We all see the world, we see it's sad and hopeless. So what if we saw it upside down

Shaقلوب

شكراً يا ريس

Tuesday, August 26, 2008 by Sha2loob

ما هو أنا لما أبقى شقلوب وراضي بحالي, ولامم نفسي بقالي فترة وساكت وعامل عبيط, ماشي تعدي, وأديني واحد من ضمن القطيع

نروح بكين, نرجع بخفي حنين, وميدالية برونزية, ماشي. مش الرياضة اللي هنفلح فيها يعني.

السودان تطرقعلنا أربعة صفر (الموضوع ده غايظني جداً, يمكن أكتر من بكين) وقلنا معلش, أهي الهدايا برضه كانت عامله مفعول, واللعيبة كانت سرحانه بتفكر هتروح فين بالعربيات الجديدة.

مجلس الشورى ولع, دي لوحدها كارثه, أما أنه يفضل مولع تسع ساعات دي بقى لسه مخترعولهاش اسم

كل اللي فات ده ومش عايزأعلق, علشان محدش يقول شمتان في البلد

لكن بجد اللي خنقني وخلاني مش عارف أنا شقلوب ولا معدول التصريحات ومن مين؟ من الريس شخصياً

بعد حربق مجلس الشورى, قريت الخبر الرئيسي في أول صفحة في الأخبار (مش فاكر تاني يوم الحريقة ولا اليوم اللي بعده, جالي زهايمر من اللي بيحصلي) أن الرئيس يأمر باصلاح الخسائر على نفقة الدولة

هنا بقى أنا مفهمتش حاجه

يعني ايه؟

هو لو مجلس الشورى متصلحش على نفقة الدولة, مين اللي هيدفع النفقة؟ أكيد اللي طلق لازم هو اللي يدفع النفقه

المهم, عصرت على نفسي ييجي كده غيطين لمون بنزهير وسكت

ألاقيلكم خبر النهارده في الأخبار, وبرضه صفحة أولى, الرئيس يأمر بتكوين لجنة لبحث أسباب تراجع نتائج مصر في بكين, ومعاقبة المسئولين

أنا هنا بقى جالي شياط في نفوخي ومش عارف بجد ينفع ايه يتقال وايه ميتقالش

يعني, فيه حكومة, برئيس وزراء بوزرائه اللي يسدوا عين الشمس

فيه مجلس قومي للرياضة, وليه رئيس وفيه كمية موظفين ولجان يسدوا العين التانية للشمس

كل دول ملهومش دعوة. والريس هو اللي لازم يقول

دى أنا لما بتعامل مع شركة كبيرة (مصرية كمان مش شركة انترناشونال), وعايز أتكلم مع رئيس مجلس الادارة, مبيقدرش ياخد قرار الا لما يرجع للموظف المختص

ولو اضطر ياخد قرار من صلاحيات الموظف ده, معنى كده ان الموظف ده أخذله كام يوم خصم على أقل تقدير

معنى كده ان بلدنا محصلتش حتى شركة

طيب أنا هقترح اقتراح

احنا نشيل مجلس الوزراء, بمجلس الشعب, بمجلس الشورى, والريس يعينله هيئة استشارية من كام واحد, وهو اللي ياخد القرار على طول, والقرار اللي محتاج متابعة, تتعمله لجنة تتابعه

وأهي اللجان تبقى تبع العمالة المؤقته, ونبقى بكده وفرنا في ميزانية الدوله

ومعلش يا ريس تعبينك معانا, بس نعمل ايه؟ واضح ان مفيش في البلد دي حد عنده القدرة انه ياخد قرار غير حضرتك

وشكراً ياريس

Filed under having 3 comments  

قال جواز قال

Wednesday, August 20, 2008 by Sha2loob

عاملين ايه يا حلوين؟ وايه أخبار البلد على حسكم؟

ايه مالكم وشكم أصفر ليه؟ مش الحمدالله كل شيء تمام, والحياه حلوه ولونها نيلي (من النيل مش من النيله) وكل على سنجة عشره. والأمن مستتب والدليل مجلس الشورى اللي ولع

سيبكم من كل الكلام الفاضي ده, أنا جاي أقولكم حوار دار بيني وبين صديقه على النت, كنا بنتكلم وبعد السلامات والتحيات وأخبارك ايه والكلام ده كله. انتقل الحوار لأن أنا بقولها أنا نفسي في اللي اتجوزها انها تفهمني وأفهمها وأعرف أكلمها وأقنعها أو تقنعني وكده يعني لقيتها بتقولي:

