة دي مش معناها ان احنا نقعد نشتم فيهم بينا وبين بعض, لأ الموضوع أكبر من كده بكتير

عايزين نعمل موقع باللغة الانجليزية وياريت لو فيه ناس تعرف فرنساوي وألماني وهولندي والموقع ده ننقض فيه الحكومة الدنماركية والهولندية وصحافتهم بأكبر قدر ممكن من السخرية مع الاحتفاظ بالتحضر والاحترام

نسخر من رموزهم ومعتقداتهم طبعاً اللي تتعارض معانا يعني ميجيش حد ويقولي هنسخر من المسيحية ده كده يبقى عبيط, لكن غير كده عايزين نبهدلهم

عايزين نعرفهم ان احنا نقدر نفهمهم ونستوعب هما بيعملوا ايه ونعرفهم انهم مش أحسن مننا ان مكانوش أقل

المشكلة اني مقدرش أعمل الموضوع ده لوحدي أنا محتاج فريق من المتطوعين يمكن نقدر نعمل حاجة

ايه رأيكم في الفكرة دي, يا ريت أسمع أرائكم ومقترحاتكم ولو الفكرة عجبتكم ياريت تقولولي ممكن تساعدوني ازاي

دي فلوسي يا

2008-02-27T06:48:00.000-08:00

مش عارف ليه كل أما أقول يا واد يا شقلوب ملاكش دعوة باللي بيحصل في البلد واللي نفسه في حاجة خليه يعملها ألاقي طلعلي خبر فور دمي وحرق أعصابي وخلا لساني الطويل اللي عايز قطعه يتحرك

هبتدي كلامي بسؤال صغير, طبعاً كلنا عدينا على كورنيش النيل بالليل وبنشوف البرج بتاع البنك الأهلي منور وملعلع ومعظمنا علق وقال ان تكلفة اضاءه البرج ده ممكن تحل مشاكل ناس كتييييييييير

طيب وأما ييجي خبر في الجرنان ان البنك الأهلي تعاقد مع المقاولون العرب علشان يطورله البرج هو والبرج الجديد دي مش حاجة تنقط

يعني بدل ما يطوروا خدماتهم وأسلوب شغلهم واللي بدون نزاع تعتبر من أسوأ الخدمات يطوروا المبنى, ولو بيطوروه من جيوبهم يبقى ماشي ومش هفتح بقي لكن دول بيطوروه من جيوبنا احنا

كله كوم والخبر منشور في الأخبار والجمهورية (دول اللي قريتهم فيه) وبيقول انه هيبقى انجاز حضاري. وواضح ان الكلمة دي هي كلمة السر الجديدة بدل كتكوت. وطبعاً كلنا مش ناسيين الانجازات الحضارية الكبيرة اللي اتعملت في بلدنا زي توشكا وجراج رمسيس

يا ريت حد يبلغ الناس اللي عماله تعملنا انجازات حضارية ويقولهم ان الشعب غني عن الانجازات دي ونفسه يبقى فيه انجازات غذائيه وصحيه

معلش البوست ده دمه تقيل عن كل البوستات بتاعتي (قال يعني أصلاً أنا دمي خفيف) بس أنا هطق

عن الحب أتحدث

2008-02-21T05:48:00.000-08:00

بما اني بدأت أكتب تاني في شهر فبراير, فممكن قبل ما أدخل في مشاكل الدنيا. والحكومة واللي بتعمله فينا, أتكلم شوية عن الحب واللي بيعمله في خلق الله

والحقيقة ان مش ده السبب بصراحة, السبب الرئيسي ان في واحد صاحبي, قريب مني جداً اليومين دول عايش قصة حب. ويعيني عليه مبتبهدل آخر بهدله وعلى رأي المثل الحب بهدله

ايه الحكاية ؟ ده فضول مش حميد على الاطلاق. يعني ليه عايزين تعرفوا حكاية واحد صاحبي بيحب. أهو بيحب وخلاص, ولا يعني علشان أتكلم عن موقف لازم أحكي الحكاية كلها من طأطأ لسلام عليكم

المهم الموقف اللي عايز أحكيه. وعلشان مطولش عليكوا (قولوا طول) كنت قاعد أنا وهو على القهوة امبارح في وسط البلد. وساعتين عمال يشكيلي ظلم الحياة وانه مكتئب وحالته كرب ومفيش فلوس والشغل زفت وكلية الهندسه رخمه وفجأه...لأ مشافهاش

جاله تليفون منها, طبعاً هو عاملها نغمة مخصوص غير عامة الشعب. ألاقي الواد اللي كان خمس دقايق وهيعيط جنبي, وشه ابتسم وعينيه لمعت وبقى مسبرنشق على الآخر.

يعني أنا أقعد أواسيه ساعتين مجيبش معاه نتيجه وهي بمكالمه تليفون دقيقه ونص تشقلب كيانه. يعني ده مش ظلم, أنا بصراحه صعبت عليا نفسي

تسألوني, وصعبت عليك نفسك ليه يا أبو الشقاليب؟ متخافوش مش هقول انتم مالكم, لأنكم المرادي بتسألوا عن صاحبكم مش عن واحد صاحبي

أصلي بعيد عنكم وعن السامعين حسيت اني مجهودي بيضيع على الفاضي, يعني كان أسهلي بدل ميقعد جنبي ساعتين يعيطلي, أتصل بيها وأخليها تكلمه وأبقى استريحت وريحته

السؤال اللي عايزله اجابه, هوالبتاع ده اللي اسمه الحب بيعمل كده فعلاً في خلق الله. واشمعنى أنا من دون خلق الله اللي مجربتش البتاع ده

طبعاً آخر جملة عرفتكم سبب النفسنه اللي أنا فيها. والرغي اللي عمال أصدع دماغكم بيه من أول البوست. ياه وأنا اللي فاكركم أصحابي وهتستحملوني

خلاص هسكت, مستني رأيكم بس محدش يطول ايده أنا بقول من دلوقت

العودة

2008-02-21T01:56:00.000-08:00

السلام عليكم ورحمة الله وبركاته,

بيان هام

أعلن أنا شقلوب, العودة الى العالم البديل بعد غياب غير مبرر الأسباب. وأعدكم بعدم تكرار تلك الفعلة الى أن يقضي الله أمراً كان مفعولا

ومع البداية الجديدة تم تغيير شكل المدونة بشكل مش نهائي خالص, حتى أستقر على شكل مناسب بحسب اقتراحاتكم وآرائكم

شكر خاص واعتذار

لعاشقة الوطن, واللي عايز يعرف ليه يبص على الكومنتات بتاعة البوست اللي قبل ده

سلام مؤقت

يمكن !!!!

2007-12-13T03:36:00.000-08:00

كل مرة أختفي فترة, وبعدين أرجع أعتذر, فللتغيير ولمجرد التغيير مش هعتذر المرادي, ما كده كده هرجع وأختفي تاني هعمل ايه يعني في طبيعتي الشقلوبية.

المهم, أنا هكتب في ايه؟ هتكتب في ايه يا شقلوب, هتكتب في ايه يا واد يا شقشق؟ هتدوش دماغات الناس بايه؟ آه موضوع هجرة الشباب, كل العالم اتكلم فيه اشمعنى أنا يعني, ده أنا حتى من الشباب, يعني المفروش ان أنا حاسس بالمشكلة والكلام الحمصي ده.

المهمز, كل الناس اللي اتكلمت قالت ان الشباب بتهاجر علشان مفيش شغل, ولا فلوس (وهتيجي منين ومفيش شغل), مفيش جواز, الأسعار عماله تطلع في العالي والأكادة الحكومة الذكية ناوية تشيل الدعم, وبالتالي معظم الناس قررت تحط ديلها في سنانها ويا فكيك على أول بلد, شرعي مش شرعي متفرقش, معايا الكام ألف اللي هسافر بيهم ولا هستلفهم ولا حتى هبيع كل اللي حيلتي وأسافر مش فارقة. ما هو كده كده الواحد مش ناوي يرجع.

طيب الناس اللي بتسافر شرعي وعرفينها وكلنا بنقدرها أهي عرفت تلاقي فرصة للعمل في النور, ورايحة عارفة هي عايزة تعمل ايه, وعارفة هي مسافرة ليه. مشكلتنا كلنا الهجرة غير الشرعية ده الكلام اللي عمالين نسمعه بقالنا شهر, اللي عاوز يهاجر يهاجر شرعي, لأن الهجرة الغير شرعية وحشة وعيب وحرلم واللي يسافر مش شرعي ويموت مش هيورد على جنة ولا على نار لحد أما يشوفوا بلده ويودوه السفارة بتاعتها.