هي: ده لو انت شاطر تقدر تتكلم انت هتسمع بس

من اول ما هتدخل

العيال عملوا

ابنك مبيذاكرش

دول بيضربوا بعض

واختك عملت فيا

ومش عارف مين جابت كذا

وانا عايزه اغير كذا

وبعد ده كله

هتقولك

انت على طول مشغول بالشغل

ومفيش حاجه بتعملها وسايبنى بالعيال

وانت شايف نفسك

ما هو طبعا اصلى الجاريه اللى اشتريتها

مفيش حمد ولا شكرانيه

انتو كده يارجاله تاخدونا لحم وترمونا عضم وهى اصلا تكون جايالك 50 كيلو وتلاقيها بقت 90وتقولك اخدتنى لحم ورمتنى عضم

لو قولتلها انا يعنى عشان مبقولش كلام حلو زى زمان يبقى خلاص مشغول بالشغل

هتقولك امال يعنى هيكون ليه

هتقولها طيب ياستى متخافيش انا زى زمان وكل حاجه بس انتى اللى مش فاضيه

هتقولك اه الحجه بقيت انا اللى مش فاضيه طب خلاص هبقى افضى

ولو فضيت وجيت كلمتها هتقولك عامل انهى عامله سوده وبتقول المقدمات دى عشان تغطى عليها قول انطق

أنا: هقولها والله يا ستي مفيش حاجه

هي: ولا هتصدقك

وهتمسك موبايلك تفتشه

وايميلك لو ليها فى التطور

وهتبدا تفتحه وتكتب باسمك عشان توقعك وهتنتبهلك

عارف المشكله فين؟

أنا: فين؟

هي: هقولك

ان الست اوقات بتحتاج تسمع كلام حلو عشان تكمل الحياه الممله اللى هى فيها

الراجل وقتها بيكون مش فاضى ومشغول فى الطاحونه عشان يجيب فلوس

أنا: عادي بتحصل

هي: ما هو لما ده بيحصل الست خلاص بتحس انها بتعمل كل ده كانها مكنه

مش لانها بتحب تعمله عشان الانسان اللى معاها

لا

لانه واجب وبتعمله, ومعندهاش اجازه منه

ولا تقدر تقول فى يوم انا مش هعمل ده انا زهقت

أنا: طيب, هو الراجل عليه تقصير مش هنكره

بس هي برضه مش المفروض فاهمه ده

هي: فهماه

بس ليه البخل فى المشاعر؟

هى مبتخدش مرتب من شغلها ده

ولا زى الراجل

لو ملهوش مزاج فى يوم هياخد اجازه

هى لا

لازم يبقى فى الحافز

أنا: زي ما قلتلك أنا مش بنكر تقصير الراجل

وبعدين انتي بتقولي أهو, لو جه يكلمها هتفتحله محضر

يعني لو جه يصلح غلطه, هيتنفخ

هي: لانه مش معودها على كده اصلا

وفجأه جه يعملها هتحس انه زى ابنها اللى لما يجيب درجه وحشه

وعشان يخفف عنها يعملها مقدمات

ما هو ده نوع التفكير اللى هى بتتعامل معاه

لان خلاص جوزها يدوب بتحطله الاكل وينام

ده تعامله معاها

أنا: المفروض ان يبقى في تعاملات تانيه بس مش دي قضيتنا

لكن اللي بقوله

تخيلي لو فيه حد سمع كلامك دلوقتي, وعايز يصلح غلطه وبيتدي يحفز مراته, يعمل ايه؟

هي: اولا

لما يلاقيها بتعمل حاجه يساعدها

دى بدايه

وهو بيساعدها تبقى فرصه يتكلموا سوا

مش يساعدها يعنى يرفعلها رجله عشان تكنس تحتها

وتبقى هى دى المساعده

أنا: أنا فاهم قصدك

بس تخيلي معايا السيناريو ده

خلصوا الأكل

وبعدين هي بتشيل الأطباق, قام يشيل معاها

هتقوله: بتعمل ايه يا راجل مش بعاده

هيقولها: حسيت انتي بتتعبي أد ايه فقلت أساعدك يا روحي

ساعتها طبعاً نص فيران الكورة الأرضيه هتلعب في عبه

وممكن ينافسوا عدد اللعيبه في دورة بكين

غالباً هتنظرله شزراً نظره مليانه شك وتسكت

هي: لا هقولك

ما هو مش كله مره واحده

ممكن لما يقوم يشيل, وتقوله مش بعاده

يقولها عادى, انا كده كده اجازه النهارده

فقولت اعمل معاكى حاجه بلاش من اولها ياروحى والحاجات الجامده دى

بقالها كتير مسمعتهاش

أنا: الطبيعي اليومين دول ان مفيش أجازات عند حد

فيقول ايه؟

الراجل يا عيني مسحول في الشغل طول النهار

وهييجي على نفسه ويقوم يساعدها, علشان لما يقولها يا حبيبتي

بعد اسبوع. متشكش فيه

يعمل ايه؟

حلي المشكله دي؟

هي: دى ولا مسئله التكامل "أصلها خريجة تربيه رياضيات معلش"

هقولك يشيل معاها

ويقولها اصلى كنت عايزه اكمل الموضوع اللى بتقوليه

لانها اكيد مسكتتش ولا لحظه, والست تحب اوى اللى يسمعها

وتحس انه مركز فى اللى بتقوله

مش قاعد يتفرج على الماتش

أنا: هي فكره حلوه بس انتي مش شايفه ان فيها تحامل على الراجل

يعني مش كمان يقوم يساعد لأ ويكمل الموضوع اللي هو قطعاً عنده استعداد يقطع دراعه

ويخليها تسكت لمده ثانيه

هي: لو مديرك فى الشغل وبيتكلم وبيقولك انه امبارح شاف كائن فضائى وسلم عليه

هتسمعه ولا هتقوم وتسيبه مستكتر على مراتك انك تسمعها

أنا: أنا شخصياً ممكن أتريق عليه وانتي عارفه, بس, في الطبيعي أو المنطقي المفروض أسمعه

علشان أنا ورايا بيت وأسرة, لو مسمعتوش ممكن يضايقني وممكن ده يأثر على الفلوس اللي أنا محتاجها علشان أصرف عليهم

يمكن أنا كده دلوقت علشان مفيش عندي التزام

هي: بالضبط

بردوا مراتك

لو مسمعتهاش وريحتها

بيتك هيبقى مش مظبوط

واحده بتعمل الاكل, وخلاص

لكن مفيش روح فى اى حاجه

أنا: يا ستي, ما هو كله بالعقل حلو برضه

يعني هي ليه متقدرش انه بيبقى جاي من الشغل

مضطر يسمع مديره علشان ميرفدوش

ومضطر يسمع زمايله علشان ميتخانقش معاهم

هي: اقولك حاجه

وهتصدقها

أنا: قولي

هي: عارف الست ليه تتكلم وبتعمل كل ده

أنا: ليه؟

هي: بتبقى طول اليوم مطحونه فى البيت مع الاولاد

وبتقعد تعد الساعات اللى هيجى فيها جوزها

اللى بتحبه "طبعاً مفترض في كلامنا ان الجوازه عن حب أو على الأقل اقتناع, مش تخليص حق"