أنا بقى بما إني شقلوب وحصلتلي حادثة وأنا صغير غيرت تركيب نافوخي فمش عجباني فكرة الهجرة أصلاً, ممكن الواحد يسافر سنة, اتنين أو حتى عشرة ولا عشرين لكن انه يسافر وهو مش عايز يرجع دي بقه المصيبة الكبيرة.

ليه مصيبة؟ لأن الناس اللي هتكبر في بلاد برة (حلوة بلاد برة دي) وهتعمل حاجات تنهض في البلاد الي هما فيها مش هيرجعوا, ومعنى كده ان الدول المتحضرة هتفضل متحضرة واحنا هنرجع للخلف أكتر.

يعني ايه؟ يعني اذا ما كانش شباب النهاردة هو اللي هيصلح البلد, مين اللي هيصلحها؟

السؤال ده ينقلنا لنقطة تانية, لو الواحد مننا قدراته ومؤهلاته متخليهوش يحقق أحلامه, ليه ميحاولش يطور نفسه؟ بدل ما يقعد مستني تجيله الشغله اللي بيحلم بيها, يحدد هو عايز يشتغل في ايه, ويشوف هو محتاج يبقى ايه علشان يشتغلها ويحاول يطور نفسه. على الأقل لو عمل كده وفشل جوة نتيجة الفساد مثلاً, برة يلاقي لنفسه مكان محترم.

لكن اللي أنا حاسس بيه, من معارفي وأصحابي, ان كل واحد فيهم عايز يهاجر وخلاص, وكأن الهجرة أصبحت هدف في حد ذاتها, رغم انها المفروض وسيلة لتحقيق طموحاتي مش تبقي هي كل طموحاتي.

المهمز, واللي أنا عايز أقوله, البلد دي مش هتتصلح غير بينا, وعشان نقدر نصلحها مش لازم نستنى الفرصة, لان احنا اللي بنعمل الفرصة

لكن أقعد واستنى الفرصة يمكن تيجي؟ يمكن!!!!!!!

Hello, losers

2007-11-10T01:52:00.000-08:00

Hello, world. First I want to say I'm sorry. I'm sorry for being away all this time (of course this one is for who missed me), sorry for who commented me and I didn't acted with his comment, and big big sorry for who worried about me and send me message either on Face Book or e-mail, and I didn't answer. I'm sorry for all I've mentioned and more.........

Now, after being very polite I want to say sorry again for calling you all losers, I didn't mean it, I ment to say hello for losers because I'm on of them.

Losers? Why I'm a loser? and what I mean by losers? That's why I made this post to say.

The first question will be answered among the answers of the other questions, so pleas be patient and wear your seat bilt and read with me.

In our personal life, for every one who loved someone and he didn't love him back, cheated on him, or just let him down. Please forgive me if I said you are a loser.

In work life, for every one who doesn't work, or does work something he disrespect please, allow me to say that you are a loser.

For every one who lives in a country, any country, where he can't get what he wants or even say what he wants although what he wants is right. You are a loser.

For every one who lives in this world with all this hate and pain, with all this blood covering the blue planet as if someone whants to turn it to red planet, and not trying to prevent this whith all his strength, even with words. Believe it or not it doesn't matter, you are a loser.

For all this and more, there's very very large number of losers in this world. I stoped a little and thought, there's a clup for every type of people, engineers, smokers, and gays, so why losers have no clup. So, using FaceBook I made one, a losers clup.

So if you think you are a loser on any level, you are welcomed. May be in one day we can help each other to overcome our losers' life

To join the clup you have nothing to do, only have an accout on FaceBook and click on this link http://www.facebook.com/group.php?gid=6114465841 , then join.

You did?? Welcom on board loser :))))))

كلهن ليلى

2007-09-09T04:26:00.000-07:00

كلنا ليلى, أو يوم المدونة المصرية (والعربية كمان ليه لأ) يوم غريب جداً ومفيد جداً جداً

بس الأول وبشخصيتي الشقلوبية دي أحب اسأل سؤال وياريت ألاقي حد يجاوبني عليه, اشمعنى ليلى؟ ليه مش سعاد ولا مديحة ولا حتى حواء؟ اشمعنى ليلى يعني اللي مدوخنها معاكن ومخيلينها تشوف المرار والعذاب ده

في اعتقادي الشخصي ان ليلى بتمثل في نفسية البنت المصرية كتير قوي, فهي ليلى اللي وجدت الحب والحنان الذي ليس له مثيل من قيس الذي تحول اسمه بقدرة قادر الى مجنون الست ليلى. كما ان ليلى هو أكثر الأسماء انتشاراً في السينما المصرية في سلسلة الأفلام التي نالت بطولتها كلها الا واحد ليلى مراد والواحد ليلى فوزي. علشان كده أحب أعتقد ان التسمية جاءت بشكل تلقائي

المهم ولحد أما حد يرد عليا بسبب التسمية أعتقد بصفتي من النصف الآخر كما يسمينا البعض, أو معسكر الأعداء كما يسمينا البعض الآخر فأعتقد أن من حقي أن أقول رأيي في ليلى, بما أن كل البنات أصبحن ليلى بين يوم وليلى

رأيت ليلى المثقفة الواعية, التي تتحدث على أن المجتمع ككل مصاب بحالة انفصام في الشخصية, وليلى جزء من المجتمع بلاشك. كما رأيت ليلى التي توشك أن تطالب بالغاء نون النسوة من اللغة العربية لأنها اهانة للمرأة, كما كانت هناك تلك الليلى التي لولا القانون لقتلت كل الرجال على ظهر الكرة الأرضية وكل الكور الأخرى التي يحتمل أن يوجد رجال بها, وليلى التي تحدثت عن نظرة المجتمع الى العنوسة, وأخرى التي تحدثت عن ليلى الفرعونية وانها كانت واخدة حقها وبميت راجل

كل هذا جميل وأكثر ولكن, وضع ليلى هو بلاشك صنيعة ليلى وليس أحد آخر. عندما كنت صغير كانت ليلى والدتي تضع لي نصيباً من اللحم أكثر من ليلى أختي, لماذا؟ كان يغيظني هذا وخصوصاً انني لم أكن أحب الأكل عموماً واللحم على وجه الخصوص, ولكن ليلى تصر ويجب أن أطيع

ليلى كانت ولا تزال هي المسئولة عن تربية الأطفال في مجتمعنا المصري, لذا فعندما يتربى الولد على انه هو الملك وعلى الليلات الموجودات بالبيت خدمته فلا تلمنه بعد ذلك على انه يطالب بهذا الحق فمن شب على شيء شاب عليه

كان عندي في المدرسة مدرسة, ليلى أخرى, تدعوا الليلات الصغيرات في الفصل الى أن يذاكرن حتى يستطعن الزواج من انسان محترم فكيف لنا نحن الأولاد أن نفكر في غير ذلك

أعجبتني كثير من آراء ليلى, وكانت لي ملحوظات على بعض آرائها, وكرهت آراء أخرى لذا أستنتج أن كلهن لم يكونوا ليلى ولكنهن ليلات كثيرات

وفي النهاية هي محاولة مثمرة لتغيير نظرة المجتمع الى ليلى, والأهم لتغيير نظرة ليلى الى نفسها, وهذا هو المهم

لمتابعة فعاليات اليوم

http://laila-eg.blogspot.com/

دعوة للمشاركة

2007-09-09T03:24:00.000-07:00

السلام عليكم

يا جماعة فيه حملة لتجميع المصاحف

بصراحة أنا شايف ان مفيش كلام يتقال أحسن من الموجود في التدوينة دي

http://bentmoslema.blogspot.com/2007/09/blog-post.html

يلا يا جماعة

عايزين نثبت لنفسنا قبل العالم ان المسلمين لسه بخير

أقوال شقلوب الحكيم

2007-09-03T08:04:00.001-07:00

بعد غياب طويل أعود أليكم, عسى أن تكونوا قد افتقدتموني.