عشان تقعد معاه, ويتكلموا

لما تلاقيه جى, ومش عايز يسمعها

بتحبط, بتحس انه بقى بعيد عنها

وكل يوم بيزيد البعد ده

لحد ما يبقى فعلا كل واحد فيهم فى وادى

أنا:أنا متفق معاكي

بس ليه ميكونش الكلام بالعقل

يعني تصبر همسه

يكون استريح من شغله, وأكل

شرب الشاي

حاجه كده

لكن دي غالباً بتاخده وش

من ساعة أما يدخل البيت

لحد أما يتخمد

هي: دى حاجه فى ايد الراجل

انه يبقى معودها ان مثلا اه هنتكلم

وهنعمل اللى انتى عايزاه

امتى بقى بايده هو

يعنى ميجيش ياكل, ويدخل ينام شويه

ويقولها قومينى لما يجى الماتش

يتفرج على الماتش

والتعليق

ويشوف كل قناه بتقول ايه

وبعد ده كله

يقوم ينام

ولو اتكلمت

يقولها

عندى شغل بدرى. يعنى اعمل ايه؟

أنا: بس تفتكري الست ممكن تعمل ده

يعني تصبر عليه لحد أما ياخد نفسه

هي: اه هتصبر طالما عارفه انه هيقوم

هيبقى ليها هى بس, مش لماتش الكوره

ولا حد من صحابه اتصل بيه, وهيقضوا سهره سوا

وهى يسيبها ملطوعه

أنا: ما هو برضه الراجل بيحب يخرجله خروجه مع اصحابه

مش تبقى مراته

أو أمه

أو أعوذ بالله حماته

يعني, الراجل بيبقى متعود على أعدة الأصحاب

أنا متفق معاكي

بس اللي بقوله

يبقى برضه عنده فرصه ولو يومين في الأسبوع

يقعد مع أصحابه

هي:هقولك حاجه

انت برضوا هترضى تقعد بالعيال يوم او اتنين وهى تخرج مع صحباتها

وكل واحد يخرج مع اصحابه

ومش مهم جوزه ولا عياله

"طبعاً أنا هنا وشي جاب ألوان وقعدت بتاع دقيقة مش عارف أقول ايه"

أنا: مش كده

بس فيه حلول ظريفه نسبياً

من نوعية مثلاً هي تقابل صحباتها في البيت وهو ينزل يقابل صحابه

أو تروح تقعد مع مامتها مثلاُ وهو مروح ياخدها

هي: حلوه اوى, لا طبعا

مش هينفع

أنا: ليه بس؟

هي: كده

انت خرجت واتفسحت مع اصحابك

وشوفت اماكن جديده, ليه هى لا؟

طالما انت مخرجتهاش

خلاص هى تخرج

أنا: أولاً انت فهماني غلط

أنا بتكلم وأنا عارف العقليه المصريه

وبتكلم عن الراجل المصري اللي خروجته هتبقى يا ع القهوة

يا فشقة واحد عازب في الشلة

هي: وانا برفض ده

لانك هتتكلم مع صحابك عن ايه

هتقولهم مراتك عامله ومسويه

أنا: أنا شخصياً مظنش اني هعمل كده

بس ممكن أتكلم عن حماتي وانها مجنناني

ممكن أشتم في مديري في الشغل كويس

أو أتكلم عن الكورة

"هي طبعاً كانت اعترضت على الجزء بتاع حماتي مجنناني بس عموماً هي معترضتش على الاتنين التانيين"

هي: مفيش مشكله

بس كل الوقت ده بيتك اولى بيه

اولادك اقعد زاكرلهم

خفف عنها شويه

أنا: أنا مش معترض

بس تخيلي, كل واحد قعد في بيتهم

محدش هيعرف حد بعد الجواز

مفيش أصحاب

هي: المفروض كل واحد منهم يكون اتجوز ووقته لبيته

أنا: منا بقولك, مفيش أصحاب

هي: هيكون احسن, في أهل

أنا: كده المجتمع تحول لشوية أسر

ملهاش علاقة ببعض تقريباً

الا شوية زكريات

هي: صدقنى الاصحاب فى اوقات كتير بيخربوا بيوت

وده حصل قصادى اكتر من مره

أنا: بصي, ده بقى أنا ضده

مينفعش ناخد الغلط ونعممه

هي: بص الخلاصه فى الموضع

انى واحده من البنات اللى بكره البخل

ومش البخل اللى فى الفلوس

اقصد البخل فى المشاعر

وده فى الاخر بيخلى الستات تتفرج على

حسين فهمى, وعلى مهند ده

ومتسيبش ولا حلقه

ده عمليه تعويضيه

لكن لو جوزها بيديها اللى محتجاه

مش هتبصله, ولا هتعبره

اصلا

"طبعاً انتوا مستغربين ايه دخل مهند في الموضوع, أصل أنا كنت بشتكيلها ان البنات اللي معايا في الشغل بيقعدوا يتكلموا عن مهند بتاع مسلسل نور طول النهار وان أنا بتضايق من الموضوع ده, ووالله مش حقد ولا غيره"

أنا: أنا مش معترض

بس اللي بقوله

انها لازم تفهم

ان الراجل برضه عنده احتياج أنه يكون ليه أصحاب

بيشوفهم ويتكلم معاهم

هي أهم, أكتر منهم بكتييير

بس برضه هو بيحتاجهم

فهماني؟

"يلا علشان اصحابي يعرفوا هما غاليين عليا أد ايه, يلا على الله يطمر فيهم (هو يعني ايه يطمر؟)"