وفي هذه التدوينة أحمل لكم بعد الأقوال المأثورة لمعلمي شقلوب الحكيم, ربما كان قرأها أو اخترعها أو حلم بها, المهم أنها من أقواله وخلاص

حاول أن تنظر دائماً الى الجزء المملوء من الكوب.... فقط تأكد من وجوده
تستطيع أن تجعل العالم كله يتكلم عنك اذا وقفت عارياً تحت سفح الهرم ....ماذا يقولون؟ تلك قضية أخرى
مصلحة الوطن من مصلحتي الشخصية.... مصلحتي الشخصية من مصلحة الوطن, نفس الكلمات وليس المعنى
هل تستطيع أن تخبرني ديانة كل من الشخصيات الآتية: نجيب الريحاني, غاندي, الخطيب, مصطفى محمود, آينشتين, مصطفى مشرفة
الاجابة: لايهمني, أمتعوني أو أفادوني, هذا ما يهمني
بصرف النظر عن قضية الختان نفسها, بعد موت الطفلة التي ثارت بسببها القضية والمجتمع تلك الثورة العارمة بجرعة بنج زائدة, فهمت لماذا يعرضون الرابط العجيب في سبيس تون
باكو شاي يساوي حياة طفل, كابل كهرباء يساوي تعذيب طفل, معادلتان بسيطتان حلهما البسيط هو أن الطفل يساوي صفر
يساري - يميني, مسلم - مسيحي, جرب كل الاحتمالات الممكنة من أول كلمتين مع تاني كلمتين وحط ما بينهم مبتفاهمش هتعرف حالنا في مصر
لو البلد دي بلدك تسيبها ليه؟ طيب لو مش بتاعتك, قاعد هنا بتهبب ايه؟
مش لازم تحارب الغولة علشان تموتها, ممكن تخليها متلاقيش حاجة تاكلها أسهل

كفاية كده عليكم من أقوال شقلوب الحكيم, يا ريت أعرف رأيكم

من وحي صلاح جاهين

2007-08-19T06:11:00.000-07:00

الشوارع حواديت
حوداية الحب فيها وحوداية عفاريت

إسمعى يا حلوة لما أضحكك

الشارع ده كانوا ساكنين فيه زمان
كانوا أربعة عايشين جيران
مسلم مسيحي ما بعرف أنا
كله في حاله
وكانوا عايشين في سلام

الشوارع حواديت

حوداية الحب فيها وحوداية عفاريت
إسمعى يا حلوة لما أضحكك

في الشارع دخل عليهم غريب
ظلم ودمر
ما في حد قاله عيب
ولما شاف كل واحد الظلم واقع عليه
قال هو جاري اللي مني انتقم

الشوارع حواديت

حوداية الحب فيها وحوداية عفاريت
إسمعى يا حلوة لما أضحكك

في الشارع كانوا عايشين في سلام
لما جه الظلم عاشوا في الغمام
ضباب بيمشي ييجي من بعده الضباب
وكله ماسك في بعضه
ويقوله انت السبب
انت مش من ديني يبقى انت العدو
ووقف الظلام يتفرج ويقول تمام

الشوارع حواديت

حوداية الحب فيها وحوداية عفاريت
إسمعى يا حلوة بس هتحزني

احنا والحكومة

2007-08-15T06:26:00.000-07:00

من كام يوم كنت قاعد أقرأ كتاب الفهامة لأحمد رجب. والفهامة هي سلسلة مقالات أسبوعية كان أحمد رجب بيكتبها في أخبار اليوم والكتاب كان عبارة عن تجميعة لشوية المقالات اللي اتكتبت سنة 94. اتفقنا, كده ممكن نبتدي المفيد

أحمد رجب من سنة 94 بيتكلم عن ايه؟ تخيلوا انه كان بيتكلم عن الضرايب والمية اللي مفوته على الصرف الصحي, والكوسة, والتصريحات اللي زي الرز ومحدش عارف هي بتتزرع فين ولا ليه مجرموش زراعتها بصفتها من المواد المخدرة, وبيتكلم عن التعليم اللي حاله بقى زي الزفت والدنيا اللي بتضرب تقلب وظباط الشرطة مكبرين ومابيهمهومش غير المعلوم قصدي المعلومات يعني.

من سنة 94 هي هي نفس المشاكل ومفيش حاجة منها راضية تتحل لأ وبالعكس بتزيد وتزيد وتتعقد زياده وبتكلكع أكتر. يعني من 13 سنة وأكيد من قبل كده والدنيا متحسنتش على مستوى التنظيم والادارة ورعاية محدودي الدخل اللي عن قريب هيتحولوا لمعدومي الدخل.

عدت كام وزارة, بصراحة معرفش عددهم بس ممكن نعد رؤساء الوزارات, عاطف صدقي, كمال الجنزوري, عاطف عبيد, أحمد نظيف مع حفظ الدكترة لكل واحد منهم.

يعني عندنا 13 سنة فيها أربع رؤساء وزارات والتغيير يتحسب بالسالب. ايه يعني اللي بيحصل؟ يعني كل الكلام اللي بيتقال واللي هيتقال هيعمل ايه في البلد ولا هيحسن ايه؟

اتخنقتوا مني؟ ونفسكوا تعرفوا أنا كاتب البوست ده ليه مش كده؟ علشان أنا حاسس ان كل الكلام اللي بيتقال عن الحكومة وتحسين أداءها والشتيمة اللي بنشتمهلها والكلام الحمصي ده مش هيغير حاجة, وهنفضل نكاكي ولا اللي بيدن في مالطة.

معرفش ليه بس حاسس ان احنا قبل أما نحاسب الحكومة لازم نحاسب نفسنا الأول وكل واحد يشوف هو يقدر يعمل ايه ويحاول يعمله بجد وصدق واخلاص.

مش معنا كده طبعاً ان بقول نبطل كلام ونبطل نحاسب الحكومة, بس ده يبقى جنب ده مش كله يبقى كلام في الهواء. وبرضه أنا مقصدش المظاهرات والاعتصامات والحاجات دي لأن نتايجها محدودة. أنا بتكلم في حاجات ممكن تتعمل منغير ما الحكومة تتعرضلها وفي نفس الوقت مفيدة للبلد.

أنا بفكر, وعايزكوا تفكروا معايا ايه اللي ممكن يتعمل؟

ايه؟ يا ترى فيه حد هيفكر معايا ولا هخبط دماغي في الحيط؟

عموماً الحيطة هي اللي هتتكسر علشان أنا دماغي ناشفة قوي.

ابقوا فكرولي في حاجة أخبط فيها دماغي منغير متتكسر (الحاجة مش دماغي)

سلام

زعلانين عليهم ليه؟ دول متهمين

2007-08-01T09:01:00.000-07:00

الشرطة في خدمة الشعب, كلمة كنت بسمعها زمان وبشوفها في الأفلام العربي الأبيض والأسود. حاجة كده أكل عليها الدهر وشرب, من أيام ماكان الواحد وهو عيل صغير تسأله نفسك تطلع ايه يقولك ظابط.

الضابط لازم تبقاله هيبة ومكانة محترمة, ماشي. ممكن نسمح ان الهيبة دي يكون جزء منها نابع من الخوف من البطش, بس جزء صغير يعني. لكن الأمور توصل ان الواحد ينام يقوم يحلم بضابط شرطة وعصاية مقشه ده اللي مينفعش أبداً.

المشكلة ان مع عصاية المقشة هنحلم بجركن سبرتو وكابلات كهربة وناس بتتحرق وحاجات من دي.

مش مصدقيني

طيب أقرو الخبر ده من مصراوي

شقيق مواطن تعرض للتعذيب في سيوه يطالب بالعدالة ويرفض التعويض

ده خبر بتاريخ 31/7

وفيه كمان خبر النهارده عنوانه

مفاجآت جديدة في قضية الشاب الذي تم حرقه داخل قسم شرطة سيوة

الموضوع ده اتنشر في أحد الصحف حسب كلام مصراوي يوم 26/7 والمتهم فيه هم رئيس شرطة سيوة ومعاوناة.

الخبر قديم شوية؟ ممكن

الغريب ان أنا امبارح وأنا مروح لقيت راجل كان معاه مراته وبيتخانق مع عسكري. خلي بالكم عسكري من اللي بيمشي خطوة واحدة في الشطرنج ده. المهم, الراجل بيتكلم بالعافية ورفيع وغلبان زي حالاتي والعسكري صحته مساعداه وعامل زي البغل. أنا قلت دي خناقة مصرية من بتاعة هوريك هوريك وخلاص وخصوصاً ان الراجل يظهر انه مريض لأنه بيتكلم بالعافية زي ما قلت. المهم ان العسكري لقيته بيقلع الآيش اللي هو الحزام يعني وعايز ينزل بيه على الراجل ولولا ستر ربنا وولاد الحلال كان الراجل الغلبان أخدله علقة مكن.

هو فيه ايه بقى؟ هي الشرطة نسيت انها أصلاً في الأصل من الشعب؟ ومن امتى الشرطة أصبحوا من ذوي الدم الأزرق؟ والعسكري ده, نسي أما كان بيرعى الغيط في البلد ولا ايه؟ دي مش اهانة والله لأن رعي الغيط أو حتى لم الجلة من ورا البهايم أشرف ألف مرة من اللي هو كان عايز يعمله.

وأما تتكلم مع حد من الصنف ده في لقاء صحفي أو تليفزيوني تحس انه بيقول انتوا زعلانين ليه دول ولاد........ مجرمين. وده وهم لسه بيتحقق معاهم والتهمة مثبتتش. وده طبعاً بيثير تساؤلات كتير حول أحوال المساجين داخل سجوننا المصرية.

نصيحة, أي حد ابنه يقوله أنا نفسي أطلع ظابط يعرضه على دكتور نفساني أحسن يطلع سايكوباتي أو سادي زي الكونت دراكولا الشهير ب ح.ع عرفتوه؟ للتسهيل الاسم التاني معرف بالألف واللام

الشرطة في خدمة الشعب...طالما الشعب بيبوس رجلين الشرطة, غير كده هتجيلك زيي كوابيس مليانة عصيان مقشات و جراكن سبرتو و لسه

تاج وداير على الخلايق... وكل مدون مسيرة يتدبس

2007-07-31T06:12:00.000-07:00

اصطبحنا وصبح الملك لله , تدبيسه هواللي بنعمله في الناس هيطلع علينا

ده أول تاج أجاوبه. بس المره الجاية هكون أنا اللي عامله نياهاهاهاهاهاها

يلا افرحوا فيا دلوقتي لكن الأيام دول ماشي يلي في بالي, وربنا يسامحك عاااااااااااا

اسم مدونتك؟

موجود فوق بس علشان خاطر عيونك اسمها شألوب النطق المصري لشقلوب

لماذا اخترته ..وماهي نيتك من وراء اختياره؟

مافيش حد بيختار اسمه. وأنا فكرت في الأسم وبعدين دورتله على استخدام. في الأول كنت عايزها مدونة مواليه للنظام , وتقعد تهلله وبيب بيب نظام طبعاً بأسلوب شقلوب والمعنى في بطني لأني مش شاعر بحاجة اليومين دول. لكن في الآخر قلت شقلوب هتبقى معناها ان أنا بتشقلب من موضوع لموضوع ومن اسلوب لاسلوب براحتي. شقلوب بأه

وبعدين ظهرت شخصية شقلوب الحكيم في دماغي وبقى فيه شقلوب الحكيم الراعي الرسمي لمدونة شقلوب.

هل فكرت في إغلاق مدونتك؟ والسبب؟

هي لسه ابتدت علشان تقفل ده أنا حتى عمال أدور على زباين في كل حته.

صورتك في المدونة ورمزيتها ؟؟

بص عليها في البروفايل وأنا شارح رمزيتها تحتيها على طوووووووووووووووول

لماذا دخلت عالم التدوين من الاساس؟

مزاجي هو حد شريكي. الحقيقة الحقيقة يعني علشان ألاقي حد يقرا اللي أنا بكتبه. ماهو أنا برضه من حقي اني زي ما عمال أقرا للناس انه حد يقرالي, ده طبعاً لو اللي أنا كاتبه يستاهل.

التعليقات بالنسبه لك ,اهميتها؟

ولا تعني لي شيء لأن أنا بكتب لنفسي أساساً بلا بلا بلا. لأ طبعاً دي مهمة جداً كفاية انها بتعرفني ان فيه حد قرالي وعجبه اللي أنا كتبه أو ماعجبوش وليه. غير طبعاً انها وسيلة للتواصل والتعارف وكل الكلام الحمصي ده

احلى بوست كتبته ...ضع اللينك , ثم اذكر لماذا؟

احلى بوست... احلى بوست.... لسه ما كتبتوش وأما أكتبه أوعدكم اني هبطل كتابه الى الأبد.

أفضل بوست قرأته؟ وضع لينكه؟

بصراحة فيه كتير وأنا مشكلتي ان في حاجات كتييير أوي بتعجبني لدرجة اني عمري ما عرفت أجاوب على سؤال من نوعية دي؟

أفضل مدونة قرأتها؟

مممممممم... فيه مدونات حلوة كتير بس الغريب ان مركز أفضل مدونة بيتنازع عليه في رأيي بنتين. مدونة عايزة اتجوز ومدونة طيارة ورق وهم عكس بعض تماماً بس الاتنين في رأيي حلوين جداً

حد قل أدبه فى التعليق إيه رد فعلك؟

هو لسه محصليش الشرف, معرفش فعلاً ممكن أعمل ايه. ممكن ألغي التعليق أو أسيبه ومردش عليه. المشكله اني مابحبش أشتم على الأقل وكل الناس هتسمع وتشوف ثقافتي الرفيعة في المجال ده. أعتق ان لو الشتيمة مش قبيحة أوي ممكن أسيبه في حاله و أقوله الله يسامحك

أسوأ مدونة؟

أي مدونة فيها أي حد بيشتم في أي حد, أو أي شخص. ممكن أقول انه سيء علشان أسباب كذا وكذا لكن أشتم وأقول ده ابن ودي بنت والحوارات دي. معلش يعني مبحبش اللي بينشروا غسيلهم اللي مش نضيف (مشيها اللي مش نضيف) أدام الناس

أسوأ بوست أسوأ مدون...............

اللي بيعمل اللي أنا قلت عليه في اجابة السؤال اللي فوق

هيحصل ايه لإيميلك لما تموت ؟؟

هيتحنط

اديت الباسوورد لحد قبل كده؟

حصل لواحد صاحبي أيام الكلية

كانت إيه طبيعة علاقتك بيه؟

قلتلك صاحبي وزميلي في الكلية

اسمك؟

حسن

المشهور بيه وسط اصحابك؟

حنفي... حسن هو حسن أبوعلي ومش هكمل علشان أنا خلاص رجعت المعزة لصحابها ومبحبش أجيب سيرة حد مش موجود

شخصيتك نوعها إيه؟

سودة وبسوسته جلد طبيعي... معرفش شخصيتي نوعها ايه بس أنا بيتهيألي شقلوب اسم معبر وينفع عنوان كويس لسيرتي الذاتية

السفر بالنسبة لك؟

نفسي أسافر حته أبعد من اسكندرية, بس العين بصيرة واليد قصيرة يا زد أحمد

وقت فراغك بتعمل فيه إيه؟

عادي يعني, نت ولو عندي أفلام كويسة ممكن.. أقعد مع أهلي.. ألعب... وأقرء وأقرء وأقرء ودون وأقرء وأقرء وأقرء ودون وأقرء وأقرء وأقرء ودون وأقرء

المود بتاعك؟

شقلوب

الاكلة المفضلة

قلتلك كل حاجة فيها مفضلة دي مبعرفش أجاوبها بس الكباب وشربة العدس ليهم مكانة خاصة في معدتي

الصفات اللي أخدتها من بابا؟

معرفش

الصفات التي أخدتها من ماما ؟

برضه معرفش

اكتر ست حاجات بكرهها؟

اسرائيل, الغرور, الاستنطاع, الجهل, الادعاء, البذائه

اكتر ست حاجات بحبها؟

مصر, أهلي, أنا, أصحابي, الصداقة الغير مسببة, الحب

الشغل بالنسبة لك؟

محاولة لتحقيق طموحي فاني أعيش وقبل أما أموت أسيب بصمه في الدنيا دي

الانترنت بالنسبه لك؟

جزء من حياتي اليومية

امرره لمين ؟ وحان وقت التدبيس

بما اني ماليش في عالم المدونات غير اتنين أصحابي, وبما ان واحده منهم دبستني فمعلش بأه هدبس التانية يلا يا عاشقة الوطن معلش بأه مافيش غيرك

ناصر..الحلم...والكابوس....والحلم برضه

2007-07-29T07:04:00.000-07:00

عدنا. ومن أرض مصر المحروسة يعود شقلوب الصغير ليكمل حديثه عن الثورة. لو قرأتم التدوينات السابقة فبها ونعم, أما لو كانت الأخرى فأقرؤوها لأنني لن أعد ما قلت من قبل.