هي:اه

بس انا شخصيا لو جوزى سابنى

وراح لاصحابه هزعل منه جدا

أنا: طيب ليه تزعلي, وانتي عارفه انه بيحتاج ده؟

ممكن تحاولي توصلي معاه لحل وسط

حاجه تكوني بتحبي تعمليها, تعمليها في الوقت ده

لو بتحبي تزوري مامتك

أو حد من قرايبك

حاجه كده

هي: وهو ميجيش معايا يزورها ليه

ولا هيسبنى اروح لوحدى

وارجع لوحدى

أنا: شفتي احنا بنتكلم في ايه, وانتي نقلتينا لايه

أنا بتكلم, في ان الست زي ما بتحتاج الكلمه الحلوه

وان الراجل يسمعها

هو كمان بيحب يكون عنده مساحة حركه

يقابل صحابه, يقعد ع القهوة معاهم "ده مجرد مثال مش عايزين رخامه أنا بقول من دلوقت"

انتي كده بتحولي محاولتي اني أدرو معاكي ع الوضع اللي ميخنقش الست

لأني بحاول أنقذ الراجل من وضع يخنقه

هي: يبقى خلاص

فعلا هو لو اداها اللى هى محتاجاه

ولو قالها انزل

هتقوله انزل

مع انى من جوايا مش هقدر

اخليه ينزل

وممكن ااثر عليه

ويقعد

أنا: لو عرفتي تخليه يقعد وهو موافق على كده أوكيه

بس متحسسوش انه أجرم في حقها

هي: انا بحس ان تملى الموضوع ده محدش بيتكلم فيه منهم بصراحه مع بعض

أنا: ده حقيقي

ودي المشكله الحقيقة في الجواز

ان مفيش صراحه

هي: بالضبط

ومحدش بيقول للتانى على اللى بيزعله منه

ولو ده حصل بيفتكر التانى انه بيهاجمه

أنا: لو كل واحد قال للتاني من الأول هو بيحب ايه ومبيحبش ايه

والتاني برضه عمل كده

وقعدوا مع بعض, وششافوا كل واحد فيهم ايه التنازلات اللي ممكن يقدمها للتاني

نص مشاكل الجواز هتتحل, من وجهة نظري

هي: ده كلها

ما انا بقولك محدش بيحب يسمع انه غلطان

ولو سمعها, بيدافع عن نفسه

وطالما بقيت بتدافع

معناها ان اللى قصادك عدوك

وهو اصلا مش عدوك ولو اقنعته متبقاش كسبت

أنا: أنا مش بتكلم في وضع غلطان ولا مش غلطان

أنا بتكلم قبل الجواز, يقعدوا مع بعض

الراجل: أنا بحب المحشي

الست: أنا مبحبش أعمل المحشي, هدت حيل ع الفاضي

ويقعدوا يتناقشوا

لو اتفقوا, كان بها

ممكن الاتفاق ده انه يتنازل عن أكل المحشي

أو هي توافق تعمله

وده مش في الأكل بس, ده في كل حاجه

الصغيرة قبل الكبيرة

وبصراحه

اتفقوا

يبقى كده تمام

متفقوش

يبقى خلاص., بيس يا جماعه

كل واحد قاعد في بيت مامته

هي: عارف المشكله هنا

ان الواحده بتقول اه

تقول لنفسها لو مشى هجيب غيره منين

فترضى على مضض

أنا: يبقى تشربه بقى

هي: وكل حاجه اه وطيب

واول ما تتجوز

تمشى اللى فى دماغها

وهو اللى هيشرب

مش هى

أنا:كنت لسه هقولها

هو حقيقة هما الاتنين بيشربو

بس ده غلط كبيييييييييييييييييييييييير

هي: عشان كده دلوقتى بتسمع عن اللى بيطلقوا اكتر من اللى بيتجوزوا

أنا: ما دام اللي انتي بتقوليه ده بيحصل

فده نتيجه حتميه

هي: تعرف انا طول عمرى بسمى فتره الخطوبه

فتره القرع

الاتنين بيقرعوا على بعض

أنا: والله عندك حق

اذا مكانش الناس تبقى صرحه في الجواز, هتبقى صرحه في ايه؟

هي: والمشكله ان بعد عشر سنين جواز

تسمع انهم فى الخطوبه عمرهم ما اتفقوا

طب اتنيلتوا اتجوزتوا ليه

وانتو كنتوا مستحملين بعض ليه وقت الخطوبه

ودلوقتى بعد ما جه عيال خلاص

محدش بقى طايق حد

كله كذب, وغش

ومحدش بيقول الصراحه

أنا: يلا

ربنا يهدي

هي: آمين


ملحوظه: اللي استحمل يكمل قراءه الحوار للآخر من أول مره, يسيب اسمه في التعليقات, لأن ليه جايزه عندي لأنه صبور وعنده قدره عاليه على الاحتمال