كفاية فصحى لحد كده. وقفت فين يا واد يا شقلوب؟ كنت واقف فين يا شقلب؟ في ميدان طلعت حرب؟ يييييه مش وقته الزهايمر ده

آه افتكرت. ناصر لما مسك البلد, طبعاً اللي شافوا اللي أنا كتبته قبل كده متوقعين ان أنا هشتم في ناصر. لكن مش ده اللي أنا عاوز أعمله , ومش هزايد على وطنيته وانتماءه , بس في رأيي المتواضع أنه يكفي القائد وزراً سوء اختيار رجاله

وبصرف النظر عن طريقة تولي ناصر الحكم فهو مسكه وخلاص. المهم ايه اللي حصل؟

طبعاً مباديء الثورة لازم تتنفذ ونكمل خطتنا للنهضة بمصر؟ ده اللي في ظني قاله ناصر واللي اتسبب في أكبر مهزلة في تاريخ أي بلد في العالم

هنأمم المصانع, كل المصانع تتأمم ويمسكها ضباط جيش لا يعرفوا حاجة عن اساليب ادارة المنشآت المدنية ولا طبعاً المصانع ولا يعرفوا المصانع دي بتصنع ايه أصلاً

هنبني مصانع, المصانع تتبني جنب النيل وفي أحسن الأماكن الزراعية.

هنلغي الأقطاع, ويتلغي الاقطاع بدون وجود طريقة واضحه تحافظ على نسب انتاج المزروعات. يعني ايه؟ يعني من الآخر كده. مصر محتاجه نص الأراضي تتزرع قمح

تتعمل ازاي دي؟ الله أعلم

مفيش أحزاب وكلام في السياسة تقوم المخابرات تخلي أي حد يتكلم في السياسة في بيته بقدرة قادر يبقى مش قادر يتكلم في المعتقل

هنعمل رقابة. ييجي الرقيب اللي من سلطته انه يشيل بمزاجة لدرجة انه شال صفحة كاملة من الأخبار قبل الطبع مباشرة ولم يجد مصطفى أمين الا أن يكتب فيها هذه الصفحة بيضاء لا بسبب الرقابة انما تم غسلها بصابون نابولسي شاهين

ده حتى تأميم القناة لولا ستر ربنا وان أمريكا وروسيا أدخلوا لمجرد فرض النفوذ كان زمان مصر تحت الاحتلال الثلاثي

هنساعد الدول العربية, تقوم جيوشنا كلها تتحرك يمين وشمال تساعد في الثورات التحررية في الدول العربية وطبعاً أهمهم حرب اليمن

هنحارب اسرائيل يقوم الجيش اللي لسه ما أخدش نفسه يطلع كله بعساكره بصف ضباطه, بدبابيره, بنسوره, بطياراته وعلى الجبهة علشان اسرائيل لما تضربنا تلاقي كل حاجة قدامها ومتحتاجش تدور كتير

بس كلمة حق لازم تتقال عبد الناصر كان رجل بمعنى الكلمة, وكان شجاعاً لدرجة التهور, يثق بمصر وقدرات شعبها وجيشها الى حد الغرور, ولم يكن يخشى أحد.

لكنه لم يكن سياسياً, خسر العالم كله وكسب الاتحاد السوفيتي. لأن السياسي لابد أن يكون ثعلب أو على الأقل أسد يمتلك مكر الثعلب ودهاءه , ولكن ناصر كان أسداً أحاطت به إما ذئاب أو كلاب وثعلب واحد.

وعندما حدثت النكسه وطالب الشعب ببقاء ناصر لم يكن هذا ضرباً من الجنون, أو عدم رؤية سياسية من رجل الشارع. ولكن رجل الشاعر شعر أنه في موقف كهذا لا داعي لاستعمال مكر الثعالب بل الحاجة كل الحاجة كانت لقوة الأسد وبطشه.

وبدأ ناصر قبل رحيله في بناء الجيش وأعلن ما يطلق عليه بحرب الاستنزاف. ولكن اعلان الحرب تأخر كثيراُ بموت الأسد المحارب

وعندما مات ناصر بكاه كل شعب مصر. ربما اختلفنا معه أو عليه ولكن الأسد مهما كانت قسوته بأهله فهو دائماً يضفي عليهم الاحساس بالأمان

ولذلك فبرغم النكسة وبرغم ما فعلته أجهزة الأمن والرقابة بكت الناس الأمان والطمأنينه في صورة ناصر

بعد الثورة....كمان ثورة

2007-07-26T03:18:00.000-07:00

أهلاً بيكم, حد قرأ البوست اللي فات؟ أكمل أنا بقى

بعد الثورة أو الانقلاب ايه اللي حصل؟ الملك اتنازل عن العرش لابنه وبعدين ساب البلد ومشي. كده, بمنتهى البساطة لدرجة ان أنا بيتهيألي لو كان واحد وقف قصاد القصر بتاعه وقاله امشي وأنا أقعد مطرحك كان مشي.

طيب وبعدين, تم تعيين محمد نجيب وصياً على أحمد فؤاد الثاني الرضيع آخر ملوك الأسرة العلوية في مصر. وشويتين كمان وقعنا اتفاقية الجلاء ومصر بقت جمهورية ورئيسها محمد نجيب اللي أعلن مباديء الثورة وأعلن كمان تحديد الاقطاع بصفته رئيس مصر.

وفين جمال عبد الناصر؟ جمال عبد الناصر كان عضو في مجلس قيادة الثورة زيه زي محمد نجيب زي السادات زي جمال سالم وكان كمان ماسك رئيس الوزراء ووزير الداخلية

يعني كان مصر رئيسها محمد نجيب ورئيس الوزراء جمال عبد الناصر.

المهم ان الشعب المصري بيحب نجيب وناصر والشعب السوداني بيحب نجيب بس والدنيا ماشية بالاتحاد والنظام والعمل وده كان شعار المرحلة. أصل لو مش واخدين بالكم احنا في مصر مينفعش يبقى فيه حاجة تتعمل الا في مرحلة ومفيش مرحلة من غير شعار. وعلى رأي المثل الا مالوش شعار, يدورله على شعار

فجأة يحصل خلاف بين نجيب وناصر, أو بمعنى أصح بين نجيب وباقي أعضاء مجلس قيادة الثورة. ليه؟ هو ده مربط الفرس

اللي بيحبوا ناصر بيقولوا ان نجيب كان عايز يستأثر بالسلطة لوحدة ويبقى دكتاتور ومعرفش ليه أنا شايف ان ناصر لما مسك الحكم بعد كده كان ماسك البلد لوحده والباقيين كانوا مالهومش لازمة غير انهم يقرفوا في الشعب.

طيب الناس التانيين الوحشين اللي مش بيقولوا ناصر ناصر يا حرية, الناس دي بتقول ان نجيب قالهم ياولاد احنا عملنا اللي علينا ونسيب البلد للناس والأحزاب يحكموها. طبعاً ناصر قاله دي أحزاب فاسده وناس همج ولو سيبناهم يحكموا هيبوظوا البلد واللي احنا عملناه واطلع بره بيتي انت مش ابني, شقلوب هو اللي ابني وحاجات كده

طبعاً نتيجة الخلاف ان طلع خبر في الجرايد بعزل محمد نجيب. قوم الناس الهمج تقوم عمله هوجة وقلبان وتهتف بحياة نجيب ...وبيب بيب نجيب والشغل اللي احنا عرفينه. وفعلاً يرجع نجيب. لكن سبحان الله متفهمش ايه اللي حصل ... البلد باظت والبوليس مش شايف شغله والمصالح شغاله على كيفها... خلي بالكم محمد نجيب لسه رئيس الجمهورية وناصر لسه رئيس الوزراء ووزير الداخلية. الناس طبعاً حست ان نجيب راجل طيب وغلبان ومش عارف يمسك البلد. قام طلع علينا خبر بيقول ان نجيب اعتقلوه في فيلا في المرج واتمنع من المشاركة السياسية اللي كان من ضمنها انه يشوف عيلته أو يتكلم مع حد. ومحدش فتح بقه وقا ل نجيبك منين يا نجيب.

وبقى ناصر ناصر يا حرية هو رئيس جمهورية مصر العربية ورئيس الوزراء ورئيس مجلس قيادة الثورة.

هنكمل مع الزعيم جمال عبدالناصر بعد سماع آرائكم. ان شاء الله

الثورة... النشأة... ولكن..

2007-07-25T03:38:00.000-07:00

يسعدني ويشرفني أنا شقلوب الصغير, أن أكمل حديثي المتواضع عن ثورتنا المصرية البيضاء كما يصر كل من يقدم برنامج عن هذا الانقلاب العسكري الذي حدث في يوم 23 يوليو 1952 , ولكن كيف كانت البداية؟

البداية تعود بنا لعام 1948 حيث حرب فلسطين وقضية الأسلحة الفاسدة. عندما أيقن ضباط الجيش أنه لابد من قيام ثورة على هذه الأوضاع المتردية داخل تلك البلاد. فقام جمال عبد الناصر ومن معه بتكوين اللجنة التأسيسية للضباط الأحرار فور عودتهم من فلسطين.

ده اللي احنا درسناه في كتب التاريخ بتاعة الحكومة, لكن فيه حد ليه رأي تاني بيقول انه (يعني صاحب الرأي) وعبدالناصر فكروا في تنظيم الضباط الأحرار, وقاموا بالفعل بمحاولات لانشائه في منقباد قبل حرب فلسطين بفترة ليست بالقصيرة وقبل تسريحه من الخدمة العسكرية, عرفتوا هو مين؟ ايه ؟ أيوة محمد أنور السادات

وبصرف النظر عن متى أنشيء الضباط الأحرار ومن هو صاحب الفكرة والمؤسس والذي منه, وبصرف النظر برضه عن شوية المنشورات اللي كانت بتطبع باسمهم فان أول ظهور حقيقي ومؤثر للضباط الأحرار كان في انتخابات نادي القضاه التي أجريت قبيل الثورة في عام 1952, حيث تم انتخاب اللواء محمد نجيب كرئيساً لنادي الضباط ضد مرشح القصر الملكي. وبعد هذا بقليل تقوم الثورة ليعلن للعالم أن تنظيم الضباط الأحرار بقيادة اللواء محمد نجيب قد استولى على السلطة.

محمد نجيب. أول مرة نسمع الاسم ده أو يظهر في تاريخ الضباط الأحرار. هو مين؟ جه امتى, وليه هو؟ التاريخ بيقول ان محمد نجيب المصري الأب ومن أم سودانية كان أحد أكفأ ضباط الجيش المصري الذين جمعوا بين الانضباط العسكري وحلاوة المعشر كمدنيين. خدم في السودان لفترة طويلة وكان محبوباً من المصريين والسودانيين على السواء. لذلك تم اختياره ليكون قائداً وأباً روحياً للضباط الأحرار.

يعني الضباط الأحرار هما اللي اختاروا محمد نجيب ليكون قائداً عليهم, بمزاجهم يعني واختاروه علشان كان ضابط برتبة لواء ومحبوب جداً من الناس.

وبعد كده قامت الثورة واللذي منه. طيب ايه اللي حصل بعد الثورة من الضباط الأحرار وقائدهم المعلن وقتها محمد نجيب.

ان شاء الله لسه للموضوع بقية. بعد سماع آرائكم وتصحيحكم لأخطائي

الثورة .. الأنقلاب .. وأنا وانت

2007-07-23T09:17:00.000-07:00

كل سنة وأنا وانتم ومصر كلها بخير, ليه؟ النهاردة عيد الثورة. ثورتنا البيضاء يعني مش التركواز ولا الصفراء ولا الحمراء. ثورتنا اللي كانت زي النهاردة بالظبط من 55 سنة.

بس كل سنة بتيجي في دماغي حبة أسئلة. قلت ليه يا واد متفكرش فيها بصوت عالي يمكن تلاقي حد يرد عليك ويصححلك مفاهيمك الغلط. أصل انت طول عمرك براوي وميعجبكش العجب ولا الصيام في رجب.

أول سؤال طبعاً كلكم خمنتوه. هي كانت ثورة شعبية ولا كانت انقلاب عسكري؟ هتقولولي هي تفرق؟ أقول أنا أكيد تفرق أصل ثورتنا العظيمة البيضاء ماكانش في أعضائها أو منفذيها مدني واحد يكسر عين الحسود ويحط فيها عود, أمال ايه اللي حصل؟

كتاب الثورة لما تزنقهم بالسؤال ده يردوا عليك ويقولوا العبيط أهه آسف قصدي يقولوا انها كانت انقلاب عسكري بس اتحولت لثورة شعبية. ليه؟ علشان الشعب هيصلها وهللها وكبرلها وقال عاشت الثورة المصرية. بس أنا الكلام ده مش عاجبني علشان الشعب المصري بيهلل ويكبر على أي تغيير بمنطق شالوا ألضو جابوا شاهين. ده عن أول سؤال

السؤال الثاني مين اللي قام بالثورة. طبعاً الظباط الأحرار. أيوة يعني مين من البني أدمين هتقولولي الجيش. أنا قصدي مين البني أدمين اللي كانوا هيتنفخوا لو الثورة فشلت؟ الاجابة اللي أنا أعرفها بتقول محمد نجيب على رأس القائمة ومين تاني؟ الناس اللي احتلت المبنى اللي بقى مركز قيادة الثورة. ومين كمان؟ الناس اللي هيعترف عليهم الناس اللي أنا قلتهم قبل كده. طيب وجمال عبدالناصر والسادات وباقي أعضاء مجلس قيادة الثورة. محمد نجيب بيقول ان الناس دي مكانتش موجودة في الجيش ساعة أما قامت الثورة. يعني ايه؟ يعني الناس دي خططت ووزعت الأدوار وساعة الصفر كان عبدالناصر وحكيم واقفين قدام المبنى (مركز قيادة الثورة) لابسين مدني. والسادات كان في السينما واتخانق وعمل محضر في القسم كمان, ده اللي قاله نجيب.على فكرة السادات مأنكرش ده وفسرة انه مكانش عارف ميعاد الثورة بالضبط لظروف كتير مافيش داعي تتقال هنا.

طيب السؤال التالت هي الثورة بيضاء ليه؟ هو الملك مقاومش ليه؟ رغم انه كان عنده حرس يقال ان تسليحه وتدريبه أحسن من الجيش والشرطة كانت معاه برضه. أمال ايه اللي حصل؟ على فكرة الناس كلها في مصر كان عندها أمل ان الملك فاروق يقدر يعمل حاجة للبلد دي أول أما مسك الحكم. صحيح الشعور ده قل مع الوقت لكن كان فيه ناس لسه عندها أمل. المهم ان نجيب برضه بيقول ان فاروق لما شافه وهو بيمشي قاله ان هما سبقوه وانه كان ناوي يعمل حاجة بس هما سبقوه وعملوا الأنقلاب ده اللي قاله نجيب في مذكراته كنت رئيساً لمصر. ورأيي الشخصي بيقول ان لو فيه حد ليه فضل ان الثورة طلعت بيضاء مش منقرشة بالأحمر يبقى للملك فاروق مش لحد تاني.

طيب آخر سؤال هي الثورة كانت مفيدة للبلد ولا كانت مضرة؟ يعني هل فعلاً الثورة نهضت بمصر ونفعتها ولا لأ؟

وللحديث بقية بعد سماع آرائكم ان شاء الله

أنا مدمن يا جدعان

2007-07-19T04:22:00.000-07:00

75%

هنلم للمتحف

2007-07-19T01:24:00.000-07:00

إمبارح خير اللهم ما أجعله خير, كنت قاعد وماسك جرنان الأخبار, وعمال أقرى فيه لقيت خبر بيتكلم على إن وزير الثقافة بيعلن عن حملة التبرع لبناء المتحف المصري الكبير.

إشي خيال يا ناس على رأي محمد صبحي, يعني الناس مش لاقية تاكل تقوم تتبرع علشان المتحف الكبير. ده نص المصريين مراحوش الصغير, و ثلاث أرباع اللي بيروحوا هدفهم الأساسي الفرجة على المزز المستوردة. بس الوزير قال ان الموضوع مهم ونهضة ثقافية كبيرة هتخلي مصر الألفا (نمرة واحد يعني) في موضوع المتاحف ده.