لحد هنا والحوار اللي بيني وبينها في الموضوع ده خلص, عايز أعرف بقى, ايه الحل؟

يعني احنا مش مكفينا كل المشاكل المادية والعراقيل اللي بتواجهنا علشان نعرف نتنيل على عنينا ونتجوز, والكلام ده للولاد أو البنات على حد سواء, لأ وكمان بنقعد نلف وندور حوالين بعض

ده طبعاً أطول بوست أنا كتبته, ويمكن أطول بوست في التاريخ وممكن أدخل بيه موسوعة كينيز للأرقام المهلبيه

ومش محتاج طبعاً أقول ان أنا كل اللي عملته في البوست ده عباره عن تقويم للكلام اللي كان بيتقال لأن أكيد مكانش ده منظر الكلام على الماسينجر.

وبرضه مش محتاج أقول ان رأيكم يهمني في الموضوع ده خصوصاً


 

Filed under having 7 comments  

الحرز علمك يا مصر

Thursday, July 24, 2008 by Sha2loob



تحديث
وصلت أنباء من الاسكندرية تفيد بأنهقامت النيابة بحبس المتهمين 15 يوماًووضع أحمد ماهر كمتهم أولوتفيد بأنه سيتم عرض أحمد ماهر على النيابة المسائية ونحن في انتظار تأكيد قطعي للمعلومة
**********************************************************
بعيد عن قانون البث الاعلامي لأن ده لسه فيه كلام كتير, لكن اللي حصل في اسكندرية ده كتير, والله كتير قوي

أحب الأول أقول, أنا مش من شباب 6 ابريل ولا اشتركت في 6 ابريل رغم اني كنت عايز اشترك بس مقدرتش ومشتركتش, ورغم ان ليا من شباب 6 ابريل أصدقاء كتير لكن مكنتش معاهم, وليا مع أفكارهم اعتراضات واتفاقات زيهم زي أي فكر في مصر

والأكتر من كده, بصفتي حزب غد, فكان ليا موقف معلن اني مش معاهم بسبب ان فيه ناس فيهم بيشتموا حزب الغد والكلام الفاضي ده

لكن اللي حصلهم في اسكندرية لازم يخلينا ننحي كل اللي أنا قلته فوق ده على جنب ونبص للموضوع بزاوية مختلفه ونتضامن كلنا معاهم

ناس راحت اسكندرية, وعملوا مؤتمر وخلص, وخرجوا يتمشوا في شوارع اسكندرية بيغنوا

لو كانوا بيغنو لروبي ولا لهيفا ولا لسي تامر كان بقى مفيش مشكله, لاكنهم ولأنهم غاويين خراب البلد بيغنوا أغاني وطنية لأ وكمان أغاني الشيخ امام

مش كده وبس, لأنهم مجرمين, فهم كانوا رافعين علم مصر. ولأنهم متفننين في الاجرام كان معاهم طيارة ورق مرسوم عليها علم مصر

وللجرائم دي كلها فتم القبض عليهم, وخدوا أربع أيام حبس في النيابة

والحرز علم مصر, وطيارة عليها علم مصر

والتهمة: انهم بيغنوا لمصر

ولو الناس دي البلد مقامتش لحد أما يخرجوا, يبقى سلملي على مصر

Filed under having 5 comments  

مدون من غير رخصه

Tuesday, July 15, 2008 by Sha2loob




يعني الواحد يغيبله أد قرن قرنين عن التدوين وييجي يرجع يلاقي حصل اللي حصل, ولا هما عرفوا ان شقلوب مبيكتبش فلاقوها فرصة وقالوا يستغلوها وأهو يضمنوا انه مش هيكتب تاني


بعد فاصل التواضع اللي فات ده أحب أعرفكم أنا كنت بتكلم عن ايه رغم ان انتوا أكيد عرفتم, طبعاُ بتكلم عن قانون البث الاعلامي أو قانون الفقي أو قانون سكسونيا 2008 المعدل


القانون ده يا ساده يا كرام بمنتهى البساطه هيفرض على كل واحد بيكتب على الانترنت أي حاجه, انه لازم ياخد رخصه من هيئة هتتعمل اسمها هيئة البث الاعلامي, وطبعاً علشان رخصة يبقى لازم رسوم وكوسة وقرع وبطيخ وتمضي على انك هتبقى مؤدب وبتسمع الكلام وطيب وأهبل وكده يعني. وتجيب ورقه من 2 موظفين دخلهم فوق ال50 جنيه تقول انك عمرك مشتمت ولا هتشتم ولا بتفكر تشتم الريس ولا الحكومه ولا هتقربلهم من قريب أو من بعيد