وبما إني وطني مخلص فأنا فكرت في شوية اعلانات علشان الحملة القومية لجمع التبرعات من أجل بناء المتحف الكبير

أول إعلان

طفلة صغيرة شكلها كده رقيقة وأمورة وياريت تكون هدومها مبهدلة شويتين تطلع علينا في التليفزيون مع خلفية أغنية إيدي فإيدك (ماهو معندهمش غيرها) وتقول

"أنا بنت مصرية, مش لاقية آكل ولا لاقية مية أستحمى ولا حتى أشرب. بس نفسي مصر تبني المتحف الكبير. إتبرع ولو بجنيه"

التاني

في برنامج البيت بيتهم, يطلع المفتي مع تامر حبيب الملايين ويعملوا الحوار ده

تامر: جالنا أكتر من جواب وإيميل وفاكس بيسألوا عن حكم التبرع لبناء المتحف المصري الكبير

المفتي: طبعاً ده واجب قومي وكلنا لازم نتبرع, والمتحف المصري ده البلد محتاجاه, وبيت المال بيستحق أموال الزكاة

أصل المفتي بتاعنا دؤرم وما بيحبش حد يمسك عليه حاجة

التالت

بنت زي القمر, لابسه من غير هدوم (لامؤاخذه) حاطه على وشها اتنين طن مكياج علشان محدش يعرفها تطلع مع مذيع/مذيعة في برنامج, واقفين في الشارع وبعدين يدور الحوار ده

المذيع: هتتبرعي لبناء المتحف؟

البنت: طبعاً أنا وكل صحباتي بكرة الساعة 1 الضهر هنعمل دونيشن في البنك الأهلي فرع قصر النيل

(البنك الأهلي في اليوم ده, وفرع قصر النيل بالذات هيعمل نسبة تبرعات مهولة)

الرابع

نفس الموقف بس بدل البنت يبقى تامر حسني مع مذيع أو مذيعة برضه بس يقول على بنك تاني في يوم تاني

(البنك ده هيحقق أكبر نسبة تبرعات في تاريخ البشرية, لأن طبعاً ولاد كتير هيستغلوا الفرصة علشان يتبرعوا, ماتخلوش أفكاركم تروح لبعيد)

الخامس

طبعاً لازم يبقى فيه مارثون خيري, ولازم يبقى في يوم اليتيم وأنا فكرت في الكلام اللي هيطلع الممثلين والممثلات والراقصين والراقصات علشان يقولوه في التليفزيون

"إحنا رايحين كلنا الماراثون الخيري الكبير. علشان إيه؟ لأ مش علشان ضحايا قلعة الكبش, ولا علشان أطفال الشوارع, ولاكمان علشان نجمع فلوس نعمل بيها مواسير مياة. الموضوع أكبر من كدة بكتير, ده علشان المتحف المصري الكبير" ويطلع في الآخر إبراهيم نصر يقول "ده الكبير كبير"

لو كل ده بأى منفعش ممكن يجيبوا شوية ناس يلبسوهم شيوخ ويطلعوهم الأتوبيسات علشان يلفوا على الناس ويقولوا "تبرعوا لبناء المتحف)

المتحف المصري الكبير........... ده الكبير كبير

صديقتي

2007-07-19T01:14:00.001-07:00

صديقتي

لاتنهزمي بهذه السهولة

فأنت أقوى من ذلك

بكثير

أعلم ذلك

بل

أثق به تمام الثقة

تحملت من قبل

أكثر من ذلك

وأنا أعلم

بل كل العالم

يعلم

قد كنتي أقوى من الجميع

وحتى في هذا الموقف

أنت أقوى

فماذا قد تخسرين؟

أحبيب؟

إن أحبتك كثر

وما عليك سوى

أن تشيرين

أصديق؟

كم من بشر يسعى

لهذا الشرف

ومن تريدي منهم

فاختارين

فتحملي

وقاومي

لن أقول من أجلي

فما أنا إلا صديق

أو أخ صغير

ولكن من أجل نفسك

فلو خسرتها

سيخسر كل من حولك

وربما

كل العالم

الكثير

بدون أسباب

2007-07-18T03:38:00.000-07:00

يأتي إلي ذلك الضيف الثقيل بين الحين و الآخر. لا أدري لما يأتي ومن أين أتى, كما لا أدري متى يذهب ولماذا. يغلف جميع أحاسيسي ومشاعري وأراه في كل ما تقع عليه عيناي, فلا أدري أهو انعكاسٌ له من داخلي, أم ان وجوده هو انعكاس لما أراه.

حزن شديد وضيق أشد ينتابني بين وقت وآخر, قد يزول بعد ثوان أو يعيش لأيام وربما لشهور. هذا الحزن يصاحبني حتى وأنا أضحك, ويلازمني في المواقف التي من المفترض فيها أن أكون في قمة السعادة. الغريب في هذا الاحساس أنه يأتي ويذهب بدون أسباب, فأنا ومنذ فترة ليست بالقصيرة وحياتي تسير بشكل مستقر والحمد لله. في العمل الذي أحبه ويحقق لي مادياً ما أحتاجه في الوقت الحالي, في منزلي حيث أعيش مع أهلي ولا توجد بيننا خلافات والحمدلله, حتى بين أصدقائي لايوجد ما يمكن أن يحزن أي انسان.

فلم هذا الحزن؟ أحياناً أجيب أنه بسبب كثرة الذنوب وقلة العمل وأحياناً أخرى أعلله بالفراغ العاطفي ومرات أخرى أفسره بأنه تأثير ما يجري حولي في الدنيا من قتل ونهب وسرقة بكل الأشكال ومن كل الأنواع.

ولكن هناك شيء لا أفهمه, فإذا كان هناك سبب لذلك الحزن إذاً فمن المفترض به أن يرحل من نفسي بزوال السبب. الغريب في هذا الحزن أنه يرحل كما جاء, بلا أسباب, وبلا تغيير. بل وأحياناً يزول وأنا في مواقف شديدة الصعوبة ومن المفترض أن أكون في قمة حزني, لكني أجد نفسي متحملاً للموقف ولا أشعر بالحزن على الإطلاق.

هل هناك من يشعر بهذا الحزن الغريب غيري؟ أم أنني أصبحت مجنوناً في هذا العالم حيث الجنون هو اسم اللعبة؟ من يستطيع أن يجيبني فليفعل فقد يجعل هذا ضيفي يرحل.

مشربتش من نيلها

2007-07-17T07:50:00.001-07:00

الأغنية دي بتمس مشاعر المصريين يشكل كبير دلوقتي, فأول أما شيرين تطلع وتقول ما شربتش من نيلها الناس تقول لأ هنشرب من البحر. لكن يا جماعة أنا أحب أطمن شعب مصر العطشان (كان جعان قبل كده بس بصراحة العطش أهم) اللي مش لاقي يشرب من نيلها هيشرب بفضل الحكومة الذكية من نيلتها.
الخبر الحلو ده نشره موقع مصراوي:
الامن يهدد باعتقال المتظاهرين ضد العطش والبرلمان يطلب تعويضهم ماديا
طيب نعتقل الأخوان وماله أعداء النظام الطبيعيين ومن حقه إنه يحاربهم بالصورة اللي تتناسب مع مبادئه. نعتقل المعارضه برضه وماله أهي ناس دوشجية وبتحب تعمل مظاهرات على الفاضية والمليانة وأهو حتى الزحمة تخف من البلد شوية. نعتقل المدونين, ممكن, وأهو نخف على النت وعلى السيرفرات شوية وخلي اللي بيعمل دونلود لأفلام يعمل دونلود براحته. لكن ناس بتتظاهر علشان مش لاقية تشرب (سيبك من الطبيخ والحموم) طب ليه؟ هو لا يبقى حموم ولا مظاهرات؟ ده حتى يبقى كتير.
وقال مين المسئول بتاع إيه طالب احصائيات علشان يضمها للخطة اللي هتتنفذ خلال أربع سنين. طيب ولحد أما الخطة تتنفذ؟ هيوصلوا المية عن طريق فناطيس (جمع فنطاس) والواحد يقعد يستنى لما الفنطاس ييجي علشان ياخد حصته من المية. وبعدين ولضمان توزيع المياة توزيع عادل هيصرفوا المية على بطايق التموين.
ومحافظ مش عارف مين فين بيقول انه عند أقل نسبة تضرر, كام يخويا؟ قال ايه 3 آلاف واحد بس. والله؟ دول حتى مايستهلوش نبعتلهم فناطيس.
والبطرمان المبجل بيقترح تعويض مادي. حد فيكوا كان بيقرأ ميكي؟ أصل الناس هتستحمى بالفلوس زي عم دهب. بس المشكلة ان الجنيه المصري ما بينضفش ده هيخلي الناس تجرب.
طبعاً أنا مسكتش ورحت جري لعمي شقلوب الحكيم لأستشيرة في المشكلة دي وايه رأيه, فدار هذا الحوار بيني وبينه:
أنا: أيها الحكيم شقلوب, يا من تقذف الناس بالطوب. أخبرني بالله عليك ماذا تفعل لو وقعت في نفس المشكلة؟
شقلوب: من وجهة نظر الناس أم الحكومة؟
أنا: من وجهة نظر الناس بالطبع
شقلوب: أما عن الشرب فقد أراحهم الله من مشاكل المياة, وما بها من كلور وما يعيش بها من ميكروب. ولا تسألني عن مشكلة الطبيخ, فإنه يسبب للمعدة تلبيخ. ولاكن المشكلة الحقيقية في الاستحمام.
أنا (مقاطعاً): فلتدع الاستحمام لأهل الاستحمام ولا تفكر في نظافة المياة أو راحة الأمعاء فالشعب عندنا أكول ولا يؤثر فيه ميكروب أو كلور
شقلوب: إذن أنا عندي الحل
أنا: قول
شقلوب: فليتوقف الناس عن المظاهرات, وليأخذوا التعويضات, ويستخدموا المياة القادمة في الفناطيس في الشرب والأكل إن أمكن, والشرب فقط إذا لم يمكن. حتى تقوم الحكومة الذكية بحل هذة الرزية
أنا: ولكن إذا توقف الناس عن الوقفات التظاهرية فقد تظن أن المشكلة قد حلت بالجهود الذاتية
شقلوب: أوهذا شيء يفوتني يا أحمق؟ بعد فترة من عدم الاستحمام سيثور باقي الشعب من أجل هؤلاء القوم.
أنا: لماذا أيها الحكيم؟ وأعذرني لأني غشيم
شقلوب: بسبب الرائحة التي ستنتج من عدم الاستحمام, ان لم يكن اليوم فسيحدث بعد أيام
وسكت شقلوب عن الكلام, وأخذ يولول ويبكي, بعد انقطاع الماء عنه وهو في الحمام

القاعدة والحكومة الذكية

2007-07-16T00:36:00.000-07:00

بعد أن لاحظت توتر الناس في بلدنا العظيم وعدم فهمهم لما استغلق عليهم من أحداث تجري داخل البلاد, وتساؤلاتهم الكثيرة عن سر ظهور القاعدة في مصر (بلد الأمن والأمان وأكل البطيخ والبتنجان) وفي هذا التوقيت والزمان. توجهت إلى معلمي الحكيم شقلوب الأكبر أطال الله عمره وأخبرته بما يجول بخاطري وخاطر باقي الرعية فأجابني بما استغلق على فهمي المحدود وذهني المكدود. وجعلني أفيق بعد أن أنار لي الطريق.

قال شقلوب الحكيم:

بعد اقرار قانون مكافحة الإرهاب العظيم بدلاً من قانون الطواريء لعنه الله, وقعت حكومتنا الذكية في مشكلة وأزمة نفسية. فقد بدأت الأشاعات والأقاويل تنتشربأن هذا القانون صمم خصيصاً من أجل الجماعة المحظورة كما يمكن استخدامه بتصرف مع المعارضة الغير محظورة. وبالطبع قام بنشر هذه الأفكار السوداء مجموعة من الشباب العملاء والخائنين الذين يطلقون على أنفسهم اسم المدونين.

وبعد بحث وتمحيص واستشارة المستشارين وقعت حكومتنا الذكية في حيص بيص ولم تدر كيف ترد على تلك الشائعات وخصوصاً بعد تواجد معظم قيادات الجماعة اياها في السجون بفضل مجهودات الأمن الداخلي الكبيرة وبدون قانون ارهاب ولا يحزنون. فلم يبق الا الحل الأخير وتوجه أفراد الحكومة الى الغرفة السرية, سر أسرا حكومتنا الذكية السوبر كمبيوتر العظيم ماركة متزوقيني يا ماما ووقفوا أمامه يبتهلون ويدعون بعد أن أحاطوه علماً بما خفي عليه من أخبار وما لم يعلم به من أسرار أخذ السوبر كمبيوتر يجري حساباته المعقده لما فيه صالح البلاد والعباد وسأل السؤال التالي:

برضه الحكومة مش هتمشي؟

وبالطبع ردوا عليه:

لأ الحكومة قاعدة

فرد الكمبيوتر:

يبقى القاعدة هتضرب البلد

وكان ما كان, وسكت الحكيم عن الكلام لحرصة الشديد من غدر الأيام

لاتخجل

2007-07-14T07:19:00.000-07:00

لا تخجل

صارحني

أمريض أنت؟

أقعيد؟

أوتدمن خمراً

ونساء؟

أو تسرق غيرك

أوتقتل؟

لا تخجل

مصري أنت

أليس صحيح؟

لاتخجل

فبلادك

في يوم ما

علمت العالم

كيف يعيش

عربي أنت؟

لا تخجل

أجدادك

في زمن ما

فتحوا العالم

وأناروه

أتعيش اليوم؟

أترى مايحدث؟

اذن فأخجل

أطفالك تقتل

وبلادك تنهب

ونساء

لست أعني

أي نساء

بل أعني نسائك

تنتهك

وأنت

أين أنت؟

أوتحيى اليوم

إذن فأخجل

أول كومنت

2007-07-14T00:37:00.000-07:00

أول تعليق يجيلك يستحق أكتر من إنك ترد عليه

يستحق أكتر من إنك تبعت هدية للي كتبة

أو حتى إنك تعملة موقع علشانة

إحساس جديد أول مرة أعرفه

إن حد متعرفوش ومتربطوش بيك أي صلة

غير إنه شاف كلامك وعجبه

هو صحيح الموضوع معايا مختلف

واللي زارت البلوج زارته مجامله

رغم إنها برضه متعرفنيش

وتعليقها كان جميل وبيقول على اللي أنا كاتبه كلام حلو

ماهي مجاملة بقى

بس برضه دي مش مشكلة

ده ميمنعش إني حاسس بالسعادة

يا عم ده كفاية إن في في الدنيا حد

ممكن يجاملك

وهو ميعرفش انت مين

ومش مستني منك حاجة

أنا سعيد جداً بزيارة عاشقة الوطن للبلوج

ويارب ألاقي حد تاني يدخل على البلوج يقرأ اللي أنا بكتبه

ويعلق عليه

يمدح أو يزم مش مشكلة

المهم إنه يعلق

بس أنا حالياً سعيد

وشكراً للي خلتني أحس بالسعادة دي

منغير متعرفني

Search Compaign

2007-07-12T01:06:00.000-07:00

In the farthest side of the world
Where no man has ever been
And never wants to be
I was standing there
Alone… waiting for you
In the other side of the world
Where all men have been
Or want to be
You were there
Don't care about them
Just… waiting for me
I looked for you in every place
You looked for me in every face
But… we never met
After long long time
I was very tired of searching
So
I went to the wisest man on earth
He never saw what I saw
He don't know what I know
But I went to him
As my last hope
But he couldn’t see
Hopeless, filled with sadness
I returned to my place
In the farthest side of the world
Turning my back to the world
Looking to the side I never looked
There, I saw crowd
And a girl with long dark hair Looking at every face in the crowd

2007-07-12T00:58:00.000-07:00

السلام عليكم ,

إيه أخبار الدنيا معاكوا؟ طبعاً زي الفل (حد عنده إعتراض)

ده أول بوست ليا على البلوج بتاعي (حلوة البلوج بتاعي دي بتفكرني بالمج بتاعي)

أنا لسه حته مظبتطش الديزاين بتاع البلوج ولا البروفايل ولا أي بتنجان

مش لاقي فكرة جديدة

المهم مطولش في الكلام ده أول بوست ويارب ميكونش الأخير

في حد هيقراه؟ الله أعلم