القانون ده عايزين يمرروه في مجلس الشعب, ولو اتمرر هتحول من مدون لمدون من غير رخصة, وهيتقبض عليا واتسجن سنتين ودي مقدور عليها, وغرامه خمسين ألف حنيه ودي بقى مش مقدور عليها خااااالص


على العموم, ولأني مش هسكت اتفقت مع عبدالرحمن فارس (لساني هو القلم) ومحمد عادل (مدونة ميت) علشان نعمل جروب على الفاس بوك وسميناه مدونين ضد قانون الفقي, عايزين كلنا ننضمله ونحاول نعمل حاجه يمكن نعرف نوقف القانون ده


ولينك الجروب




وبقول من دلوقت, أنا مدونتي مش مرخصة ومش هتترخص, ومش عايزها تترخص, مستنيكم

Filed under having 4 comments  

طواريء....طواريء

Tuesday, May 27, 2008 by Sha2loob

هيه.. هيه, هي دي الأخبار اللي تفرح بصحيح, أخيرأ مفيش خوف ولا قلق. هنقدر ننام في بيوتنا واحنا مطمنين, ومع ذلك نتكلم براحتنا ونقول كل اللي نفسنا فيه.

طبعاً الخبر اللي كلنا عارفينه هو ان مجلس الشعب (والله نفسي أعرف أنهي شعب) وافق على مد قانون الطواريء لمدة سنتين كمان. محدش يتخض, ويقول قانون الطواريء وحش واخيه وكده. لأ متقلقوش, الحكومة وعدت انها مش هتستخدمه الا ضد الارهابيين وتجار المخدرات. يعني مقالوش المدونين الحمدلله (الا طبعاً لو اعتبرونا ارهابيين)

الحكومة وعدت, وهتوفي بوعدها زي ما احنا عارفين. صحيح هي وعدت ان الأسعار تنزل ومبتنزلش, والمرتبات هتكفي ومبتكفيش. صحيح هما من سنتين لما مدوا قانون الطواريء وعدونا انها آخر مرة. بس معلش, دي حاجات صغيرة متخليناش نشك في قدرتهم على تحقيق وعودهم.

مجلس الشعب طبعاً وافق بأغلبية الأصوات. وأنا بصراحة بطالب ان احنا نغير اسمه من مجلس الشعب الى المجلس الوطني نسبة الى الحزب طبعاً, مش الوطنية. ده مش غريب على مجلسنا الموقر, الغريب ان يطلع واحد معارض ويوافق, ويقول ان قانون الطواريء أرحم بكتير من قانون مكافحة الارهاب. وكأن تطبيق قانون جديد في البلد شيء بيحصل غصب عن عين مجلس الشعب.

المهم.... ان بعد الموافقه دي, ياريت يا جماعة نعلن يوم 26 مايو من كل سنة, يوم حداد عام, مش على حرية الانسان المصري ولا الكلام الفاضي ده كله. عايز أعمل اليوم ده حداد على ما تبقى من ماء وجه نواب الحزب الوطني, اللي تفرغوا لشرح مبررات الحكومة لطلب مد قانون الطواري.

الله يخرب بيتك يلي في بالي, عقدت الناس وجننتني

Filed under having 5 comments  

إوعى كرشك

Thursday, March 27, 2008 by Sha2loob


لنا الريادة دائماً, وعلى كل الحاقدين والموتورين أن يضعوا أيديهم على أفواههم وأن يبتلعوا ألسنتهم وليتركوا شعب مصر العظيم ينعم بانجازاته الخارقة

نقلاً عن مصراوي فقد أعلن المؤتمر الخامس والثلاثون للجمعية المصرية لأمراض القلب أن المصريين هم الأوائل علي العالم في الكرش.
وأكد-بحسب صحيفة المساء- أن أعلي نسبة إصابة بسمنة البطن "الكرش" في العالم توجد بمصر خاصة بين النساء!

وهذا الاعلان هو بمثابة رد على كل الحاقدين والموتورين الذين يدعون مرور مصر وشعبها بأزمة اقتصادية, وأنهم لا يستطيعون ايجاد رغيف العيش بسهولة كما أنهم لا يجدون ما يشترون به الزيت فضلاً عن السمن

فلو كان الشعب لا يجد ما يأكله اذاً من أين أتى بالكرش الذي أعلن عنه المؤتمر

ولكي لا أظلم أحد على حساب أحد توجهت الى معلمي شقلوب الحكيم أسأله عم ما تحير فيه عقلي الضعيف, وقلت له: يا أستاذي العزيز, لقد احتار عقلي وضللت طريقي فلا أدري من أصدق فالمعارضة تقول أن الشعب المصري لا يجد من يأكله أما مؤتمر الأطباء فقد قال أننا مصابون بالسمنه بل أننا أسمن شعب في العالم, فمن أصدق؟

فقال لي معلمي الحكيم: لا تعجب فأنت لازلت بهيم. فالكروش أنواع وأشكال ولها كثير من الأسباب. فالفقير له كرش صغير ناتج عن سوء العادات الغذائية, كما أن الماء والغذاء بما فيهم من وباء لقادرين على انشاء الكروش حتى للهاموش. أما الأغنياء فكروشهم دليل على حياتهم الرغداء ولا تسألني على المسؤولين فكروشهم أصبحت لا تنبت فقط في بطونهم بل في ذقونهم وأقفيتهم لأن على قدر كرش المسؤول نال من كل مأكول

وهكذا يا رفاقي الأعزاء فقد أوضح لنا شقلوب الحكيم أنه لا تعارض بين ما يقال وما قيل, وأعذروني عن قطع الحديث لألحق بطابور العيش

Filed under having 12 comments  

هيييه هنتجوز

Tuesday, March 25, 2008 by Sha2loob


خلاص يا جماعة كل مشاكلنا اتحلت. معدش فيه عنوسه لا لشباب ولا لبنات. كل الشباب هيتجوزوا كل البنات وكله هيبقى تمام. ومدونة عايزة اتجوز هتتقفل علشان هتتجوز وكله هيحط لسانه جوه بقه

ليه كل ده؟ انتوا مش عارفين؟ بجد؟ فاتكم نص عمركم والباقي معرفش هتعملوا فيه ايه بس يدوبك تلحقوا تتجوزوا

عايزين تعرفوا الموضوع؟ وزير التضامن أعلن تخصيص 45 مليون جنيه لمساعدة الشباب على الزواج. واللي مش مصدق الخبر من على مصراوي

وعلشان محدش يتعب نفسه ويدور على مصراوي قام مركز خدمات شقلوب بتوفير لينك الخبر http://www.masrawy.com/News/Egypt/Politics/2008/march/25/youth.aspx

أنا بصراحة أول أما شفت العنوان أعدت أحسبها. احنا حوالي 80 مليون وأكتر وحوالي نص دول عايزين يتجوزوا ومش لاقيين الحكومه هتدعم نصهم (نص النص) يعني 20 مليون شاب وفتاة قول خليهم يتجوزوا منهم في بعضيهم يعني هيصفصفوا على عشرة مليون يعني نصيب الجوز أربعة جنيه ونص. مش بقول كل مشاكلنا اتحلت

قلت يا واد يا شقلوب شوف ايه الحكاية وأهي خدمة تقدمها لزوار المدونة بتاعتك. الاهما فين؟ المهم رحت على صفحة القروض بتاعة بنك ناصر وفتحت على قروض الزواج وبرضه يسعد مركز شقلوب للخدمات توفير اللينكhttp://www.nsb.gov.eg/NasserSocialBank/ar-EG/Social_Services/قرض+الزواج.htm

ومن الآخر نصيب الواحد مش هايزيد عن ألفين جنيه لو توافرت فيه كل الشروط. وبكده الدولة هتساهم في تزويج تسعون ألفاً من الشباب على الأقل. شفتوا الهنا اللي احنا فيه

ألفين جنيه؟ دول يجبوا ايه يا واد يا شقلوب؟ تصدقوا معرفش يجيبوا ايه. يعني الواحد يقدم طلب قرض ودمغات واثباتات انه مش لاقي ياكل (فاكرين بحث الحالة بتاع المدارس والجامعات) علشان في الآخر يدوله ألفين جنيه

آه عرفت الألفين جنيه يعملوا بيهم ايه. يدفعوا ايجار الشقة أول شهر والنور والميه والغاز والباقي يخرجوا بيه خروجة بمناسبة انهم في شهر العسل أو يجيبوا كيلو لحمة قبل ما ينسوها للأبد

سؤال أخير: هيا الحكومة دي بتحكم مصر ولا حتة تانيه؟

Filed under having 6 comments